ދާންދޫ ދާއިރާއަށް ޖުމްހޫރީ ޕާޓީގެ ޓިކެޓުގައި ވާދަކުރައްވާ ނިޝާމާ މުހައްމަދު، އެ ދާއިރާއަށް ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓަށް ތާއީދު ކުރައްވައިފިއެވެ.
ޕީއެންސީގެ ކެންޑިޑޭޓާއެކު ހުންނެވި ފޮޓޮއެއް ހިއްސާ ކުރައްވާ ސޯޝަލްމީޑިއާގައި ނިޝާމާ ވިދާޅުވީ އިންތިޚާބު ފެށެން ކުޑަދުވަސްކޮޅަކަށް ވެފައިވަނިކޮށް ދާއިރާއަށް ނިކުމެ، ކުރެވުނު މަސައްކަތުން ރައްޔިތުންގެ ލޯތްބާއި، އިޚްތިރާމާއި، އެއްބާރުލުން އަދި ތަރުޙީބު ލިބިފައިވާ ކަމަށެވެ.
"ނަމަވެސް، އިންތިޚާބު ކާމިޔާބު ކުރުމަށް އިތުރަށް ވަރަށް ބޮޑެތި މަސައްކަތްތަކަކާއި ޚަރަދުތަކެއް ކުރަންޖެހެއެވެ. ވަގުތު ނެތުމާއި އަދި ފަންޑްވެސް ނެތުމާއެކު، އެދެވޭ ނަތީޖާއެއް ލިބިދާނެކަމަށް އަޅުގަނޑަށް އުއްމީދެއް ނުކުރެވެއެ." ނިޝާމާގެ ޕޯސްޓުގައި ބުނެފައިވެއެވެ.
ނިޝާމާ ބުނެފައިވަނީ، އެންމެ މަސްލަހަތު ހަމަޖެހޭނެގޮތެއް ކަމަށް މިހާލަތުގައި ވިސްނެނީ މަޖިލިސް އިންތިޚާބުގައި ދާންދޫ ދާއިރާއަށް، ޕީއެންސީގެ ކެންޑިޑޭޓަށް ތާއީދު ކުރެއްވުން ކަމަށެވެ. އަދި އޭނާއަށް ތާއީދުކުރާ އެންމެހާ ފަރާތްތަކުގެ އެއްބާރުލުން ސަރުކާރު ތަމްސީލުކުރާ ޕާޓީގެ ކެންޑިޑޭޓަށް ދިނުމަށްވެސް އެދިވަދައިގެންފައިވެއެވެ.
މިއަހަރުގެ ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އޭޕްރިލް 21 ވަނަ ދުވަހުއެވެ. 20 ވަނަ ރައްޔިތުންގެ މަޖިލީހުގައި 93 ދާއިރާއަކަށް ކެންޑިޑޭޓުން އިންތިހާބު ކުރާނެއެވެ. އޭގެތެރެއިން 10 ދާއިރާއަކަށް ޖޭޕީން ކެންޑިޑޭޓުން ވާދަކުރުމަށް ވަނީ ފޯމު ހުށަހަޅާފައެވެ.