އިޒްރޭލުން ފަލަސްތީނުގެ ގާޒާ އަށް ދެމުންދާ ހަމަލާތައް ހުއްޓާލަން އދ. ގެ ސެކިއުރިޓީ ކައުންސިލުން ފާސްކުރި ގަރާރު ތަންފީޒު ކުރުމަށް ރައީސް ޑރ. މުހައްމަދު މުއިއްޒު ގޮވާލައްވައިފިއެވެ.
ހަމަލާ ބަދަލު ކުރުން ވަގުތުން ހުއްޓާލުމުގެ އިތުރުން ރަހީނުން ދޫކުރުމަށް ގޮވާލާ އދ. ގެ ސެކިއުރިޓީ ކައުންސިލުން ފާސްކުރި ގަރާރާ ގުޅޭގޮތުން ރައީސް މުއިއްޒު ސޯޝަލްމީޑިއާގައި ކުރެއްވި ޕޯސްޓެއްގައި ވަނީ، މި ގަރާރަށް ފުރިހަމައަށް ބޯލެނބުމަށް އިޒްރޭލަށް ގޮވާލާފައެވެ. އަދި މި ގަރާރު ތަންފީޒު ކުރުމަށްވެސް ގޮވާލާފައިވެއެވެ.
ރައީސް މުއިއްޒު ވިދާޅުވީ ހަމަލާތަކަށް ދާއިމީ ނިމުމެއް ގެނައުމަށް ބައިނަލްއަޤްވާމީ މުޖުތަމައުން މަސައްކަތް ކުރަންޖެހޭ ކަމަށެވެ. އަދި އިޒްރޭލުން ހިންގާ ޖެނޮސައިޑްގެ އަމަލުތައްވެސް ހުއްޓުވަންޖެހޭ ކަމަށެވެ. ރައީސް ވިދާޅުވީ ފަލަސްތީނުގެ ރައްޔިތުންގެ ހައްގުގައި މުޅި ދުނިޔެއިންވެސް އިތުރަށް މަސައްކަތް ކުރަންޖެހޭ ކަމަށެވެ.
We commend the adoption of the long awaited @UN Security Council resolution demanding an immediate humanitarian ceasefire during the holy month of Ramadan in Gaza. This has been long overdue.
We demand that the resolution adopted today is fully implemented, and call upon Israel…
— Dr Mohamed Muizzu (@MMuizzu) March 26, 2024
އިޒްރޭލުން ފަލަސްތީނުގެ ގާޒާ އަށް ދެމުންދާ ހަމަލާތައް ހުއްޓާލަން އދ. ގެ ސެކިއުރިޓީ ކައުންސިލުން ފާސްކުރި ގަރާރަކީ މި މައްސަލައިގައި މިގޮތަށް ފާސްކުރެވުނު ފުރަތަމަ ގަރާރެވެ. މީގެކުރިން ވެސް ސެކިއުރިޓީ ކައުންސިލަށް މިފަދަ ގަރާރުތައް ހުށަހެޅި ނަމަވެސް އެ ގަރާރުތައް ފާސްވެފައި ނުވަނީ އެމެރިކާއިން ވީޓޯ ކުރާތީއެވެ. އެހެންނަމަވެސް އިއްޔަ ފާސްކުރި ގަރާރު އެމެރިކާއިން ވީޓޯ ކޮށްފައެއް ނުވެއެވެ.
އިޒްރޭލުން ފަލަސްތީނަށް ހަމަލާދޭން ފެށީ މިދިޔަ އޮކްޓޫބަރު މަހުގެ 7 ވަނަ ދުވަހު ކަމަށްވާއިރު މިހާތަނަށް އިޒްރޭލުން ދިން ހަމަލާތަކުގައި ގާޒާ އިން 32،000 އަށް ވުރެ ގިނަ މީހުން ވަނީ ޝަހީދު ކޮށްލާފައެވެ.