ޑްރޯން ގަތުމުގެ މުއާމަލާތުގެ ތަފްސީލު ހޯދުމަށް އަދި މޭ 6 ބޮމުގެ ހަމަލާގެ އިތުރު މައުލޫމާތު ސާފުކުރުމަށް ޑިފެންސް މިނިސްޓަރު ޣައްސާން މައުމޫން ރައްޔިތުންގެ މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީއަށް ހާޒިރު ކުރުމަށް ނިންމައިފިއެވެ.
މިއަދު ބޭއްވި 241 ކޮމިޓީގެ ބައްދަލުވުމުގައި މެންބަރު ހަސަން ލަތީފް ވަނީ، މޭ 6 ބޮމުގެ ހަމަލާގައި އިތުރު މައުލުމާތު ހިއްސާކުރަން ހުރިކަން މިނިސްޓަރު ޣައްސާން ފާހަގަކުރައްވާފައިވާތީ އެ މައުލޫމާތު ހޯދުމަށް އަދި ޑްރޯން ގަތުމުގެ މުއާމަލާތާ ގުޅޭ މައުލޫމާތު ސާފުކުރުމަށް މިނިސްޓަރު ޣައްސާން ހާޒިރު ކުރުމަށް އެދިވަދައިގެންފައެވެ.
އެހެންކަމުން 241 ކޮމިޓީން މިއަދު ފާސްކޮށްފައިވަނީ މިނިސްޓަރު ޣައްސާން އެ ކޮމިޓީއަށް ހާޒިރުކުރުމަށެވެ.
ރައްޔިތުންގެ މަޖިލީހުގެ އިއްޔަގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން މިނިސްޓަރު ޣައްސާން ވިދާޅުވީ ކުރީގެ ރައީސް މުހައްމަދު ނަޝީދަށް މޭ 6 ވަނަ ދުވަހު ދިން ބޮމުގެ ހަމަލާގެ މައްސަލަ ވަރަށް ގާތުން ބަލަމުން ގެންދަވާނެ ކަމަށެވެ. އަދި މިހާރު ފެނިފައިހުރި ކަންތައްތަކުގައި މި މައްސަލައިގައި ރައްޔިތުންގެ މަޖިލީހާ ހިއްސާކުރާނެ އިތުރު މައުލޫމާތު ދިފާއީ ވުޒާރާގައި އެބަހުރި ކަމަށްވެސް ޣައްސާން ވިދާޅުވިއެވެ. އެ މައުލޫމާތު ހިއްސާކުރެވޭނީ އެ މައުލޫމާތު ހޯދުމަށް މެންބަރުން އެދުމުން ކަމަށްވެސް ވިދާޅުވިއެވެ.
މީގެއިތުރުން ޑްރޯންތަކާ ގުޅޭގޮތުން ޣައްސާން އިއްޔަ މަޖިލީހުގައި ވިދާޅުވީ އެއްވެސް ގައުމެއްގައި ދިފާއީ ގޮތުން ކުރާ ހަރަދުތަކުގެ ތަފްސީލުތައް އެގޮތަށް ހާމަނުކުރާ ކަމަށެވެ. އެހެންކަމުން އެ މައުލޫމާތު ރައްޔިތުންގެ މަޖިލީހުގެ ޖަލްސާއެއްގައި ހާމަކުރުމަށް އުޒުރުވެރިވާ ކަމަށް ވިދާޅުވިއެވެ. އަދި ރައްޔިތުންގެ މަޖިލީހުގެ 241 ކޮމިޓީގައި ސިއްރު ޖަލްސާއެއްގައި މި މައުލޫމާތު ހާމަކުރެވިދާނެ ކަމަށެވެ.