ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިސާދީ ސިޔާސަތެއްގެ ދަށުން ހިންގޭ މުހިންމު މަޝްރޫއުތައް ކަނޑައެޅުމަށް އެކަށައެޅި ރައީސުލްޖުމްހޫރިއްޔާގެ ޤަރާރުގައި އައްޑޫސިޓީގެ 2 މަޝްރޫއެއް ހިމަނައިފިއެވެ.
ރައީސް ޑރ. މުހައްމަދު މުއިއްޒު ސޮއި ކުރައްވާ މި ޤަރާރު ގެޒެޓް ކުރައްވާފައިވަނީ އިއްޔައެވެ.
ޓޫރިޒަމާބެހޭ ޤާނޫނުގެ ދަށުން ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިސާދީ ސިޔާސަތެއްގެ ދަށުން ނުވަތަ އިޖުތިމާއީ ސިޔާސަތެއްގެ ދަށުން ހިންގުމަށް ސަރުކާރުން ކަނޑައަޅާ މުހިންމު މަޝްރޫއުތަކާއި، އެ މަޝްރޫއު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދު ރައީސްގެ ޤަރާރަކުން ކަނޑައަޅަންޖެހެއެވެ.
މި ޤާރާރުގައި ޖުމުލަ 13 މަޝްރޫއެއް ހިމަނާފައިވާއިރު އޭގެ ތެރޭގައި އައްޑޫސިޓީގެ ދެ މަޝްރޫއެއްވެސް ހިމަނާފައިވެއެވެ.
އެގޮތުން ގަން އިންޓަނޭޝަނަލް އެއާޕޯޓް ތަރައްޤީ ކުރުމުގެ މަޝްރޫއު މި ޤަރާރުގައި ހިމަނާފައިވާއިރު، އެ މަޝްރޫއަށް ހަރަދު ކުރަންޖެހޭ އެންމެ ދަށް މިންވަރުގެ ގޮތުގައި ކަނޑައަޅާފައިވަނީ 4 މިލިއަން ޑޮލަރެވެ. މި ޤަރާރުގައި ދެން ހިމަނާފައިވަނީ އައްޑޫސިޓީގައި އައްސޭރި ޓޫރިޒަމް މަޝްރޫއު ހިންގުމެވެ. އެ މަޝްރޫއަށް ހަރަދު ކުރަންޖެހޭ އެންމެ ދަށް މިންވަރުގެ ގޮތުގައި ކަނޑައަޅާފައިވަނީ 10 މިލިއަން ޑޮލަރެވެ.
މީގެއިތުރުން މި ޤަރާރުގައި ވަނީ އަލަށް އެއާޕޯޓް އަޅާނެ ރަށްތައްވެސް ކަނޑައަޅާފައެވެ. އެގޮތުން 9 ސަރަހައްދެއްގައި އެއާޕޯޓް ތަރައްގީ ކުރުމަށް ހިމަނާފައިވާއިރު އެއާޕޯޓްގެ މަސައްކަތް ނުނިމި ހުރި ބައެއް ރަށްތަކުގެ މަޝްރޫއުތައްވެސް މި ޤަރާރުގައި ހިމަނާފައިވެއެވެ.