2021 ވަނަ އަހަރު ހުޅުމާލޭގައި ފުލުހުން ހިންގި ހާއްސަ އޮޕަރޭޝަންތަކެއްގައި އަތުލައިގަތް 119 ކިލޯގެ ޑްރަގްސްގެ މައްސަލައިގައި ހިމެނޭ 2 މީހަކު ސަލާމަތްވުމުން، އެ މައްސަލައިގެ ހުރިހާ ތަފްސީލެއް ރައްޔިތުންނަށް ހާމަކުރުމަށް ހޯމް މިނިސްޓަރު އަލީ އިހުސާން ފުލުހުންނަށް އަންގަވައިފިއެވެ.
119 ކިލޯގެ މަސްތުވާތަކެތި އަތުލައިގަތް މައްސަލައިގައި ދައުވާ ކުރީ އަލީ ޒުބައިރު، އަހްމަދު ސުނައިން އަދި އަހުމަދު މުޖާހިދުގެ މައްޗަށެވެ. މި މީހުންގެ މައްޗަށް ކޮށްފައިވަނީ ޑައިމޯފިން ޓްރެފިކް ކުރުމުގެ ކުށުގެ ދައުވާއެވެ.
މި މައްސަލައިގައި ކްރިމިނަލް ކޯޓުން ހުކުމް ކޮށްފައިވަނީ މިދިޔަ ހަފުތާގައެވެ. އަދި މި މައްސަލައިގައި ހިމެނޭ 2 މީހެއްގެ މައްޗަށް ކުށް ސާބިތުނުވާ ކަމަށްވެސް ކްރިމިނަލް ކޯޓުން ހުކުމް ކޮށްފައިވެއެވެ.
މި މައްސަލައާ ގުޅިގެން ހޯމް މިނިސްޓަރު އިހުސާން ވިދާޅުވީ، ރާއްޖެއަށް 119 ކިލޯގެ މަސްތުވާތަކެތި އެތެރެކޮށް ވިޔަފާރިކުރާކަމަށް ތުހުމަތުކުރެވި ވަރަށް ތަފްސީލީ ތަހުގީގަކަށްފަހު މިކަމުގައި ބައިވެރިވި ކަމަށް ތަހުގީގަށް ފާހަނގަވި 3 މީހުންގެ މައްޗަށް ދައުވާ ކުރެވުނުނަމަވެސް، ނިމިދިޔަ ހަފްތާގައި ކްރިމިނަލް ކޯޓުން އޭގެތެރެއިން ދެމީހުންގެ މައްޗަށް ކުށް ސާބިތުނުވާކަމަށް ހުކުމް ކޮށްފައިވާ ކަމަށެވެ.
"މި ފަދަ ކޭސްތައް ރިވިއުކޮށް ރައްޔިތުންނަށް ހުރިހާ ތަފްސީލެއް ހާމަކުރުމަށް އަޅުގަނޑުވާނީ ދިވެހި ފުލުހުންގެ ޚިދުމަތަށް މިއަދު ދަންނަވާފައެވެ." މިނިސްޓަރު އިހުސާން ވިދާޅުވިއެވެ.
119 ކިލޯގެ މަސްތުވާތަކެތި އަތުލައިގަތް މައްސަލައިގައި ކުށް ސާބިތުވެފައިވަނީ އަލީ ޒުބައިރުގެ މައްޗަށް އެކަންޏެވެ. އޭނާ 25 އަހަރަށް ޖަލަށް ލުމާއެކު 100،000 ރުފިޔާއިން ޖުރިމަނާ ކުރުމަށް ހުކުމް ކޮށްފައިވެއެވެ. އަދި އަހްމަދު ސުނައިން އަދި އަހުމަދު މުޖާހިދުގެ މައްޗަށް ކުށް ޝައްކެއް ނެތް މިންވަރަށް ޝަރީއަތަށް ސާބިތުނުވާކަމަށް ކަނޑައަޅައި ހުކުމް ކޮށްފައިވެއެވެ.