ގޭންގްސްޓާރަކުން ސިޔާސީ ލީޑަރަކަށް ބަދަލުވި އިންޑިއާގެ މުހްތާރު އަންސާރީ މަރުވެއްޖެ އެވެ.
އޭނަ އިއްޔެ މަރުވީ އުއްތަރު ޕްރަދޭޝްގެ ޖަލެއްގައި އަންގާރަ ދުވަހު ވަރަށް ބޮޑަށް ހޮޑުލައި، ހާލު ދެރަވެ، ހޮސްޕިޓަލަށް ގެންގޮސް ފަރުވާ ދެނިކޮށް ހާޓްއެޓޭކެއް ޖެހިގެން ކަމަށް މީޑިއާތަކުން ބުންޏެވެ. ފަސް ދައުރެއްގެ މަތިން ގާނޫނު ހަދާ މަޖިލީހުގެ މެންބަރުކަން ވެސް ކޮށްފައިވާ އަންސާރީގެ އުމަރަކީ 63 އަހަރެވެ. އޭނަގެ މަރާ ގުޅިގެން އާއިލާ އިން ވަނީ ފުލުހުންގެ މައްޗަށް ތުހުމަތުތަކެއްކޮށްފަ އެވެ. އެގޮތުން އަންސާރީ މަރައިލީ ކާނާ އަށް ވިހަލައިގެން ކަމަށް ތުހުމަތުކޮށްފައިވެ އެވެ.
އޭނަގެ މަރާ ގުޅިގެނ މަސްރަހު ހޫނުވެދާނެތީ ފުލުހުން ވަނީ އުއްތަރު ޕްރަދޭޝް އާއި އަންސާރީގެ ގެ ހުންނަ ސަރަހައްދުގެ ސެކިއުރިޓީ ވެސް ވަރުގަދަކޮށްފަ އެވެ. އަދި އޭނަގެ ޕޯސްޓްމޯޓަމް މިއަދު ހަދަން ހަމަޖެހިފައިވެ އެވެ.
ސުހެލްދޭވް ބާރަތިއާ ސަމާޖް ޕާޓީ އަށް ނިސްބަތްވާ އަންސާރީ ޖަލު ހުކުމް ތަންފީޒު ކުރަމުން އަންނަނީ 2005 އިން ފެށިގެންނެވެ. އޭނަ އަކީ 90 ގެ ތެރޭގައި އިންޑިއާގެ ވަރަށް ނުފޫޒު ގަދަ ގޭންގްސްޓާރެކެވެ. އޭރު އޭނަ ހިންގި ޖަރީމާތަކާ ގުޅިގެން 60 އަށް ވުރެ ގިނަ ދައުވާ އުފުލާފައިވެ އެވެ. އޭގެ ތެރޭގައި 15 މީހަކ މަރާލުމުގެ ދައުވާ ވެސް ހިމެނެ އެވެ.
އަންސާރީ ސިޔާސީ ދާއިރާ އަށް އަށް ނުކުތީ 1996 ގަ އެވެ.