ގަން އިންޓަނެޝަނަލް ތަރައްގީ ކުރުމަށް ބޭންކް އޮފް މޯލްޑިވްސް (ބީއެމްއެލް) އިން ނަގަން ހުށައެޅި 16 މިލިއަން ޑޮލަރުގެ ލޯނު ލިބުމުގައި ހުރަސްތަކެއް ކުރިމަތި ވެފައިވާ ކަމަށް ބައެއް މީޑިއާތަކުން ރިޕޯޓްކޮށްފި އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ގަން އެއަޕޯޓް ތަރައްގީ ކުރުމަށް ހިންގާ މަޝްރޫޢަށް މިހާރު ބޭނުންވާ ފައިސާ ހޯދުމަށް ބޭންކް އޮފް މޯލްޑިވްސްއިން 16 މިލިއަން ޑޮލަރުގެ ލޯނަކަށް އެދިގެން އުޅޭތާ މިހާރު ހަތަރު ވަރަކަށް މަސް ދުވަސް ވެއްޖެ އެވެ.
އެހެން ނަމަވެސް އެ ލޯނަށް އެދުމުން ބޭންކުގެ ބޯޑުން ނިންމާފައި ވަނީ ކުންފުނީގެ މައި ހިއްސާދާރަކީ ސަރުކާރު ކަމަށްވާތީ ސަރުކާރުގެ ސޮވަރިން ގެރެންޓީއެއް ނެތި ލޯނު ދޫނު ކުރުމަށް ކަމަށް ބުނެފައިވެ އެވެ.
ސޮވަރިން ގެރެންޓީ ލަސްވާތީ ލެޓަ އޮފް އަންޑަ ޓޭކިންއެއް ހުށައެޅުމަށް އެންގުމުން އެކަމާ ބެހޭ ލިޔުންތައް ވެސް ހުށައަޅައިގެން އުޅޭތާ ދުވަސްތަކެއް ވެއްޖެ ކަމަށް ވެސް މީޑިއާތަކުން ރިޕޯޓްކޮށްފައިވެ އެވެ.
މި މަޝްރޫޢަށް ބޭނުންވާ 16 މިލިއަން ޑޮލަރުގެ ލޯނެއް ދިނުމަށް ރައްޔިތުންނާއި ސަރުކާރާއި ރައްޔިތުން ހިއްސާވާ ދިވެހި ބޭންކް ބީއެމްއެލްގެ ބޯޑުން ފަސްޖެހިފައިވާ އިރު އަވަށްޓެރި ސްރީލަންކާ ސަރުކާރުން ބޮންޑު ގަތުމަށް އެ ބޭންކުން ގިނަ އަދަދެއްގެ ފައިސާ ޚަރަދުކޮށްފައިވާ ކަމަށް ވެސް ބައެއް މީޑިއާ ރިޕޯޓްތައް ބުނެ އެވެ.
ގަން އެއާޕޯޓް ތަރައްގީ ކުރަނީ އެ އެއާޕޯޓް މިހާރު ހިންގާ އައްޑޫ އިންޓަނެޝަނަލް އެއާޕޯޓް (އޭއައިއޭ) އާއި ޗަމްޕާ ހުސައިން އަފީފުގެ ކާސާ ހޮލްޑިން ގުޅިގެންނެވެ.
އޭއައިއޭގެ 30 ޕަސެންޓް ހިއްސާ އޮންނާނީ ކާސާ އަށް ވިއްކާލައިފަ އެވެ.
އެ ކުންފުނީގެ 30 ޕަސެންޓް ހިއްސާ 60 މިލިއަން ރުފިޔާ އަށް މަޝްހޫރު ވިޔަފާރިވެރިޔާ ޗަމްޕާ އަފީފްގެ ކާސާ ހޯލްޑިން އަށް ވިއްކާލުމުގެ އެގްރިމެންޓްގައި ސޮއިކޮށްފައި ވަނީ ނޮވެމްބަރު 5، 2012 ގަ އެވެ.
"އައްޑޫ ލައިވް" އަށް އެނގިފައިވާ ގޮތުގައި ބީއެމްއެލް އަށް 16 މިލިއަން ޑޮލަރުގެ ލޯނެއް ނަގަން ހުށަހެޅީ ކާސާއިންނެވެ.
އެހެން ނަމަވެސް އެ ލޯން ލިބޭ ގޮތް ނުވެ، ކާސާ އަށް ފަންޑް ހޯދަން ދިމާވަމުންދާ ދަތިތަކާ ގުޅިގެން އެ ކުންފުނި ވަނީ ގަން އެއާޕޯޓް މަޝްރޫއުން ވަކިވާން ނިންމާފައި ކަމަށް އަޑު ފެތުރިފައިވެ އެވެ.
ގަން އެއާޕޯޓް ތަރައްގީ ކުރަން މިހާރު ހިންގާ މަޝްރޫއުގެ ދަށުން، އެއާޕޯޓްގެ ރަންވޭ ދިގު ކުރުމުގެ މަސައްކަތް މިހާރު އަންނަނީ ކުރަމުންނެވެ. އެ މަސައްކަތް ކުރަނީ ޑެންމާކްގެ ހޯގާޑުންނެވެ.