އާޖެންޓީނާގެ ފުޓްބޯޅަ ތަރި އެންހެލް ޑި މަރިއާ އަށް މަރުގެ އިންޒާރުދިން މައްސަލައެއްގައި ބަޔަކު ހައްޔަރުކޮށްފި އެެވެ.
އާޖެންޓީނާގެ ރޮސާރިއޯގައި ހުންނަ އޭނަ ގޭގައި މިދިޔަ ހޯމަ ދުވަހުގެ ރޭ ކާރަކުން ޖައްސާލައި ކުރީގެ ޓީމަށް އެނބުރި ނުދާން ވެސް އިންޒާރުތަކެއް ދިން މައްސަލައެއްގައި ތިން މީހަކު ހައްޔަރުކޮށްފައި ވަނީ ބުދަ ދުވަހު އެވެ. މިކަމާ ގުޅިގެން އާޖެންޓީނާގެ ފުލުހުން ބުނީ ހައްޔަރުކުރި ތިން މީހުންގެ ތެެރެއިން އެކަކީ މަސްތުވާތަކެއްޗާ ވެސް ގުޅުން އޮތް މީހެއް ކަމަށާއި އޭނަ މަސްތުވާތަކެތި ޓްރެފިކް ކުރުމުގެ މަައްސަލައެއް ވެސް ތަހުގީގު ކުރަމުންނެވެ.
ޑި މަރިއާ އަށް އިންޒާރު ދިން މައްސަލައިގައި އޭނަ ބުނީ މިކަމާ ގުޅިގެން އޭނަގެ އާއިލާގެ ރައްކާތެރިކަމާ މެދު ވެސް ކަންބޮޑުވާ ކަމަށެވެ. އަދި އިންސްޓަގްރާމް ސްޓޯރޯގައި އޭނަ ބުނީ ބޭނުން ވަނީ ހަމަޖެހުމާއ ސުލްހަވެރިކަން ކަމަށެވެ. ޑި މާރިއާ އަށް އިންޒާރު ދިން އިރު، އޭނަ މިހާރު ހުރީ ޖޫން މަހާ ހަމައަށް ޕޯޗްގީޒްގެ ކުލަބެއް ކަމަށްވާ ބެންފީކާގެ ކޮންޓްރެކްޓަރެއްގަ އެވެ.
ދެ ކުދިންގެ ބައްޕަ ޑި މަރިއާ، 36، ބުނެފައި ވަނީ އޭނަގެ ފުޓްބޯޅަ ކެރިއަރު ނިންމައިލަން ބޭނުން ވަނީ ކެރިއަރު ފެށި ރޮސާރިއޯ ސެންޓްރަލް އިން ކަމަށެވެ.
އޭނަ އަށް ދިން އިންޒާރާ ގުޅިގެން އެ ކުލަބުން ވެސް ކަންބޮޑުވުން ފާޅުކޮށް ބަޔާނެއް ނެރެފައިވެ އެވެ. އޭގައި ރޮސާރިއޯ ސެންޓްްރަލް އިން ބުނީ ކުޅުންތެރިންނާއި އެ މީހުންގެ އާއިލާތަކަށް އިންޒާރު ދީ ބިރު ދެއްކުމަކީ ބަލައިގަނެވޭނެ ކަމެއް ނޫން ކަމަށެވެ. އަދި ޑި މަރިއާ އާއި އާއިލާ އަށް ދިން އިންޒާރު ހަރުކަށި އިބާރާތުން ކުށްވެރިކުރާ ކަމަށް ބުންޏެވެ.