ޏ. އަތޮޅު ތައުލީމީ މަރުކަޒަށް ދިމާވެފައިވާ ޖާގައިގެ ދަތިކަން ހައްލު ކުރުމަށް ފަސް ބުރީގެ އިމާރާތެއް އެޅުމުގެ މަސައްކަތް ހަވާލުކޮށްފިއެވެ.
އެޑިއުކޭޝަބް މިނިސްޓްރީން އެ މަޝްރޫއު ހަވާލުކުރީ ޓިކްޓިކް އިންވެސްޓްމަންޓާ އެވެ. އެއީ އެ މަސައްކަތް ފަށާތާ 420 ދުވަހުގެ ތެރޭގައި ނިންމާ ގޮތަަށެވެ. އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު ޑރ. އަހުމަދު މުހައްމަދެވެ.
ޓިކް ޓެކް އިންވެސްޓްމެންޓްގެ ފަރާތުން ސޮއިކުރެއްވީ ޗީފް ފައިނޭންޝިއަލް އޮފިސަރު އިސްމާއިލް ޒަހުރާން ޒުބައިރެވެ.
ފަސް ބުރީގެ އާ އިމާރާތުގައި ކުލާސްރޫމްތަކާއި ލެބޯޓްރީ އާއި އޮފީސްބައެއް ހިމެނޭ އެވެ. މި މަޝްރޫއުގެ އަގަކީ 36 މިލިއަން ރުފިޔާ އެވެ.
ޏ. އަތޮޅު ތައުލީމީ މަރުކަޒަކީ ގުރޭޑް 7-12އަށް ކިޔަވައިދޭ ސްކޫލެކެވެ. އަދި އެ ސްކޫލަކީ ފުވައްމުލަކު މަތީ ސާނަވީއަށް ކިޔަވައިދޭ ހަމައެކަނި ސްކޫލެވެ.