ދިވެހި ޤައުމިއްޔަތަށްޓަކައި ޖައްވީ ދިރާސާތައް މުހިއްމު ކަމަށާއި މިހާރުގެ ރައީސް ޑރ. މުހައްމަދު މުއިއްޒު ގައުމިއްތާ މެދު ގެންގުޅުއްވާ ތަޞައްވުރަކީ އެމްއެސްއާރްއޯ ފަދަ ޒުވާން ލޯތަކުން ރާއްޖޭގެ ތާރީޚަށް ބަލާނޭ ޒަމާނެއް އުފެއްދުން ކަމަށް ދިވެހި ބަހާ ބެހޭ މިނިސްޓަރު އާދަމް ނަސީރު އިބްރާހީމް ވިދާޅުވެއްޖެ އެވެ.
މިނިސްޓަރު އެގޮތަށް ވިދާޅުވީ މޯލްޑިވްސް ސްޕޭސް ރިސާޗް އޯގަނައިޒޭޝަން (އެމްއެސްއާރްއޯ) އާ އެކު ބޭއްވި ބައްދަލުވުމެއްގަ އެވެ.
އެ ބައްދަލުވުމަކީ އެމްއެސްއާރްއޯގެ އިސްނެގުމުގެ މަތިން ފަލަކީ ޢިލްމު ހޯދައި ބަލައި ދިރާސާ ކުރުމަށް އެ އޯގަނައިޒޭޝަނުން ކުރަމުންގެންދާ މަސައްކަތްތަކުގެ ތެރެއިން، ރާއްޖޭގެ ނުޖޫމީ ތަރިކައާ ބެހޭ މަޢުލޫމާތު އެއްކުރުމަށް ކުރެވޭ މަސައްކަތްތަކުގައި މިވުޒާރާގެ އެހީ ހޯދެނޭ ދާއިރާތައް ދެެނެގަތުމާއި، ގުޅިގެން މަސައްކަތް ކުރިއަށް ގެންދާނެ ގޮތާ ބެހޭ ގޮތުން މަޝްވަރާ ކުރުމަށް ބޭއްވުނު ބައްދަލުވުމެކެވެ.
ރާއްޖޭގެ ސަގާފަތާއި ތަރިކައާ ގުޅުން ހުރި މިފަދަ މަސައްކަތެއްގައި ދިވެހި ޒުވާނުން އިސްނަގައި، ނުޖޫމީ ތަރިކަ ހޯދާބަލައި، ރައްކާކުރުމަށް ކުރެވޭ މިމަސައްކަތަކީ ބޭނުންތެރި މަސައްކަތެއްކަން މިނިސްޓަރު ނަސީރު ފާހަގަކުރެއްވިއެވެ. އަދި އެ މަސައްކަތްތަކަކީ ރައީސް ޑރ. މުޙައްމަދު މުޢިއްޒު ދިވެހި ޤައުމިއްޔަތު އިއާދަކުރެއްވުމަށް ކުރައްވާ މަސައްކަތްޕުޅުގެ މުހިންމު ބަހާއެއްކަމަށް ދެކެވަޑައިގަންނަވާ ކަމަށާއި މިކަމުގައި މިވުޒާރާއިން ފަންނީ ގޮތުންނާއި ޢިލްމީ ގޮތުން ދެއްވެން އޮތް ހުރިހާ އެއްބާރުލެއްވުމެއް ދެއްވާނެކަމުގެ ޔަޤީންކަން ދެއްވި އެވެ.
މިނިސްޓަރު ފާހަގަކުރެއްވި ގޮތުގައި، ތަރިތަކުގެ ޢިލްމުގައްޔާއި، ގަސްގަހާގެއްސާއި ކަނޑުގެ އަޑިއަށް ނަޒަރު ހިންގިޔަސް، އެތަންތަނުން 4،000 އަހަރުވީ ދިވެހި ތާރީޚީ މުއްސަނދި ތަރިކަތައް ފެންނަން ހުންނާނެ އެވެ. އެކަންކަން ދެނެގަތުމަށް ބޭނުން ވަނީ ޝައުޤުވެރި ލޯތަކެއް ކަމަށްވިދާޅުވިއެވެ.