ޕެރޫގެ ރައީސް ޑީނާ ބޮލާޓް ބޭނުން ކުރައްވަމުން ގެންދަވާ އަގުބޮޑު ރޮލެކްސް ގަޑިތަކާ ގުޅޭ ކޮރަޕްޝަންގެ މައްސަލަތަކެއްގައި އޭނަގެ ގެ ރެއިޑްކޮށްފި އެވެ.
މީޑިއާތަކުން ބުނީ ޕްރޮސެކިއުޓަ ޖެނެރަލް އޮފީހާ ގުޅިގެން ފުލުހުން މިއަދު ހެނދުނު އެ ގެ ރެއިޑްކުރުމަށް ފަހު ބަލައި ފާސްކުރަމުން އަންނަ ކަމަށެވެ. ޑީނާގެ މައްޗަށް ވަނީ ގިނަ އަދަދެއްގެ ރޮލެކްސް ގަޑި ގެންގުޅޭ ކަމަށް ތުހުމަތުކޮށްފަ އެވެ. އަދި ގަޑިތައް ހޯދާފައި ވަނީ ނާޖާއީޒު ގޮތުގައި ކަމަށް ތުހުމަތުކޮށްފައިވެ އެވެ.
ޑިސެމްބަރު 7، 2022 ގައި ވެރިކަމަށް ވަޑައިގަތް ފަހުން، އެކިއެކި ރަސްމިއްޔާތުތަކާއި ހަފުލާތަކުގައި ޑީނާ، 61، އެންމެ އަގުބޮޑު ރޮލެކްސް ގަޑި އަޅުއްވަމުން ގެންދަވާކަން ފާހަގަކުރެވިފައިވެ އެވެ. އަދި މިކަމާ ގުޅިގެން އޭނަގެ މައްޗަށް ތުހުމަތުތަކެއް ކުރެވެން ފެށުމާ ގުޅިގެން ވިދާޅުވެފައި ވަނީ އާންމުކޮށް ބޭނުން ކުރައްވާ އެންމެ އަގުބޮޑު ރޮލެކްސް ގަޑި އަކީ އުމުރުން 18 އަހަރުގައި ވަޒީފާ އަދާކުރައްވަން ފެއްޓެވި ފަހުން ލިބިވަޑައިގަތް އާމްދަނީ ބައްލަވައިގަތް އެއްޗެއް ކަމަށެވެ.
ޑީނާ ވިދާޅުވި ގޮތުގައި ދައުލަތުގެ ފައިސާއެއްގައި އޭނަ ނުހައްގުން ޖެހިވަޑައިގެންފައެއް ނުވާނެ އެވެ. އަދި އޭނަގެ ދެ އަތް "ވަރަށް ސާފުތާހިރުވާނެ" ކަމަށް ވިދާޅުވެފައިވެ އެވެ.
"އަހަރެން ސަރުކާރު ހިންގުމާ ވެސް ހަވާލުވީ ސާފު މީހެއްގެ ގޮތުގައި. އެނބުރި ވަޑައިގަންނަވާނީ ވެސް އެފަދަ މީހެއްގެ ގޮތުގައި." ޑީނާ ވިދާޅުވި އެވެ.