އަންނަ މަހު ރައްޔިތުންގެ މަޖިލިސް އިންތިހާބު އޮންނާނީ ސްކޫލްތަކުގެ އިމްތިހާނު އަވަސް ކުރަން އެޑިއުކޭޝަން މިނިސްޓްރީން ނިންމި ނިންމިން ބަދަލު ކުރައްވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އަންނަ މަހުގެ 21 ގައި މަޖިލިސް އިންތިހާބު ބާއްވާތީ ސްކޫލްތަކުގެ އިިމްތިހާނު އަވަސް ކުރަން އަންގައި މިނިސްޓްރީން ސާކިއުލާއެއް ނެރުނީ މި މަހުގެ މެދުތެރޭގަ އެވެ.
މިކަމުގެ ކަންބޮޑުވުންތަކާ ރައީސް ޑރ. މުޢިއްޒު އެޑިއުކޭޝަން މިނިސްޓަރު ޑރ. އިސްމާއީލް ޝަފީއުއާ މަޝްވަރާ ކުރެއްވުމަށް ފަހު ސްކޫލްތަކުގެ އިމްތިހާނުތައް އަވަސް ނުކުރާ ގޮތަށް ހަމަޖައްސަވާނެ ކަމަށެވެ. އަދި އެގޮތަށް އެކަން ކުރާ އިރު، ބެލެނިވެރިންނާއި ދަރިވަރުންނަށް ދަތި ނުވާނެ ގޮތަށް ނިންމުންތައް ނިންމަވާނެ ކަމަށް ވެސް ވިދާޅުވިއެވެ.
ދިރާސީ އަހަރުގެ ކަލަންޑަރުގައި ގްރޭޑް 7-9 ގެ ދެވަނަ ޓާމްގެ ޓެސްޓު ބާއްވާ ތާރީހުގެ ގޮތުގައި ކަނޑައަޅާފައި އޮތީ އޭޕްރީލް 16 އިން 27 އާ ދެމެދުގަ އެވެ. ނަމަވެސް އެޑިއުކޭޝަން މިނިސްޓްރީން ސްކޫލުތަކަށް ފޮނުވި ސާކިއުލާއެއްގައި ބުނީ ޓެސްޓު ބާއްވަން ކަނޑައަޅާފައި އޮތް ދުވަސް އިންތިހާބުގެ ތެރެއަށް ވަންނާތީ ޓެސްޓު ބާއްވާ ދުވަހަށް ބަދަލު ގެންނަން ނިންމާފައިވާ ކަމަށެވެ. އެެހެންވެ ދެވަނަ ޓާމްގެ އިމްތިހާން މި މަހުގެ 27 އިން 25 އޭޕްރީލް އާ ދެމެދު ރަސްމީ ދުވަސްތަކުގައި ބާއްވައި ނިންމުމަށް އެޑިއުކޭޝަނުން އެންގި އެވެ.
އެ ސާކިއުލާގައި ވަނީ އޭޕްރީލް 20 ވާ ހޮނިހިރު ދުވަހު ޓެސްޓެއް ނަގާ ނަމަ އީސީން އެ ސްކޫލަކަށް ކަނޑައަޅާފައިވާ ފޯކަލް ޕޮއިންޓާ މަޝްވަރާ ކުރުމަށް ފަހު ގޮތެއް ނިންމުމަށް ވެސް އަންގައިފަ އެވެ.