އެއާޕޯޓް އަޅާ ރަށްތަކުގެ ލިސްޓުގައި ދާންދޫ ދާއިރާ ހިމަނައިދިނުމަށް ދާންދޫ ދާއިރާގެ މެންބަރު ޔައުގޫބް އަބްދުﷲ އެދިވަޑައިގެންފިއެވެ.
ޔައުގޫބް ސޮއިކޮށް ރައީސް ޑރ. މުހައްމަދު މުއިއްޒުއަށް މިއަދު ފޮނުވި ސިޓީއެއްގައި ބުނެފައިވަނީ، ދާންދޫ ދާއިރާއަކީ ދަތުރުފަތުރު ކުރުމުގައި ޒަމާނުއްސުރެ އެންމެ ދަތި ހާލަތެއް ތަހައްމަލުކުރަންޖެހޭ އެއް އަތޮޅު ކަމަށްވާ ހުވަދު އަތޮޅަށް ނިސްބަތްވާ ދާއިރާއެއް ކަމަށެވެ.
ޔައުގޫބްގެ ސިޓީގައި ބުނެފައިވަނީ، މިދިޔަ ސަރުކާރުގެ މީހުން ދިރިއުޅޭ ރަށްރަށުން އެއާޕޯޓްތަކަށް ދަތުރުކުރުމުގައި ގެންގުޅުނު ވިއްސަކަށް މިނެޓްގެ ސިޔާސަތުން ދާންދޫ ދާއިރާގެ ރައްޔިތުން މަހުރޫމުވެދާނެކަން މިހާރު ޔަގީންވެފައިވާ ކަމަށެވެ. އެއީ ގއ. ވިލިނގިލީގައި އެއާޕޯޓެއް ތަރައްގީކުރުމުގެ މަސައްކަތް ފެށުމަށް ވާންޖެހޭ ތައްޔާރީތައް ވުމަށް އެއްބަސްވުންތަކުގައި ސޮއިކޮށްފައިވާތީކަން ފާހަގަކޮށްފައިވެއެވެ. ޔައުގޫބް ބުނެފައިވަނީ، ވިލިނގިލީ އެއާޕޯޓްގެ ނަތީޖާއަކީ އޭގެފަހުން ކޫއްޑޫ އެއާޕޯޓްގެ އޮޕަރޭޝަންތައް ހުއްޓުން ކަމަށާއި އަދި އެކަމުން ދާންދޫ ދާއިރާގެ ރަށްތަކުން އެއާޕޯޓަށް ކުރަންޖެހޭ ދަތުރުގެ ވަގުތު އިތުރަށް ދިގުލައިގެން ދާނެ ކަމަށެވެ.
ޔައުގޫބް ބުނެފައިވަނީ، 2024 ވަނަ އަހަރުގެ ބަޖެޓްގައި ދާންދޫ ދާއިރާގައި އެއާޕޯޓް އެޅުމަށް ހިމަނާފައިވާނެ ކަމަށާއި، އަދި އެއާޕޯޓް އެޅުމަށް އެންމެ އެކަށޭނަ ތަނަކީ ދާންދޫ އާއި ވޮޑަމުލާއާއި ދެމެދު ފަޅުތެރެއިން ބައެއް ހިއްކައިގެން އެ ސަރަހައްދުގައިކަމަށްވެސް ބުނެފައިވެއެވެ.
އެހެންކަމުން އެއާޕޯޓް ތަރައްގީކުރާ ރަށްތަކުގެ ލިސްޓަށް ދާންދޫ ދާއިރާ އިތުރުކޮށް އެލިސްޓް އަލުން އިއުލާނު ކޮށްދިނުމަށް ޔައުގޫބްވަނީ އެދިފައެވެ.
Dhaandhoo dhaairaage gina rayyithunge faraathun @MMuizzu ah🙏🙏🙏 pic.twitter.com/wIFvIgG549
— Yaugoob Abdulla (@Yaugoob181) March 30, 2024
ޓޫރިޒަމާބެހޭ ޤާނޫނުގެ ދަށުން ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިޤްތިސާދީ ސިޔާސަތެއްގެ ދަށުން ނުވަތަ އިޖުތިމާއީ ސިޔާސަތެއްގެ ދަށުން ހިންގުމަށް ސަރުކާރުން ކަނޑައަޅާ މުހިންމު މަޝްރޫއުތަކާއި، އެ މަޝްރޫއު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދު ރައީސްގެ ޤަރާރަކުން ކަނޑައަޅަންޖެހެއެވެ.
މި ޤަރާރުގައި ވަނީ އަލަށް އެއާޕޯޓް އަޅާނެ ރަށްތައްވެސް ކަނޑައަޅާފައެވެ. އެގޮތުން 9 ސަރަހައްދެއްގައި އެއާޕޯޓް ތަރައްގީ ކުރުމަށް ހިމަނާފައިވާއިރު އެއާޕޯޓްގެ މަސައްކަތް ނުނިމި ހުރި ބައެއް ރަށްތަކުގެ މަޝްރޫއުތައްވެސް މި ޤަރާރުގައި ހިމަނާފައިވެއެވެ.