އިންޑިއާގެ ޓޫރިސްޓުން މިހާރު ރާއްޖެ އައުން ވަރަށް ބޮޑަށް މަދުވެފައިވާތީ އެކަމުގެ ގެއްލުމުގެ އަގު އެއް ބިލިއަން ރުފިޔާއަށް އަރާ ކަމަށް ކުރީގެ ރައީސް އިބްރާހީމް މުޙައްމަދު ސޯލިހު (އިބޫ) ރޭ ވިދާޅުވެއްޖެ އެވެ.
އެމްޑީޕީގެ ފަރާތުން ގަލޮޅު އުތުރާއި ދެކުނަށް ވާދަކުރައްވާ ކެންޑިޑޭޓުންގެ ކެމްޕޭން ޖަލްސާގައި އިބޫ ވިދާޅުވީ އިންޑިއާ އިން އަންނަ ޓޫރިސްޓުން މަދުވީ މި ސަރުކާރުގެ ޚާރިޖީ ސިޔާސަތު ބައްޓަންކޮށްފައި އޮތް ގޮތުން ކަމަށެވެ. އެ މަނިކުފާނު ވިދާޅުވީ މިދިޔަ އަހަރު ފުރަތަމަ ތިން މަސް ދުވަހުގެ ތެރޭގައި އިންޑިއާއިން ގާތްގަނޑަކަށް 53،000 ޓޫރިސްޓުން ރާއްޖެ އައި ކަމަށާއި މިއަހަރުގެ އެ މުއްދަތުގައި އެ އަދަދު ވަރަށް ބޮޑަށް ދަށްވެފައިވާ ކަމަށެވެ.
"އެހެން ނަމަވެސް މި އަހަރުގެ މިތިން މަސް ދުވަހުގެ ތެރޭގައި އެ އަދަދު ވަނީ 33،000 އަށް ދަށްވެފައި، 20،100 އަށް ވުރެ ގިނަ ޓޫރިސްޓުން މަދުވެއްޖެ،" އިބޫ ވިދާޅުވި އެވެ. "މީގެ އިމްޕެކްޓް މީގެ އިގުތިސާދީ ގެއްލުން އަޅުގަނޑުމެންގެ މުޅި ގައުމަށް އެބަކުރޭ."
އެ މަނިކުފާނު ވިދާޅުވީ މީގެ ސަބަބުން މި ތިން މަސް ތެރޭ ހަމައެކަނި ޓޫރިޒަމް ދާއިރާއަށް ލިބުނު ގެއްލުން 58 މިލިއަން ޑޮލަރަށް އަރާ ކަމަށެވެ. އަދި އެ ދާއިރާއާ ގުޅިފައިވާ އެހެން ދާއިރާތަކަށް ލިބުނު ގެއްލުން އެއްކުރުމުން، ގެއްލުމުގެ އަގު ގާތްގަނޑަކަށް 68 މިލިއަން ޑޮލަރަށް ވުރެ އިތުރުވާ ކަމަށާއި އެއީ އެއް ބިލިއަން ރުފިޔާގެ ގެއްލުން ކަމަށް ވެސް ވިދާޅުވިއެވެ.
"ދައުލަތަށް ލިބެމުންދާ އާމްދަނީ މަދުވަމުންދާ ސަބަބުތަކަކީ މިއީ. އިގުތިސާދީ ސިޔާސަތެއް ތަސައްވުރެއް ނެތް،" އިބޫ ވިދާޅުވި އެވެ. "ހަމައެކަނި ޓެކްސްގެ ގޮތުގައި މި ލިބޭ އާމްދަނީ އިތުރުވެގެން މިދަނީ މި ވޭތުވެދިޔަ އަހަރު ޓެކްސްގެ ނިޒާމަށް އަޅުގަނޑުމެންނަށް ގެނެވުނު ބަދަލެއްގެ ސަބަބުން. އިތުރު އެއްވެސް ކަމެއް ނުކުރޭ."
އެ މަނިކުފާނު ވިދާޅުވީ މިކަމާ މެދު ރައްޔިތުން ވިސްނަން ޖެހޭ ކަމަށާއި އެހެން ނޫން ނަމަ އިގުތިސާދީ ހާލަތު ހީނުކުރާ މިންވަރަކަށް ގޯސްވެދާނެ ކަމަށެވެ. އެހެންވެ، ކުރިއަށް އޮތް މަޖިލިސް އިންތިޚާބުގައި އެމްޑީޕީން އަޣުލަބިއްޔަތު ހޯދަން ޖެހޭ ކަމަށް ވެސް ވިދާޅުވިއެވެ.
އިންޑިއާ އަކީ މިދިޔަ އަހަރު ރާއްޖެ އަށް އެންމެ ގިނަ ޓޫރިސްޓުން އައި ގައުމެވެ. އެ ގައުމުން އިއްޔެއާ ހަމައަށް ރާއްޖެ އައިސްފައި ވަނީ 33،336 ޓޫރިސްޓުންނެވެ. އަދި އިންޑިއާ މިހާރު އޮތީ ރާއްޖެ އަށް އެންމެ ގިނަ ޓޫރިސްޓުން އަންނަ 10 ގައިމުގެ 6 ވަނައިގަ އެވެ.