ބަނގުރަލާއި އޫރުމަހުގެ ބާވަތްތައް ހުންނަ ސަފާރީތަކުގައި ޓްރެކިން ޑިވައިސް ހަރުކުރަން މަޖުބޫރުވާ ގޮތަށް ގަވާއިދު އިސްލާކޮށް، އެ އަށް އަމަލު ކުރަން ފަށާފައިވާ ކަމަށް މޯލްޑިވްސް ކަސްޓަމްސް އިން ބުނެފި އެވެ.
ކަސްޓަމްސް އިން އިއްޔެ ބުނީ، އެ އިދާރާގެ ކޮންޓްރޯލްގެ ދަށުން އެއް ތަނުން އަނެއް ތަނަށް ގެންދާ މުދަލާއި ކަސްޓަމްސްގެ ކޮންޓްރޯލްގެ ދަށުގައިވާ އުޅަނދުފަހަރު އުޅަނދު މޮނިޓާކޮށް ބެލެހެއްޓުމުގެ އުސޫލެއް 2018 ވަނަ އަހަރު އެކުލަވާލައި އަމަލު ކުރަން ފަށާފައިވާ ކަމަށެވެ. އަދި މިދިޔަ މަހުގެ 29 ގައި ގެނައި އެ އިސްލާހަށް އަމަލު ކުރަން ފެށީ މި މަހުގެ 15 ގައި ކަމަށް ބުންޏެވެ.
އުސޫލަށް ފުރަތަމަ އަމަލު ކުރަން ފެށި އިރު، ޓްރެކިން ޑިވައިސް ހަރުކޮށް، ކަސްޓަމްސް އިން މޮނިޓާ ކުރަމުން ގެންދަނީ ރަސްމީ ބަނދަރު ފިޔަވައި އެހެން ތަންތަނަށް ދިއުމަށް ހުއްދަ ދޭ އުޅަނދު ފަހަރުތަކާއި ކަސްޓަމްސް އިން ދޫކުރާ ބަނގުރަލާއި އޫރުމަސް ގެންދަން ޖެހޭ ތަންތަނަށް ގެންދިއުމަށްޓަކައި އެ ތަކެތި އުފުލާ އުޅަނދުފަހަ އެކަންޏެވެ.
އަލަށް ގެނައި އިސްލާހުގެ ދަށުން އިތުރު އުޅަނދުތަކެއް ވެސް ޓްރެކިން ޑިވައިސް ހަރުކުރަން ޖެހޭ ކަމަށް ކަސްޓަމްސް އިން ބުންޏެވެ.
އޭގެ ތެރޭގައި ހިމެނެނީ:
1. ބަނގުރަލާއި އޫރުމަހުގެ ބާވަތްތައް ހުންނަ ސަފާރީތައް
2. ސޭފް އެންކަރޭޖްގެ ދަށުން ލޯކަލް ބަނދަރެއްގައި ބޭއްވުމަށް ހުއްދަ ދޭ އުޅަނދުތައް
3. ކަސްޓަމްސްގެ ކޮންޓްރޯލްގެ ދަށުގައި އޮންނަ އުޅަނދުފަހަރަށް ތަކެތި ހިފައިގެންދާ ލޯކަލް އުޅަނދު ފަހަރު
ކަސްޓަމްސް އިން ބުނީ އުސޫލާ ހިލާފުވާ ފަރާތްތަކަށް ކަސްޓަމްސް އިން ދޭ ހިދުމަތްތައް މެދުކަނޑާލައި ފިޔަވަޅު އަޅާނެ ކަމަށެވެ. އަދި ޑިވައިސް ހަރުކުރަން މަޖުބޫރުވާ އުޅަނދުތަކުގެ ހަރަކާތްތައް އެ އިދާރާ އިން މޮނިޓަ ކުރަމުން ގެންދާނެ ކަމަށް ވެސް ބުންޏެވެ.