އެމްޑީޕީއިން ޤައުމު ވައްޓާލި އަނދަވަޅުން ނަގައި ހަމަމަގަށް އެޅުވުމަށް، ރައީސް ޑރ. މުހައްމަދު މުއިއްޒު ރެޔާ ދުވާލު ބުރަ މަސައްކަތްޕުޅުތަކެއް ކުރައްވަމުން ގެންދަވާކަމަށް ނައިބުރައީސް ހުސައިން މުހައްމަދު ލަތީފް ވިދާޅުވެއްޖެއެވެ.
ނައިބުރައީސް ހުސައިން އިއްޔެ ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ، ޕީޕީއެމް ޕީއެންސީގެ މިހާރުގެ ލީޑަރަކީ ރައީސް މުއިއްޒު ކަމަށެވެ. ޕީޕީއެމް ޕީއެންސީގެ ލީޑަޝިޕް އޮތީ ރައީސް މުއިއްޒުއާއެކު، ރައްޔިތުން ބޭނުންވާ ތަރައްޤީ މި ޤައުމަށް ހޯދައިދިނުމަށް ފިސާރި ސާބިތުކަންމަތީގައި ކަމަށްވެސް ނައިބުރައީސް ވިދާޅުވިއެވެ.
ނައިބުރައީސް ހުސައިން ވިދާޅުވީ ރައީސް ގެންދަވަނީ އެމްޑީޕީއިން މި ޤައުމު ވައްޓާލި އަނދަވަޅުން ޤައުމު ނަގައި ހަމަމަގަށް އެޅުވުމަށް ރެޔާ ދުވާލު ބުރަ މަސައްކަތްޕުޅުތަކެއް ކުރައްވަމުން ކަމަށެވެ.
"ހިކުމަތާއެކު ކުރައްވަމުން އެ ގެންދަވާ ބުރަ މަސައްކަތްޕުޅުގެ ފޮނި ނަތީޖާ ދިވެހި ރައްޔިތުންނަށް މިހާރުވެސް ދަނީ ފެންނަމުން." ނައިބުރައިސް ހުސައިން ވިދާޅުވިއެވެ.
ރައީސް އެ ގެންދަވަނީ އެމްޑީޕީ އިން މި ޤައުމު ވައްޓާލި އަނދަވަޅުން ޤައުމު ނަގައި ހަމަމަގަށް އެޅުވުމަށް ރެޔާ ދުވާލު ބުރަ މަސައްކަތްޕުޅުތަކެއް ކުރައްވަމުން. ހިކުމަތާއެކު ކުރައްވަމުން އެ ގެންދަވާ ބުރަ މަސައްކަތްޕުޅުގެ ފޮނި ނަތީޖާ ދިވެހި ރައްޔިތުންނަށް މިހާރުވެސް ދަނީ ފެންނަމުން.
— Hussain Mohamed Latheef (@HucenSembe) March 30, 2024
ކުރީގެ ރައީސް ޔާމީން ގެންދަވަނީ މިހާރު ރައީސް މުއިއްޒަށާއި ސަރުކާރަށް ވަރަށް ބޮޑަށް ފާޑު ވިދާޅުވަމުންނެވެ. އަދި އެ މަނިކުފާނު ވަނީ ޕީޕީއެމް ދޫކޮށްލައްވައި ޕީޕަލްސް ނެޝަނަލް ފްރޮންޓް (ފީއެންއެފް) ގެ ނަމުގައި ޕާޓީއެއް އުފެއްދެވުމަށް މަސައްކަތް ކުރައްވަމުންނެވެ.
ރައީސް ޔާމީނަށް ތާއީދުކުރާ ފަރާތްތަކުން ސަރުކާރަށް ކިޔަމުންދާ ފާޑުކިޔުންތަކަށް، ސަރުކާރުގެ އެކި މަގާމުތަކުގައި ތިއްބެވި ރައީސް މުއިއްޒުއަށް ތާއީދުކުރައްވާ ފަރާތްތަކުން ދަނީ ރައްދު ދެމުންނެވެ.