މާލެ އާއި ހުޅުމާލެ ގުޅުވާފައިވާ ސިނަމާލެ ބްރިޖް މަރާމާތު ކުރުމުގެ މަސައްކަތް އިއްޔެ ފަށައިފި އެވެ.
އެ މަސައްކަތް ކޮންސްޓްރަކްޝަން މިނިސްޓްރީން ހަވާލުކޮށްފައި ވަނީ ބްރިޖް އެޅި ޗައިނާ ކޮމިއުނިކޭޝަންސް ކޮންސްޓްރަކްޝަން ކޮމްޕެނީ (ސީސީސީސީ) ސެކަންޑް ހާބަ އިންޖިނިއަރިން ކޮމްޕެނީން ފަށައިފިއެވެ.
އެ މަސައްކަތް އެ ކުންފުންޏާ ހަވާލުކުތީ މި މަހުގެ 20 ގަ އެވެ.
ސިނަމާލެ ބްރިޖް މަރާމާތު ކުރުމުގެ އެއްބަސްވުމުގެ މިހާރު ދިމާވެފައި ހުރި މަރާމާތުތައް ދެނެގަނެ ހައްލުކުރުމާއި، މެއިންޓެނަންސް މަސައްކަތުގެ ރެކޯޑު ބަލަހައްޓާނެ ނިޒާމެއް ހެދުމާއި، ޕްރިވެންޓިވް މެއިންޓެނަންސް އަދި މައްސަލަތައް ދެނެގަތުމާއި ގުޅޭ އެސެސްމަންޓް ހެދުން ވެސް ހިމެނެ އެވެ.
މީގެ އިތުރުން، ބްރިޖްހެ މެއިންޓެނަންސް މަސައްކަތަށް ދިވެހި ޓެކްނީޝަނުންގެ ގާބިލުކަން އުފެއްދުމުގެ ދަށުން، އެއްބަސްވުމުގެ މުއްދަތު ނިމުމުން މެއިންޓެނަންސް މަސައްކަތާ ހަވާލުވެވޭނެ ފެންވަރަށް ދިވެހިން ބިނާކޮށް ޓީމުގެ ބެލުމުގެ ދަށުން މެއިންޓެނެންސް މަސައްކަތް ކުރުމަށް ވެސް ހަމަޖެހިފައިވެ އެވެ. މި މަސައްކަތަށް ދިވެހިން ތަމްރީން ކުރަނީ ބްރިޖް އިންޖިނިއަރިން، ރޯޑް އިންޖިނިއަރިން، އިލެކްޓްރޯލް މެކޭނިކަލް، ޓްރެފިކް ސޭފްޓީ، ފެސިލިޓީ ލޭންޑްސްކޭޕިން އަދި ބްރިޖް މެއިންޓެނަންސްގެ ދާއިރާތަކުންނެވެ.
އެއްބަސްވުމުގެ ދަށުން ކުރިއަށް ގެންދާ މަސައްކަތްތަކަށް 3.6 މިލިއަން ޑޮލަރު ހަރަދު ވާނެ އެވެ. މިއީ ޗައިނާ ސަރުކާރުން ރާއްޖެއަށް ފޯރުކޮށްދޭ ހިލޭ އެހީއެކެވެ. މި އެއްބަސްވުމުގެ ދަށުން ކޮންމެ މަހަކު ކުރިއަށް ގެންދާ މެއިންޓަނަންސާއި ކޮންމެ ހަ މަހުން ކުރިއަށް ގެންދާ މަސައްކަތް އަދި އަހަރަކު އެއް ފަހަރު ކުރިއަށްގެންދާ މެއިންޓަނަންސް ހިމެނެ އެވެ.