ޔުކްރޭންގެ ޒުވާން އަންހެނަ،ކު ދުބާއީގައި އިސްލާމްވިތާ ހަތަރު ދުވަސް ފަހުން މަރުވެއްޖެ އެވެ.
އުމުރުން 29 އަހަރުގެ ދާރިއާ ކޮތުސަރެންކޯ ނަސާރާ ދީން ދޫކޮށްލައި އިސްލާމް ދީން ގަބޫލުކުރީ މި މަހުގެ 25 ވަނަ ދުވަހު އެވެ. ނަމަވެސް ގިނަ ބަޔަކަށް ހުކުރު ދުވަހު ދާން ޖެހުނީ ދާރިއާގެ ޖަނާޒާއަށް އަލް ގުސައިސް ސިމިޓްރީގެ މިސްކިތަށެވެ. އޭނަ މަރުވީ އިސްލާމް ދީން ގަބޫލުކޮށް، މި ރޯދަ މަހު ރޯދަ ވެސް ހިފަމުން ދަނިކޮށެވެ. ދާރިއާ ކުއްލި ގޮތަކަށް މަރުވި އިރު ވެސް ހުރީ ރޯދަ އަށެވެ.
އޭނަ މަރުވީ ހާޓްއެޓޭކެއް ޖެހިގެން ކަމަށް ޑޮކްޓަރުންނާ ހަވާލާދީ މީޑިއާތަކުން ބުންޏެވެ.
ޓޫރިސްޓެއްގެ ގޮތުގައި ދާރިއާ އެންމެ ފުރަތަމަ ދުބާއީ އަށް ދިޔައީ މީގެ ތިން އަހަރު ކުރިންނެވެ. އޭގެ ފަހުން އޭނަ ގެންދިޔައީ އިސްލާމް ދީނަށް ވަރަށް ބޮޑަށް ޝައުގުވެރިކަން ފާޅުކުރަމުންނެވެ.
އޭނަ ދަންނަ ދުބާއީގެ އިމާމެއް ކަމަށްވާ އަދި ސޯޝަލް މީޑިއާ ކޮންޓެންޓް ކްރިއޭޓަރެއް ކަމަށްވާ ފާރިސް އަލް ހައްމާދީ ވިދާޅުވި ގޮތުގައި ދާރިއާ އިސްލާމްވުމުގެ ކުރިން އެ ދީނާ ބެހޭ ގޮތުން ވަރަށް ގިނަ ސުވާލުތައް އަހައި، ދީނާ ގުޅޭ މުހިއްމު ގިނަ މައުލޫމާތުތަކެއް ހޯދި އެވެ. އަދި އޭނަ ފާހަގަ ކުރެވުނީ ދީނަށް ވަރަށް ބޮޑަށް ލޯބި ޖެހުނު މީހެއް ގޮތަކަށް އިމާމު ވިދާޅުވި އެވެ.
"އިސްލާމް ދީނަށް ވަނުމުގެ ކުރިން ވެސް ދާރިއާ އަކީ ވަރަށް ވަރަށް އަހުލާގު ރަނގަޅުކޮށް، މީހުންނާ ވަރަށް ގުޅޭ ހިތްހެޔޮ މީހެއް." އިމާމު ވިދާޅުވި އެވެ.
އެގޮތުން އޭނަގެ ހެދުން އަޅަމުން އައީ ވެސް އިސްލާމީ މިންގަނޑުތަކާ އެއްގޮތަށް ކަމަށާއި ހުޅަނގުގެ ލައިފްސްޓައިލާ ދާރިއާ ވަރަށް ދުރުކަން ފާހަގަ ކުރެވުނު ކަމަށް އިމާމު ފާރިސް ވިދާޅުވި އެވެ.
ދާރިއާގެ ކުއްލި މަރާ ގުޅިގެން އޭނަގެ ގާތް މީހުންނާއި ދަންނަ މީހުންނަށް ވެސް ވަނީ ފުން ހިތާމައެއް ލިބިފަ އެވެ. ހުކުރު ދުވަހު ދުބާއީގައި އޮތް އޭނަގެ ޖަނާޒާގައި ދާރިއާ ދަންނަ ވަރަށް ގިނަ ބަޔަކު ބައިވެރިވި އެެވެ.