ކޮށްއުޅޭ މަސައްކަތުގެ ބާވަތުން ފަރަންޖީންނާއި މުއާމަލާތު ކުރަންޖެހެއެވެ. ރަހުމަތްތެރިކަން ބާއްވަންޖެހެއެވެ. މިފަދަ ބައެއް
ފަރަންޖީން ގާދޫކޮލުން މިކޮޅަށް އަރައިފިއްޔާ ވާހަކަދައްކާލައި ހީސަމާސާކޮށްލަން ކޮފީ މޭޒުދޮށުން ބައްދަލުކުރަންވެސް ޖެހެއެވެ.
މިގޮތަށް ވާހަކަދައްކާ ދެއްކުމުގައި އެތެރެއާއި ބޭރުގައި އެދުވަސްވަރެއްގައި ހިނގާ އެންމެ ބޮޑެތި ކަންތައްތަކާއި މެދު ޚިޔާލު ބަދަލުކުރުން ވެސް އޮވެއެވެ.
ރޮއިޓަސްގައި ދާދި ފަހަކާ ޖެހެންދެން މަސައްކަތްކުރި ދޮން ފަރަންޖީއަކު ހުސްވި ހަފުތާ ތެރޭގައި މާލެ އަރައިފިއެވެ. މީނާ މާލޭގައި ދެކޮޅަކަށް ހިނގާލާފައި އަހުރެންގެ މަތިން ހަނދާންވެގެން އީމޭލެއް ފޮނުވައި ބައްދަލުކުރަން އެދިގެންފިއެވެ. މީނާ ހުރިހިސާބަކަށް ގޮސް މީނާ ނަގައިގެން ދިޔައީ މަޖިލީސް ކައިރީގައި ހުންނަ ކެފޭ އަކަށެވެ. އެތަނުގައި ތިބެ ކޮފީ ބޮއެބޮއެފައި ދުންފަތުން ދުން އަރުވަ އަރުވައިފައި ދެވެރިން ދެއްކި ވާހަކައިގެ ތެރެއަށް ރާއްޖޭގެ ސިޔާސީ މަސްރަހު ވެސް ވަދެއްޖެއެވެ.
މީނާ ސުވާލުކުރެއެވެ. އަޅެ ދެން ވާނީ ކޮންގޮތެއްބާވައެވެ. އަހުރެން ބުނީމެވެ. ލަފާކުރާކަށް ވެސް ނޭގެއެވެ. އެއީ ކީއްވެގެންހޭ އެހީމާ ބުނެފީމެވެ. މިމީހުންގެ ވިސްނުމާއި ރޭވުން ހުންނަގޮތުން ވާގޮތަކީއެވެ.
ދޭކާއި ދޭކާއި އެއްކުރީމާ ހަތަރެއް ވާނަމަ ލަފާކުރަން ފަސޭހަ ވެއްޖައީހެވެ. އެކަމަކު ބައެއްފަހަރަށް ތިނެކެވެ. އަނެއްބައި ފަހަރު ފެންނަނީ ފަހެކެވެ. މީނާ ހިނިގަނޑެއް ޖަހާލާފައި ބުނެފިއެވެ. ތީގައި އޮތީ ދެގޮތެކެވެ. އެއްގޮތަކީ އަހުރެމެން އިންސާނުންގެ ސިކުނޑިއަށް ވިސްނައިގަންނަން ފަސޭހަވަރަށް ވުރެ ތިޔަމީހުންގެ ސިކުނޑި ތަނަވަސްވެފައި ރޭވުންތައް މޮޅީއެވެ. އަނެއްގޮތަކީ ހަމައިގައި ތިބޭ ބަޔަކު ހަމަވިސްނުމަކުން ވިސްނީމާ ނަގައިގަނެވޭވަރަށް ވުރެ ތިޔަމީހުންގެ ގަޅިކަން ބޮޑީއެވެ. ތަސައްރަފް ނުފުދުން ބޮޑީއެވެ.
އަހުރެން އަހައިފީމެވެ. އަޅެ ބެއިފުޅާއެވެ. ދުނިޔޭގެ ހުރިހާ ޑިކްޓޭޓަރުންގެ ސިކުނޑި މަސައްކަތްކުރަނީ އެއްގޮތަކަށް ކަމުގައި މުފައްކިރުން ލިޔުއްވައެވެ. އެހެންވީމާ މިތަނުގެ ވެރިމީހާވެސް ވިސްނަވާނީ މި އުސޫލުން ނޫންކަމަށް ގަބޫލުކުރަނީ ހެއްޔެވެ. މީނާ ވަރަށް ސީރިއަސްވެފައި ބުނެފިއެވެ. ޔާމީނަކީ ޑިކްޓޭޓަރެއް ނޫނެވެ. އާނއެކެވެ.
ޔާމީނަކީ ޑިކްޓޭޓަރެއް ނޫނެވެ. އެހެނެއް ނޫނެވެ. ޔާމީނުގެ ބޭބެ މައުމޫނަކީ ފައްކާ ޑިކްޓޭޓަރެކެވެ. އެހެންވީމާ ޑިކްޓޭޓަރުން ވިސްނަވާ ގޮތަށް ޔާމީނު ނުވިސްނަވާނެއެވެ. ވަރަށް ހައިރާންވެގެން ހުރެ އަހުރެން އަހައިފީމެވެ. ތިޔައީ ކޮންކަހަލަ ތަރާދަކުން މިނެކިރައިގެން ނެރުނު ހުކުމެއް ބާވައެވެ.
މީނާ ބުނެފިއެވެ. އިންޑޮނީޝިއާގެ ސުހާޓޯ އާއި ރުމޭނިޔާގެ ނިކޮލާއީ ޗައުސެސްކޫ އާއި ޔޫގޯސްލާވިޔާގެ ޖޮސެޕް ޓީޓޯ ފަދަ ޑިކްޓޭޓަރުންގެ ފަތިފުށް ކަލޭވެސް ދަންނާނޫއެވެ. އެއީ ވަރަށް ގިރިޓީކަން ބޮޑު ޑިކްޓޭޓަރުންނެވެ. ކުޅަދާނަ ޑިކްޓޭޓަރުންނަކީ ކުރާކޮންމެ ކަމަކުން އޮފުއަރުވައި ދަޅަދައްކައި ފަރުދާގެ ކުރިމަތިން ފެންނަ މަންޒަރުތައް ރީތިކުރުމަށް ވަރަށް އިސްކަންދޭ ބައެކެވެ. މައުމޫނަކީ އެފަދަ މީހެކެވެ.
މައުމޫނުގެ ކުރިމަތިންވެސް ފުރަގަހުންވެސް އަދި ދެ އަރިމަތިންވެސް ފެންނާނީ ބަލާހިތްވާ ޒާތުގެ ރީތި މަންޒަރުތަކެވެ. ދޫފުޅުން އޮހޭނީ ފިނިފެންމަލުގެ ފިޔަތަކެއް ފަދަ ވަސްމީރު ބަސްތަކެކެވެ. މަތި އޮމާންކުރުން އިންތިހާއެވެ. އަރިހުގައި ތިބޭނީވެސް ފަށުވި ލިބާސްލައިފައި ތިބޭ މީހުންނެވެ. ޑިކްޓޭޓަރޭ ބުނެވޭ ބަހުގެ މުރާދަކީ މިސިފަތައް ލިބިގެން ހުރެ ތިމާ ބޭނުންވާ ޒާތަށް ވެރިކަން ހިންގާ މީހާއެވެ.
އަހުރެން އަހައިފީމެވެ. ދެނޯ ދެނޯއެވެ. ތިޔަ ބުނި ސިފަތައް ޔާމީނުގެ ކިބައިގައި ނެތީ ބާވައެވެ. މީނާ ބުނެފިއެވެ. ތީގެ ޖަވާބު އެނގޭނީ ކަލެއަށެވެ. އެހެންޏާ ފަހެ މިތާގައި ތިޔަ އުޅެނީ ކަލެއެވެ. މަންޒަރު ތިޔަ ފެންނަނީ ކަލެއަށެވެ. މަގޭ އަނގަ ކޮންމެހެން ގޮއްވަން ހަދާނެ ކަމެއް ނެތެވެ. އެކަމަކު ކަލެއަށް ވިސްނޭވަރަށް ބުނެފާނަމެވެ. މިބުނި ކަހަލަ ދަޅައެޅުމެއް ޔާމީނުގެ ފަރާތުން ނުފެނޭ ދޮތައެވެ. އާނއެކެވެ. ނުފެނެއެވެ.
ނުވެސްފެންނާނެއެވެ. އިނގިލީގެ ނިޝާން ދައްކަވާނެއެވެ. ބޯދިގުކޮށްފައި މޫނު ނިވާކޮށްގެން ތިބޭ މީހުން އަރިހުގައި އެނބުރެނިކޮށް ފެންނާނެއެވެ.
ބަސްވިދާޅުވުމުގައި ގިރިޓީ ކުރުމެއް ނުހުންނާނެއެވެ. ކަންތައް ކުރައްވާނީ ފާޅުކަންބޮޑު ގޮތެއްގައި ހިތަށް އެރި ގޮތަކަށެވެ. އެއީ ޑިކްޓޭޓަރުންގެ ސިފައެއް ނޫނެވެ. އެހެންވީމާ ޑިކްޓޭޓަރަކަށް ނުވާ މީހަަކު ޑިކްޓޭޓަރަކަށް ހަދައިގެން ކުޅަދާނަ މޮޅު ޑިކްޓޭޓަރުންނަށް މަލާމާތް ކުރުމުގެ ބޭނުމެއް ނެތެވެ.
އަހުރެން ބުނެފީމެވެ. ތިބާއީ އަދި ސިކުނޑިއަށް ވެރިވި ޚިޔާލެއް ނޫނެވެ.
މީނާ ބުންޏެވެ. ހައިރާންވެއެވެ. އެމެރިކާގެ އަލްކަޕޯނޭ އާއި ކޮލަމްބިއާގެ އެސްކޮބާރު ވެސް ޑިކްޓޭޓަރުންކަމުގައި ހަދައިފަތެވެ. ދެންވެސް މީސްމީހުން ތަރުތީބުކުރާއިރު އެމީހަކު ލާންޖެހޭ ގިންތިއަކަށް ލުމުގައި ފަރުވާ ބައްޓައްޗެވެ. އެހެންނޫނީ އެކަންވާނީ ބަޔަކަށް ކުރެވޭ މަލާމާތަކަށެވެ.