ކުރީގެ ރައީސް އަބްދުﷲ ޔާމީން ޕީޕީއެމް ޕީއެންސީގެ މެންބަރުން މަގުމަތިކުރަން އުޅުނު ވާހަކަ ދައްކަނީ، ކަންހިނގާދިޔަގޮތް ރައްޔިތުންނަށް އޮޅުންފިލުވައި ދިނުމަށް ކަމަށް ރައީސުލްޖުމްހޫރިއްޔާގެ ސްޕެޝަލް އެޑްވައިޒަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ރިޔާސީ އިންތިހާބުގެ ތެރޭގައި ޕީޕީއެމްއާ ގުޅުންހުރި ބައެއް ހަބަރުތަކުގެ ފޮޓޯއާއެކު ސޯޝަލްމީޑިއާގައި އަބްދުއްރަހީމް ވިދާޅުވީ، ރައީސް ޑރ. މުހައްމަދު މުއިއްޒު ރިޔާސީ އިންތިޚާބުގައި ވާދަ ކުރަށްވަން އީސީއަށް ފޯމު ހުށަހެޅުއްވީ 7 އޯގަސްޓް 2023 ގައި ކަމަށެވެ.
ރައީސް ޔާމީން ސޮއިކޮށް، އެ މަނިކުފާނުގެ ގާނޫނީ ޓީމު ފޮނުއްވައިގެން އިސް ވަކީލު 2 ޕާޓީގެ ސެނެޓަށް އިއްވެވި ނޯޓަކުން އިންތިޚާބް ބޮއިކަޓް ކުރަން އެންގެވީ 6 އޯގަސްޓް ގައި ކަމަށާއި، ރައީސް ޔާމީނަށް ރިޔާސީ އިންތިޚާބުގައި ވާދަ ނުކުރެވޭނެކަމަށް ސްޕްރީމް ކޯޓުން ހުކުމް ކުރީވެސް 6 އޯގަސްޓް ގައިކަން އަބްދުއްރަހީމް ފާހަގަކުރެއްވިއެވެ.
"ޕީއެންސީ އިން ރިޔާސީ ކެނޑިޑޭޓަކު ދައްކަން އެންގެވި އެންގެވުމަކީ އިޚްލާޞްތެރި ނިޔަތެއް އޮވެގެން އެންގެވި އެންގެވުމެއް ނަމަ ސްޕްރީމް ކޯޓްގެ ޙުކުމާ ގުޅިގެން ޕީޕީއެމް/ޕީއެންސީ އިން ރިޔާސީ އިންތިޚާބް ބޮއިކަޓްކުރަން އެންގެވުމުގެ ބޭނުމަކީ ކޮބައިތޯ؟ ޕީޕީއެމް އަށް ދިރުން ލިބެން ބޭނުންވި ނަމަ ވަގުތު އޮއްވާ ޕީޕީއެމް އިން ރިޔާސީ ކެނޑިޑޭޓަކު ދައްކަން އިރުޝާދު ނުދެއްވީ ކީއްވެގެންތޯ؟" އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ މަގުމަތިކުރަން އުޅުނު ވާހަކަ ދައްކަނީ ރައްޔިތުންނަށް ކަން ހިނގައި ދިޔަގޮތް އޮޅުން ފިލުވައި ދިނުމަށްޓަކައި ކަމަށެވެ. އަދި ހަގީގަތްތައް ހުރީވެސް މިގޮތަށް ކަމަށެވެ.
ރައީސް ޔާމީނަށް ތާއިދުކުރާ ފަރާތްތަކާ ރައީސް މުއިއްޒުއަށް ތާއިދުކުރާ ފަރާތްތަކުގެ މެދުގައި ބަހުގެ ހަމަލާތައް ބަދަލުކުރެވެމުންދާއިރު، ފާޑުކިޔުންވެސް ވަނީ ވަރަށް ބޮޑަށް އިތުރުވެފައެވެ.