އާސަންދަ ސްކީމުގެ ދަށުން 35 އަހަރުން މަތީގެ ފަރާތްތަކަށް މެޑިކަލް ޗެކަޕް ޕެކޭޖް ތައާރަފްކޮށް، 18 އަހަރުން ދަށުގެ އުމުރުފުރައަށް ހާއްސަ ސްކޫލް ސްކްރީނިން ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމު ހަމަޖައްސައިފިއެވެ.
ކޮންމެ ރައްޔިތަކަށް އާސަންދަ ސްކީމުގެ ދަށުން އަހަރަކު 2 ފަހަރު މެޑިކަލް ޗެކަޕް ހެދުމުގެ މަގުފަހިކޮށްދިނުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ.
އާސަންދައިން މިއަދު ބުނެފައިވަނީ، މިއަދުން ފެށިގެން އުމުރުން 35 އަހަރުން މަތީ ތްތަކަސް މެޑިކަލް ޗެކަޕް ހެދުމަށް ބޭނުންވާ ޕެކޭޖް ތައީރަފްކޮށް އަދި މީގެއިތުރުން އެޑިއުކޭޝަން މިނިސްޓްރީން ކަނޑައަޅާފައިވާ ގްރޭޑްތަކުގެ ސްކޫލް ދަރިވަރުން ހަދަން ޖެހޭ ހާއްސަ ޓެސްޓްތައްވެސް ސަރުކާރުގެ ހޮސްޕިޓަލްތައް މެދުވެރިކޮށް ހެދޭނެ އިންތިޒާމު އާސަންދަ ކުންފުނިން ހަމަޖައްސާފައިވާ ކަމަށެވެ.
އާސަންދައިން ބުނެފައިވަނީ 19 އަހަރުން މަތީގެ އުމުރުފުރާތަކަށް ހާއްސަ ކޮށްފައިވާ އަސާސީ ޕެކޭޖްތަކަށް ބަދަލުގެނެސްފައިވާ ކަމަށެވެ.
މީގެއިތުރުން 40 އަހަރުން މަތީގެ ފަރާތްތަކަށް ހާއްސަކޮށް ދުރާލާ ކެންސަރު ބަލި ދެނެގަތުމަށް ހަދަންޖެހޭ ޓެސްޓްތައް އެކުލެވޭ ޕެކޭޖެއްވެސް މިއަދު އިތުރުކޮށްފައިވެއެވެ. އާސަންދައިން ބުނެފައިވަނީ ކެންސަރު ސްކްރީނިންގެ ތެސްޓްތަކުގެ ތެރެއިން ވަކި މުއްދަތެއްގެ ތެރޭގައި ކަނޑައަޅާފައިވާ ޓެސްޓުތައް ފިޔަވާ، އެހެން ތެސްޓްތައް ސްކީމްގެ ތެރެއިން އަހަރަކު އެއްފަހަރު ހެދޭނެ ކަމަށެވެ. އަދި ވަކި މުއްދަތެއްގެ ތެރޭގައި ހެދުމަށް ކަނޑައަޅާފައިވާ ތެސްޓުތައްވެސް ޑޮކްޓަރު ލަފާދެއްވައިފިނަމަ ސްކީމުގެ ތެރެއިން ހެދޭނެ ކަމަށެވެ.