ކުރިއަށް އޮތް ފިތުރު އީދަަށް ހުރިހާ ސިޓީތަކާއި އަތޮޅު ކައުންސިލް ޤާއިމުވެފައިވާ ރަށްތަށް ޒީނަތްތެރި ކުރާނެ ކަމަށް ސިޓީތަކާއި އިދާރީ ދާއިރާތަކާ ބެހޭ މިނިސްޓަރު އާދަމް ޝަރީފު ވިދާޅުވި އެވެ.
މިނިސްޓަރު ވިދާޅުވީ އެކަމަށް ބޭނުންވާ ސާމާނު ވެސް މިހާރު ފޮނުވާފައިވާ ކަމަށެވެ.
އާދަމް ޝަރީފް ވިދާޅުވީ ރައީސް ޑރ. މުހައްމަދު މުއިއްޒު ނިންމަވާފައިވާ ގޮތަށް، ސިޓީތަކާއި އަތޮޅު ކައުންސިލް އިދާރާ ހުންނަ ރަށްތައް އީދަށް ކުލަބޮކިތަކުން ޒީނަތްތެރި ކުރެވޭނެ ކަމަށެވެ. އެގޮތުން އިސްލާމީވަންތަކަން ދައްކައިދޭ ބޮކިތަކާއި ތަކުބީރުގެ އަޑުން ރައްޔިތުންނަށް ދިރުން ލިބިގެންދާނެ ކަމަށް ވެސް ވިދާޅުވި އެވެ.
މިނިސްޓަރު ވިދާޅުވި ގޮތުގައި މިކަމުގެ ބޭނުމަކީ އިސްލާމީވަންތަ ރީތި ސިފަތަކުން އީދު ފާހަގަކުރުމުގެ ފުރުޞަތު ރާއްޖޭގެ ހުރިހާ ކަންކޮޅުތަކަށް ފަހިކޮށް ދިނުމެވެ.
ކަލަންޑަރުގައިވާ ގޮތުން ފިޠުރު ޢީދު ދުވަހަކަށް ވާނީ މި މަހުގެ 10 އެވެ.