ޗައިނާގެ ޝޯމީ ކުންފުނީގެ އިލެކްޓްރިކް ވެހިކަލް (އީވީ) ފުރަތަމަ ގަތް މީހުންނަށް ކާރުތައް ޑެލިވަކޮށް ދޭން އަދި ހަ މަަސް ނަގާނެ ކަމަށް އަންގާފައިވާ ކަމަށް ބުނެފި އެވެ.
ޝޯމީގެ "އެސްޔޫ7" ގަތް މީހުން ބައެއް މީހުން މީޑިއާތަކަށް ބުނީ އެ މީހުންނާ ހަމައަށް ކާރު އަންނަން އަދި ހަ މަސް ނަގާނެ ކަމަށް އަންގާފައިވާ ކަމަށެވެ. ނަމަވެސް މިކަމާ ބެހޭ ގޮތުން ޝޯމީން އަދި ރަސްމީކޮށް ވަކި އެއްޗެއް ނުބުނެ އެވެ.
އެ ކުންފުނީގެ ފުރަތަމަ އީވީގެ އަގު އިއުލާންކޮށް، މިދިޔަ ބުރާސްފަތި ދުވަހު ޕްރީ-އޯޑަރަށް ވެސް ހުޅުވި އެވެ. އަދި ޕްރީ-އޯޑަރަށް ހުޅުވައިލިތާ 24 ގަޑިއިރު ތެރޭގައި 88،899 ކާރަށް އޯޑަރު ލިބިފައިވާ ކަމަށް ޝޯމީން ބުންޏެވެ. އެ ކުންފުނީގެ "އެސްޔޫ7" ގެ ސްޓޭންޑާޑް މޮޑެލްގެ އަގަކީ 219،900 ޔުއާން (29،872 ޑޮލަރު) އެވެ. އަދި މެކްސް މޮޑެލްގެ އަގަކީ 299،900 ޔުއާން އެވެ.
ޝޯމީގެ އީވީ އަކީ އެންމެ މި ޒަމާނުގެ ފީޗާތަކާ އެކީ އުފައްދާފައިވާ ތިމާވެއްޓާ ވަރަށް ރައްޓެހި ކާރެކެވެ. މި ކާރުގެ ފީޗާތަކާއި ފޯނާއި ލެޕްޓާއި ޓެބްލެޓް ފަދަ ޑިވައިސްތަކުން ވެސް ކުޅެވޭނެ އެވެ.
ޝޯމީން ބުނީ އެ ކުންފުނީގެ އީވީގެ އެންމެ ބޮޑު އަމާޒަކީ މިހާރު ޓެސްލާ އާއި ބައިޑް އަށް ފަދަ ކުންފުނިތަކުގެ އީވީތަކަށް އޮތް ޑިމާންޑް ދަށްކޮށްލައި، އީވީގެ މާކެޓްގެ ކުރިއަށް އެރުން ކަމަށެވެ. މިކަމަށް ހާއްސަކޮށްގެން ޝޯމީން ވަނީ ކުރިއަށް އޮތް 10 އަހަރަށް 10 ބިލިއަން ޑޮލަރު އިންވެސްޓް ކުރަން ވެސް ނިންމައިފަ އެވެ.
އެ ކުންފުނީގެ އީވީ އުފައްދާފައި ވަނީ ސަރުކާރު ހިއްސާވާ ކާރު އުފައްދާ ކުންފުންޏެއް ކަމަށްވާ ބީއޭއައިސީ ގްރޫޕާ ގުޅިގެންނެވެ. އެގޮތުން ބެއިޖިންގައި ގާއިމުކޮށްފައިވާ ޕްލާންޓްގައި މިހާރު އަހަރަކު 200،000 ކާރު އުފެއްދޭނެ އެވެ.
ޝޯމީން އީވީ އުފައްދަން ނިންމައި އެކަމަށް ހާއްސަ ސަބްސިޑަރީ ކުންފުންޏެއް އުފައްދައި އެކަން ރަސްމީކޮށް އިއުލާންކުރީ ސެޕްޓެމްބަރު 1، 2021 ގަ އެވެ. އެ ކުންފުނީގެ ނަމަކީ ޝޯމީ އީވީ ކޮމްޕެނީ ލިމިޓެޑެވެ.