ކުރީގެ ސަރުކާރުން ސަރުކާރުގެ ކުންފުނިތައް ބޭނުންކޮށްފައ ހުރީ ނަހަމަ ގޮތުގައި ސިޔާސީ ބޭނުންތަކަށް ކަމަށާއި އޭގެ ސަބަބުން ވަރަށް ގިނަ ކުންފުނިތައް އޮތީ ބަނގުރޫޓްވުމުގެ މަރުހަލާގައި ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ސަރުކާރުގެ ކުންފުނިތަކުގައި ހުރި ބޮޑެތި ދަރަނިތައް އަދާކުރަން ރޭވިފައިވާ ގޮތާ މެދު އައްޑޫ މީހަކު ކުރި ސުވާލަކާ ގުޅިގެން "ރައީސްގެ ޖަވާބު" ގައި ރައީސް ވިދާޅުވީ އިބްރާހީމް މުހައްމަދު ސޯލިހުގެ ސަރުކާރުން ކުންފުނިތައް ހުރީ ވަރަށް ބޮޑަށް "މިސްޔޫޒްކޮށްފައިވާ" ކަމަށެވެ.
"ކުންފުނިތަކުގައި އޮންނަ އުސޫލުތަކާ ހިލާފަށް ކުންފުނިތަކުގެ ބޭނުން ސިޔާސީ ގޮތުން ކުރުމުގެ ސަބަބުން ކުންފުނިތައް އޮތީ ހަލާކުވުމުގެ ތެރޭގައި،" ރައީސް ވިދާޅުވި އެވެ. "ވަރަށް ގިނަ ކުންފުނިތައް ބަނގުރޫޓްވުމާ ހަމައަށް ގޮސްފައި އޮތީ. ބޮޑެތި ދެތިން ކުންފުންޏެއް ފިޔަވައި ފައިދާވާ އެއްވެސް ކުންފުންޏެއް ނެތް ގޮތަށް އޮތީ."
އެހެންވެ މި ސަރުކާރުން މިހާރު ކުރަމުން އަންނަ ކަމަކީ ކުންފުނިތަކުން ނަގާފައިވާ ލޯންތަކާއި ދަރާފައިވާ ދަރަނިތައް ދެއްކޭބެ ގޮތްތައް ހޯދުން ކަމަށް ރައީސް ވިދާޅުވި އެވެ.
އެގޮތުން އެކިއެކި ބޭންކްތަކާ ވާހަކަ ދައްކައިގެން ކުންފުނިތަކަށް ފައިސާ ލިބޭނެ ރަނގަޅު ގޮތްތަކެއް ހަމަޖެއްސުމަށް މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.