ދުނިޔޭގެ އެންމެ އުސް އިމާރާތް ކަމަށްވާ ބުރުޖް ޙަލީފާ ހުރި ޔޫއީއޭ އިން އަނެއްކާ ވެސް މިފަދަ އާ ރެކޯޑަކާ ދިމާއަށް ދަތުރު ފަށައިފި އެެވެ.
އެގޮތުން ދުބާއީގައި މިހާރު މި ވަނީ އެންމެ އިސް ރެސިޑެންޝަލް ކްލޮކް ޓަވަރު ހަދަން ނިންމައި އެކަން މިދިުަ ހަފުތާގައި ރަސްމީކޮށް އިއުލާންކޮށްފަ އެވެ. ދިރިއުޅޭ އެޕާޓްމަންޓްތަކާ އެކީ އެތައް ވަސީލަތްތަކެއް އެކުލެވޭ ގޮތަށް އިމާރާތްކުރަން ހަމަޖެހިފައިވާ މި ޓަވަރުގެ ނަމަކީ "ދި އެޓާނިޓަސް ޓަވަ" އެވެ. އިމާރާތުގެ އެންމެ މަތީގައި ބޮޑު ގަޑިއެއް ހުންނާނެ މި ޓަވަރުގެ އުސްމިނަކީ 450 މީޓަރު (1،476 ފޫޓް) އެވެ.
މިހާރު އެންމެ އުސް ރެސިޑެންޝަލް ކްލޮކް ޓަވަރުގެ ރެކޯޑް އޮތީ އިނގިރޭސިވިލާތުގެ ލަންޑަންގެ "ބިގް ބެން" އަށެވެ. އޭގެ އުސްމިނަކީ 96 މީޓަރު (316 ފޫޓް) އެވެ. އަދި އެންމެ އުސް ރެސިޑެންޝަލް ޓަވަރުގެ ރެކޯޑް އޮތީ އެމެރިކާގެ ނިއު ޔޯކްގެ "ސެންޓްރަކް ޕާކް ޓަވާ" އަށެވެ. އޭގެ އުސްމިނަކީ 472.4 މީޓަރު (1،550 ފޫޓް) އެވެ.
ދުބާއީގައި ހަދާ ކްލޮކް ޓަވަރު ވާނީ ސައުދީ އަރަބިއްޔާގައި ހުންނަ ދުނިޔޭގައި ހުންނަ އެން އުސް ގަޑި "މައްކާ ރޯޔަލް ކްލޮކް ޓަވާ" ފިޔަވައި ދެވަނަ އަށް އެންމެ އުސް ގަޑި އިމާރާތަށެވެ. އޭގެ އުސްމިނަކީ 601 މީޓަރު (1،972 ފޫޓް) އެވެ.
ދުބާއީގެ ކްލޮކް ޓަވަރު މި އިމާރާތުގެ މަސައްކަތް އެއްކޮށް ނިންމަން ހަމަޖެހިފައި ވަނީ 2027 ގަ އެވެ. ދުބާއީ މެރީނާ ގޭޓް ސަރަޖައްދުގައި މި އިމާރާތް ހަދަނީ ދުބާއީ އަށް ނިސްބަތްވާ ރިއަލް ސްޓޭޓް ޑިވެލޮޕަރެއް ކަމަށްވާ ލަންޑަން ގޭޓާއި ގަޑި އުފައްދާ ސްވިޓްޒަލޭންޑްގެ މަޝްހޫރު ކުންފުންޏެއް ކަމަށްވާ ފްރޭންކް މުލާއާ ދެމެދު ވެފައިވާ އެެއްބަސްވުމެއްގެ ދަށުންނެވެ.
މި ޕްރޮޖެކްޓާ ގުޅޭ ގޮތުން ލަންޑަން ގޭޓްގެ މީޑިއާ ރިލޭޝަންސް ކޯޑިޑޭޓަރު ޓޮމް ހިލް ވިދާޅުވީ އަމާޒަކަށްވެފައި އޮތީ ދުބާއީގައި އާ ކަމެއް ކުރުން ކަމަށެވެ. އެގޮތުން "ދި އެޓާނިޓަސް ޓަވަ" ވާނީ ވަރަށް ތަފާތު ހިތްގައިމު ތަނަކަށް ކަމަށް ވިދާޅުވި އެވެ.
"މިއީ އަނެއްކާ ވެސް ދުބާއީގެ މަލަމައްޗަށް އިތުރު ފުރިހަމަ ކަމެއް ގެނުވައި ދޭނެ އިމާރާތެއް." ޓޮމް ވިދާޅުވި އެވެ.
"ދި އެޓާނިޓަސް ޓަވަ" ގައި 649 އެޕާޓްމަންޓާ އެކީ، އެތަކެއް ވަސީލަތްތަކެއް ހުންނާނެ އެވެ. މި ޓަވަރާ ބެހޭ އިތުރު މައުލޫމާތު މި ސައިޓް www.aeternitaslondongate.com އިން ލިބޭނެ އެވެ.