ދިވެހި ރާއްޖޭގެ އެންމެ ފުރަތަމަ އެއަޕޯޓް ކަމުގައިވާ، ގަން އިންޓަނޭޝަނަލް އެއަރޕޯޓަކީ ޒަމާނުއްސުރެ އައްޑޫގެ ހުރިހާ ރައްޔިތުންގެ ގިނަ އުއްމީދުތަކާ ގުޅިފައިވާ ތަނެކެވެ.
އިނގިރޭސިން ގަމުގައި އުޅުނު އިރު އެމީހުންގެ މިލިޓަރީ ބޭނުމަކަށް ތައްޔާރު ކުރި މިއެއަރޕޯޓަށް، އެމީހުން ފައިބައިގެން ދިޔަތާ 40 ވަރަކަށް އަހަރު ވެގެން ދިޔައިރު ލިބުނު ކުރިއެރުމެއް ނެތޭ ދަންނަވަން ޖެހެ އެވެ. މައުމޫނު އަބްދުލް ޤައްޔޫމުގެ ދިގު 30 އަހަރުގެ ވެރިކަމުގައި ތަނުގެ ތަރައްޤީއަށްޓަކައި ގެންނެވި ކުރިކަމެއް ނެތެވެ.
އެއަޕޯޓް އިންޓަނޭޝަނަލް ކުރިކަމުގެ ނަން ބޯޑު އެޅުވިއެއްކަމަކު، އެކަށީގެންވާ ވަރަކަށް ޚިދުމަތްތަކެއް ނެތެވެ. މޯލްޑިވްސް އެއަޕޯޓްސް ކޮމްޕެނީއިން ތަން ހިންގާފައި ވަނީ "ބޮއްކުރާ އެއަޕޯޓް" [ކުދި ބޯޓްފަހަރަށް ޚާއްސަ އެއާޕޯޓެއް] ގެ ގޮތުގަ އެވެ. އެއްގޮތަކަށް ވެސް ބޭރުގެ ބޮޑެތި ބޯޓުފަހަރު ޖެއްސުމަކަށް ނޭދެ އެވެ.
ރަންވޭގެ ސިމެންތިގަނޑު ބާވެ، ލޯވަޅުތައް ހެދި، ވާރޭ ވެހިއްޖެނަމަ ފެންހަރުލުން ފަދަކަންތަކަށް އައި ބަދަލެއް ނެތެވެ. ބޭރުގެ އެއަރ ލައިންތަކުން ކަންބޮޑުވާހާ ދަރަޖައަށް ރަންވޭގެ ބާރުދަށްވެ، ޖެހިލުންވާން ފެށިއެވެ. ސަލާމަތީ މިންގަނޑުތައް ވެސް ފުރިހަމަ ނުވެއެވެ.
ނަޝީދު ސަރުކާރަށް ފަހު
ކިރިޔާ ވެސް އެއަޕޯޓް ހިނގައިގަންނަން ފެށުނީ، މުޙައްމަދު ނަޝީދުގެ ވަރިކަމުގައި އައްޑޫގައި ބޭއްވުނު ސާކްސަމިޓާއި ދިމާކޮށެވެ. ޓާމިނަލް ސަރަޙައްދުގައި މަތީ ފެންވަރުގެ ޓޫރިސްޓުންނަށް ޚިދުމަތްދޭނެ ޖާގަ ތަނަވަސް ވީއައިޕީ ލައުންޖެއް ހެއްދެވިއެވެ. އަދި ވީއައިޕީ ޖެޓީއެއް ހެއްދެވި އެވެ. މިކަމުގެ ނަފާ ވެސް އެއަރޕޯޓަށް ލިބެން ފެށިއެވެ. ޖައްސަން ފެށި ޖެޓްތަކުގެ ޢަދަދު ވެސް އިތުރުވާން ފެށިއެވެ.
ނަމަވެސް، އަމިއްލަ ޒާތުގައި ދެމެހެއްޓެނިވި ގޮތަކަށް ތަން ހިންގޭ ވަރެއް ނުވިއެވެ.
ނަޝީދު ސަރުކާރުގެ ވިސްނުން ހުރީ ސައްތައިން ސައްތަ ސަރުކާރުގެ ކުންފުންޏެއްގެ ގޮތުގައި އެއަރޕޯޓް ހިންގުމަށްވުރެ ފައިދާ ބޮޑުވާނީ، އަމިއްލަ ފަރާތްތަކުގެ ޙިއްސާބޮޑުކޮށްގެން އެއަރޕޯޓް ހިންގުން ކަމުގައެވެ.
މިގޮތުން ދިވެހިރާއްޖޭގެ ފުންނާބު އުސް އެއް ވިޔަފާރިވެރިޔާ ޗަމްފާ މުހައްމަދު މޫސާގެ ކާސާ ހޯލްޑިންގްސް އަށް ކުންފުނީގެ 30 ޕަސެންޓް (އެންމެ 60 މިލިއަން ރުފިޔާ އަށް) ވިއްކާލިއެވެ. ނަމަވެސް އެއަރޕޯޓް ފަދަ ގައުމީ އެހާބޮޑު ހަރު މުދާ ގަނޑެއް، ސަރުކާރުގެ ކޮންޓްރޯލުން އެކީ އެއްކޮށް ދޫކުރާކަށް ބޭނުމެއް ނުވިއެވެ. އަދި 50 ޕަސެންޓް ޙިއްސާ ފިނޭންސް މިނިސްޓްރީގެ ނަމުގައި ސީދާ ސަރުކާރުގެ ދަށަށް ގެނެވުނެވެ. އަދި ބާކީ 20 ޕަސެންޓް ޙިއްސާ ކަމާއި ގުޅުންހުރި ޕަބްލިކް ކުންފުނިތައް ކަމުގައިވާ އެމްއޭސީއެލް އަދި އެސްޓީއޯ އާއި ޙަވާލުކުރެވުނެވެ.
މިއަދާއި ހަމަޔަށް ވެސް ކުންފުންޏަށް، ހުއްޓުމެއްނެތި ކުރިއަށް ދެވިފައިވަނީ އެސްޓީއޯގެ ދީލަތި އެހީތެރިކަމާއި އެކު ގައެވެ. މުޅި ކުންފުނި ހިންގަމުން ދަނީ އެސްޓީއޯ އިން ދަރަންޏަށް ތެޔޮ ނެގުމަށް ފަހު އެއަށްވާ ލާރި ނުދައްކައެވެ. މުވައްޒަފުންގެ މުސާރަކޮޅު ވެސް ދީފައިވަނީ ހަމަ ތެޔޮ ވިއްކައިގެން ލިބުނު ލާރިންނެވެ. މިގޮތުން އެއަރޕޯޓުން އެސްޓީއޯއަށް ދައްކަން ޖެހޭ ބިލްތަކުގެ ޖުމްލަ ޢަދަދު އެތަކެއް ސަތޭކަ މިލިއަނަށް އަރައެވެ. މިއީ ކަންބޮޑުވާން ޖެހޭ ކަމެކެވެ.
އެސްޓީއޯ އަދި އެމްއޭސީއެލް ވަކިވުން
މިދެންނެވުނު މައްސަލަތަކާއި ހެދި އާއި މިހާރުއޮތް ޙާލަތުގައި ދެމެހެއްޓެނިވިގޮތަކަށް ކުންފުނި ނުހިގޭނެކަމަށް ޤަބޫލުކުރެވެން ފެށުމުން، ދާދި ފަހުން ބޭއްވުނު އިކޮނޮމިކް ކައުންސިލުގެ ބައްދަލުވުންތަކުގެ ތެރެއިން ފަހު އެސްޓީއޯ އަދި އެމްއޭސީއެލް އިން ވަނީ، ކުންފުނީގެ ޙިއްސާ ވިއްކާލުމަށް ހުށަހަޅުއްވާފައެވެ.
އަދި ސަރުކާރުން ވަނީ އެކަން ބަލައިގަނެ، އެ ދެ ކުންފުނީގެ 20 ޕަސެންޓް ޙިއްސާ ސަރުކާރަށް ބަދަލު ކުރުމަށް ނިންމާފައެވެ.
މިއީ ކަން ވެގެން ވާނެ ގޮތެއް ނޫނެވެ. އެސްޓީއޯ އާއި އެމްއޭސީއެލް ބޯދަމައިގަތީމާ، ދެން އައްޑޫ އެއަރޕޯޓަށް ވާނެ ގޮތަކާއި ދޭތެރޭ މިއަދުގެ ސަރުކާރުން ވިސްނެވީ ކިހާ ވަރަކަށް ކަމެއް ނޭނގެއެވެ.
އެނގޭހާ ވެސް އެއްޗަކީ، މިއަދާއި ހަމައަށް އައިއިރު، ހުރިހާ ދުވަސްވަރެއްގައި ވެސް، ގަން އެއަރޕޯޓް މަޑުނުޖެހި ހިންގުނީ މިއިން ކޮންވެސް ކުންފުންޏެއްގެ ނިވަލުގައި ކަމެވެ. މިފަހަކަށް އައިސް ވަކިން ޙާއްސަކޮށް އެސްޓީއޯގެ ފަރާތުންނެވެ.
ސީދާ ސަރުކާރަށް ނުވަތަ ކާސާއަށް އެފަދަ ބުރަތަކެއް ނެންގެވިދާނެތޯ އެވެ؟
އެސްޓީއޯ އިން ވަނީ މާލޭގައި އޮފީހެއް ހަދައި، އެސްޓީއޯ ތެރެއިން އެއަރޕޯޓްގެ މަސައްކަތްތައް ބޭރުކޮށް އެކަހެރިވެ ގަނެފައެވެ. އަދި އެކުންފުންޏަށް ލިބެންޖެހޭ ލާރި ހޯދުމުގެ މަސައްކަތް ފަށާފައެވެ.
އެކަމަކު ދޭނެ އެއްޗެއް ނެތެވެ. ހުރިހާ ލާރިއެއް ވަނީ އިންވެސްޓް ކުރެވިފައެވެ. މިހާރު ހުރިވަރުން މުސާރަކޮޅުގެ ދެވިދާނެ ކަމާއިމެދު ވެސް ޝައްކު އުފެދެއެވެ.
ޒިންމާދާރު ވެރިއެއް ނެތުން، އަދި ސުވާލު އުފެދޭ މަޤާމުތައް
"އައްޑޫ ލައިވް" އަށް ވަރަށް އިތުބާރުހުރި ފަރާތްތަކަކުން ލިބިފައިވާ މަޢްލޫމާތުތަކަށް ބަލާއިރު، ފާއިތުވެ ދިޔަ އަހަރު ގަން އެއަރޕޯޓް ކުންފުންޏަށް ވަނީ އެތަކެއް މިލިއަން ރުފިޔާގެ ގެއްލުން ވެފައެވެ. މިކަމުގައި ޒިންމާ ނަގާނެ ފަރާތެއް ނެތެވެ. އަދި ޒިންމާ ނަގާނެ ފަރާތެއް ނެތް ތަނުގައި ޒިންމާދާރު ވެރިއެއް ވެސް ނެތީއެވެ. މެނޭޖިން ޑައިރެކްޓަރެއް ނުވަތަ ސީއީއޯ އެއް ނެތި އެތަކެއް މަސްތައް ފާއިތުވެގެން ހިނގައްޖެއެވެ. މިއީ ސަރުކާރު ހިއްސާވާ ކުންފުނިތައް ހިންގުމުގެ ޢާއްމު އުސޫލްތަކާއި ވެސް ޚިލާފް ކަމެކެވެ.
ހިންގުމުގެ ކަންކަން ވަނީ ބޮއްސުންލާފަ އެވެ.
މިހާރު ހިންގެވުމާ ޙަވާލުވެ ހުންނެވި އިބްތިޝާމާ އަހުމަދު ސަޢީދަކީ ކުންފުނީގެ ޑެޕިއުޓީ ޖެނެރަލް މެނޭޖަރ އެވެ.
އެބޭފުޅާ އަކީ، ޓޫރިޒަމް މިނިސްޓަރު އަދީބުއާއި ގާތް ގުޅުމެއް ބާއްވަމުން ގެންދަވާ، އަދި އަދީބު އާއި އެކު އެމްޓީޑީސީގެ ޗެއަރ އަކަށް ހުރެ ޑޮލަރުގެ ޑީލްތަކެއްގައި ކޮރަޕްޝަނަށް ތުހުމަތުކުރެވޭ ބޭފުޅެކެވެ.
މައުމޫނު ސަރުކާރުގެ އެންމެ ވައި މަޑު ދުވަސްކޮޅު، ބީއެމްއެލްގެ ބޮޑެތި ލޯނުތަކުގައި ތައްގަނޑު ޖައްސަވަމުން ގެންދެވީ ވެސް އެބޭފުޅާއެވެ. މީގެ ތެރޭގައި އޭރުގެ ބޮޑެތި މަހުޖަހުންނާއި އޭރުގެ ނަން މަޝްހޫރު ސިޔާސީ ބޭބޭފުޅުން ވެސް ހިމެނިވަޑައިގަނެއެވެ.
ޔާމީން ޢަބްދުލް ޤައްޔޫމްގެ މިވެރިކަމުގައި އެމްއެމްއޭ ގެ ގަވަރުނަރުކަމުގެ މަޤާމް ވެސް ވަނީ ދެއްވާފައެވެ. އެހެން ނަމަވެސް، އާއްމު ރައްޔިތުންގެ ފިއްތުންތަކާއި ހެދި، ޢައްޔަނު ނުކުރެވެނީސް އެބޭފުޅާގެ ނަން އަނބުރާ ރައީސް ޔާމީން ވަނީ ގެންދަވާފައެވެ. އަދި އޭގެ ކުޑަދުވަސްކޮޅެއް ފަހުން، ބީއެމްއެލްގައި މަސައްކުރި މުވައްޒަފުންތަކަކާއި ޖެހުނު މައްސަލަތަކަށް ފަހު ބީއެމްއެލް ވެސް ދޫކުރިއެވެ.
މީގައި ހައިރާން ވާންޖެހޭ ކަމަކީ، އިބްތިޝާމާ ޑެޕިއުޓީ ޖެނެރަލް މެނޭޖަރ ގެ ގޮތުގައި ހިންގެވުމާއި ޙަވާލުވެ ހުންނެވިއެއްކަމަކު ކުންފުނީގައި ޑެޕިއުޓީ މެނޭޖިން ޑައިރެކްޓަރުގެ މަޤާމުގައި މުޙައްމަދު ދީދީ (މުހުއްމާ) ކިޔާ ބޭފުޅަކު ހުންނަވާތީއެވެ.
އަދި މުޙުއްމާ ގެ އެއްވެސް ދައުރެއް ނުވަތަ ހިންގުމުގެ ބާރެއް ވެސް މިހާރުގެ މެނޭޖްމެންޓްގައި ނޯންނަކަމަށް، ވާހަކަ ދެކެވުނު ގިނަ މުވައްޒަފުން އިއްތިފާގު ވިއެވެ. އަދި އެއްވެސް ކަމެއް ނިންމުމުގެ އިޚްތިޔާރެއް ނޯންނަކަމަށް ތަކުރާރުކޮށް މުހުއްމާ އަންގަމުން ގެންގޮސްފައިވާކަމަށް ވެސް ބުންޏެވެ.
އިބްތިޝާމާ ވަޑައިގެންނެވުމުގެ ކުރީގައި، މުހުއްމާ އެއީ ކުންފުނީގެ ދެވަނައަށް އެންމެ އިސް ފަރާތެވެ. އަދި އޭރު އެއަރޕޯޓްގެ އެކްޓިންގ މެނޭޖިން ޑިރެކްޓަރަކަށް ހުންނެވީ މިހާރުގެ އެސްޓީއޯގެ މެނޭޖިން ޑައިރެކްޓަރ އަހުމަދު ޝަހީރެވެ.
ކޮންމެއަކަސް، މީގައި ކަނޑައެޅިގެން ކާކު ރިޕޯޓްކުރަންވީ ކާކަށް ކަމެއް ސާފެއް ނުވެއެވެ.
ޚަބަރު ލިބިފައިވާ ގޮތުގައި، އެއަރޕޯޓަށް ބޭނުންވާ ތަކެތި ހޯދުމުގައި، މުހުއްމާއަށް އިތުބާރު ނުކުރާކަމަށް ބުނެ މިދިޔަ ހަފްތާތެރޭގައި، އިބްތިޝާމާ ވަނީ ބޭންކުގައި އުޅުނު އިރު އެތަނުގެ ރިލޭޝަންޝިޕް އޮފިސަރ އަކަށް ހުރި މަރީ ކިޔާ ކުއްޖަކު ވައްދާ އޭނާއަށް ޕްރޮކިއޮމެންޓް މެނޭޖަރުކަން ދީފައެވެ.
އަދި އޭގެ ކުރީގައި ހިއުމަން ރިސޯސް މޭނޭޖަރަކަށް އިޢްލާންކުރުމަށް ފަހު، ހިއުމަން ރިސޯސް އެސިސްޓެންޓް މެނޭޖަރުކަން ވެސް ގުޅުން އޮންނަ އެހެން ކުއްޖަކަށް ދީފައެވެ.
މުވައްޒަފުންގެ ޝަކުވާތައް
އެއަޕޯޓްގައި މަސައްކަތް ކުރަމުންދާ 175 ވަރަކަށް މުވައްޒަފުންގެ ޝަކުވާތައް ގިނަކަމުގައި ފާހަގާ ކުރަން ޖެހެއެވެ. އަދި އެމީހުން ވަނީ އެމީހުންގެ ޝުޢޫރުތައް އެކި ސިފަސިފައިގައި ފާޅުކުރުމަށް މަސައްކަތް ކޮށްފައެވެ.
މިގޮތުން އެންމެ ފުރަތަމަ އެމީހުން ބެލީ ވާހަކަދައްކައިގެން ޙައްލު ހޯދުމަށެވެ. ނަމަވެސް މެނޭޖްމެންޓް އެކަމަށް އިޖާބަ ދޭން ބޭނުން ނުވުމުން ތަފާތު އެކި ޕެޓިޝަންތައް ތަޔާރުކުރިއެވެ. ނަމަވެސް އޭގެ ސަބުބުން ކަންތައްތައް ޙައްލުވުމުގެ ބަދަލުގައި ވީ ގޯހެވެ. ދެން ސަރުކާރުގެ އެކި އިދާރަތަކަށް ސިޓީތައް އޮއްސުމުން ވެސް އެދެވޭ ޖަވާބުތަކެއް ނުލިބުނެވެ. މީގެ ތެރޭގައި ރައިސް އޮފީހާއި ފިނޭންސް މިނިސްޓްރީ ހިމެނެއެވެ.
ވާހަކަ ދެއްކި ގިނަ މީހުން ބުނާގޮތުން ނަމަ، މުސާރައިގެ މައްސަލަ އެއީ އެމީހުންގެ މައިގަނޑު ކަންބޮޑުވުމެވެ. މިހާރު ދެމުން ގެންދާ މުސާރައަކީ މީގެ 5 އަހަރު ކުރިން، އެމްއޭސީއެލް ދުވަސްވަރު ވެސް ދިން މުސާރަކަމަށާއި އެއީ އެކަށީގެން ނުވާ މުސާރައެއް ކަމުގައި އަޑު އުފުލާފައެވެ.
އަދި ނަޝީދު ސަރުކާރުގައި ސިވިލް ސާވިސް މުވައްޒަފުންގެ މުސާރައިން އުނިކުރިބައި ސަރުކާރުން އަނބުރާ ދޭން ނިންމުމުން ވެސް ނުލިބުމުގެ ވާހަކައެވެ. ނަމަވެސް އެކަމަށް މީގެ ކުޑަ ދުވަސްކޮޅެއް ކުރިން ވަނީ ޙައްލު ހޯދާ ދީފައެވެ.
މުސާރަ ކުޑަވުމުގެ މައްސަލައިގެ އިތުރުން އަދި ވެސް ޙައްލު ނުވެ ހުރި ކަންތައްތަކުގެ ތެރޭގައި، ގިނަ ވަގުތު ޑިއުޓީ ކުރަންޖެހޭ މީހުންނަށް އަރާމުކުރަން ދިފައިވާ ތަނުގެ މައްސަލަ ހިމެނެއެވެ. އަދި އެތަނަކީ ސިއްޙީ މިންގަނޑުތަކުން ބަލާއިރު އިންސާނުން ދިރިއުޅެން ކަމުދާ ތަނެއް ނޫން ކަމާއި، ނަޖިހުން ފުރިފައިވާ، ބާވެ ހަސްފަސް ނެތިފައިވާ ތަނެއް ކަމުގެ ޝަކުވާއެވެ.
މުވައްޒަފުންގެ މެދުގައި ތަފާތުކުރުންތައް ގެންގުޅުމާއި، އިތުރު ގަޑީގެ ވަގުތުތަކުގެ މައްސަލައާއި، އިތުރުގަޑީގެ ފައިސާގެ މައްސަލައާއި، ޔުނިފޯމް ނުދޭ މައްސަލަ އާއި، މުވައްޒަފުންނަށް ޚާއްސަ ކެފެޓޭރިއާއެއް ނެތުމާއި، މުވައްޒަފުންނާއި މެނޭޖްމެންޓާއި އޮންނަ ގުޅުން ކުޑަވުމާއި، މެނޭޖްމެންޓުން ގަދަބަސް ބުނަމުން ދިއުމާއި، ދަތުރުފަތުރާއި ފޯން އެލަވަންސް ދިނުމާއި ފޯން އެލަވަންސް ދިނުމުގައި ތަފާތުކުރުން ގެންގުޅޭކަން، މިހިރީ ހައްތަހާ ވެސް މުވައްޒަފުންގެ ކަންބޮޑުވުންތަކެވެ. އަދި މީގެ އިތުރުން ވެސް އެތަކެއް ކަމެއް އެބަހުއްޓެވެ.
ސުވާލާކީ، މުވައްޒަފުންގެ މިފަދަ ކަންކަމަށް އިޖާބަ ނުދެވިގެން އުޅެނީ ކީއްވެ ހެއްޔެވެ. ހަމަ އެކަނި ލާރި ނެތިގެން ހެއްޔެވެ. ނޫނީ، ހިންގުމުގެ ނުކުޅެދުންތެރިކަމުން ހެއްޔެވެ.
ތަރައްޤީ ކުރުމުގައި ނުފޫޒާއި ލޯން ނުލިބުން
އައްޑޫ އެއަޕޯޓަކީ، ސަރުކާރުގެ މެޖޯރިޓީ އޮންނަ ކުންފުންޏެއް ކަމުގައިވާއިރު، އިންވެސްޓްކުރުމާއި ޚަރަދުކުރުން ހުންނަންޖެހޭނީ މާލިއްޔަތުގާނޫނާއި، ކޯޕަރޭޓް ގަވަރނެންސްގެ ކޯޑްތަކާއި ޚިލާފްނުވާނެފަދަ ގޮތެއްގެ މަތިންނެވެ.
ނަމަވެސް އިއްޔެ އައްޑޫލައިވް އަށް ލިބިފައިވާ މަޢްލޫމާތުތަކުން އެނގޭގޮތުގައި، އެއަރޕޯޓްގެ މަސައްކަތްތައް އެވޯޑްކުރުމުގައި މައްސަލަތަކެއް އެބަހުއްޓެވެ.
ދާދި ފަހުން ޑެންމާކްގެ އެމްޓީ ހޯގާރޑް އާއި ޙަވާލުކުރެވުނު ރަންވޭގެ މަސައްކަތްތައް ވެސް ދީފައިވަނީ، އެއްވެސް އިޢްލާންކުރުމެއް ނެތި ވާދަވެރި ފަރާތެއްގެ ހުށަހެޅުންތަކަށް ބެލުމެއް ނެތި ވަރަށް އަވަސް އަރުވާލައިގެން ކޮންމެވެސް ބައެއްގެ ނުފޫޒުންނެވެ. ބީއެމްއެލް އިން ނެގުމަށް ރޭވިފައިވާ ލޯން ލިބޭނެކަމުގެ އެއްވެސް ޢިޝާރާތެއް ނެތީހެވެ. އެންމެފަހުން އެލޯނެއް ވެސް ވަނީ ނުލިބިފައެވެ.
ހަޤީގަތުގައި ބީއެމްއެލް އިން ލޯނުދޭން ފަސްޖެހެނީ، ކުންފުނީގެ ހިންގުމުގެ ދޯދިޔާކަމުގެ ސަބަބުންނެވެ. ކުންފުނީގެ ޙާލަތު އެހާ ނާޒުކެވެ. ދަރަންޏާ އަރަނި އަދި ގެއްލުން ބޮޑުކަމަށް އަހަރީ ރިޕޯޓްތަކުން ދައްކައެވެ. މިހާރުގެ މެނޭޖްމެންޓަށް ފުރިހަމަ ފީސިބިލިޓީއާއި ޕްރޮޕޯސަލެއް ހުށަހަޅައިނުދެވުނުތާ، ކުންފުނި ދޯދިޔާކޮށް ގެންގޮސް ކޮށްޅަށް ޖަހާލަދެވޭނެކަމުގެ ޔަގީންކަމާއި އިތުބާރު ދައްކާނުލެވުނެވެ.
އެއަޕޯޓް ހޮޓަލެއް ހެދުމަށް ދެފަހަރެއްގެ މަތިން އިޢްލާނުކުމަށްފަހު ބަޔަކު ނުވިކަމަށް ބުނާއިރު، އެކަށީގެންވާ މުހުލަތު ދީފައިނުވެއެވެ. އެންމެފަހުން އިޢްލާން ކުރިއިރު، ކުރިމަތި ލާފައިވަނީ އޭރުގެ ކުންފުނީގެ ޗެއަރމަން އާދަމް އާޒިމްގެ މަސްލަޙަތު އޮންނަ އާރުސީއެންސީ ކުންފުނިން އެކަންޏެވެ. ވުމާއި އެކު އެފަރު އޭތި ކުރިއަކަށް ގެންދާކަށް ނުކެރުނެވެ.
މިހާރު ރޭވިފައިވާ ގޮތުން ނަމަ، ސީޕްލޭން ޓާމިނަލް ހިންގުމާއި އޮޕަރޭޓްކުރުން ވެސް ވަކިބަޔަކަށް ހިބަކޮށްދިނުމުގެ މަގު ދަނީ ފަހި ކުރެވުމުންނެވެ. ބޭނުމަކީ އައްޑުއަތޮޅުގެ ސީޕްލޭން އޮޕަރޭޝަން މޮނޮޕޮލައިޒްކުރުމެވެ. އޭރުން ބޭނުން އަގެއްގައި ޓިކެޓް ވިއްކަން ފުރުސަތު ހޯދުމުގެ ބޭނުމުގައެވެ.
އެއަޕޯޓް ތަރައްޤީވެގެން ދިއުން ރައްޔިތުން އެދޭ
ކޮންމެ ޙާލެއްގައި ވެސް އައްޑޫ ރައްޔިތުން އެދެނީ، އައްޑޫ އެއަރޕޯޓް ތަރަޤީވުމެވެ. ނަމަވެސް މިހާރުގެ ޙާލަތު ބަދަލުކުރަންޖެހޭކަން ކަށަވަރުވެ ޔަޤީންވެއެވެ.
ޤާބިލް ހުނަރުވެރި، އަދި އިތުބާރު ހިފޭ އައްޑޫގެ ކުރިމަގަށް ވަކާލާތުކޮށްދެވޭނެ ލަޔާގަތުހުރި އައްޑޫ ރައްޔިތުންތަކެއް ކުންފުނީގެ ދިރުބާކޮޅަށް ލާންޖެހެއެވެ. އަދި މުވައްޒަފުންނަށް ކަމޭ ހިތާ، މުވައްޒަފުންގެ ޙައްގުތަކަށް އިހްތިރާމް ކުރާބަޔަކަށް އެމީހުން ވާން ޖެހެ އެވެ.
މިކަން މިގޮތަކަށް ވާނެ ގޮތްތައް ހޯދާ ބަލަންވީއެވެ. ހަމަ ބަލަހައްޓައިގެން ސަރުކާރުން ޖަހާހައި ބެރަކަށް ނަށައިގެން ތިބެވޭކަށް ނެތެވެ. އެހެން ނޫނީ އިސާހިތަކު އަޅުގަނޑުމެން އެންމެންގެ މުސްތަގުބަލުގެ ތަރައްގީގެ އަސާސްކަމުގައިވާ އައްޑޫ އެއަރޕޯޓް އޮޔާ ގޮސް ބީވެދާނެއެވެ.