ގަން އެއާޕޯޓް ހިންގާ އައްޑޫ އިންޓަނެޝަނަލް އެއާޕޯޓް ކޮމްޕެނީ (އޭއައިއޭ) އިން އަލަށް އެކުލަވާލައި މި މަހުން ފެށިގެން އަމަލު ކުރަން ފަށާފައިވާ ވަޒީފާގެ އައު އޮނިގަނޑުގެ ދަށުން މުވައްޒަފުންނަށް ލިބޭ ބެނިފިޓްސް ޕެކޭޖް އިތުރުކޮށް އެ ކުންފުނިން އަލަށް އިންޝުއަރެންސް ޕެކޭޖެއް ތައާރަފުކޮށްފަ އެވެ.
އެ އިންޝުއަރެންސް ޕެކޭޖުގެ ދަށުން ކޮންމެ މުވައްޒަފަކަށް ވެސް 120،000ރ. ގެ ކަވަރޭޖެއް ރާއްޖެ އާއި ރާއްޖޭން ބޭރުގެ ގައުމުތަކުން ހަމަޖެހިގެން ދާނެ ކަމަށް އޭއައިއޭ އިން ބުންޏެވެ.
އޭއައިއޭ އިން ނެރުނު ނޫސް ބަޔާނެއްގައިވާ ގޮތުން އާ އޮނިގަނޑުގެ ދަށުން އަހަރުން އަހަރަށް މުސާރަ އިތުރުވާނެ އިންކްރިމެންޓް ސިސްޓަމެއް ވެސް ވަނީ ގާއިމު ކުރެވިފަ އެވެ. އަދި މުވައްޒަފުންނާ މަޝްވަރާ ކުރުމަށް ފަހު މުވައްޒަފުންގެ އެދުމުގެ މަތިން ޝިފްޓް ޑިއުޓީ އަށް ދެމުން ގެންދިޔަ އެލަވަންސް ކުރިން ވެސް ދެމުން ދިޔަ ގޮތަށް ދިނުމަށް ހަމަޖެހިފައިވާ ކަމަށް އެ ކުންފުނިން ބުންޏެވެ.
އަލަށް އެކުލަވާލި އޮނިގަނޑުގެ ދަށުން ކުރިން މުވައްޒަފުންނަށް ދެމުން ގެންދިޔަ އަސާސީ މުސާރަ އަދި ސާވިސް އެލަވަންސް ވަކިން ދިނުމުގެ ބަދަލުގައި މިހާރު ވަނީ އަސާސީ މުސާރަ އާއި ސާވިސް އެލަވަންސް އެއްކޮށްލައިގެން ދޭ ގޮތަށް ނިންމައިފަ އެވެ.
އެކަމާ ގުޅިގެން ސާވިސް އެލަވަންސް ކަނޑާލި ކަމަށް ބުނެ، އެއާޕޯޓްގެ ގިނަ އަދަދެއްގެ މުވައްޒަފުން އިއްޔެ ވަނީ ހަޅުތާލު ވެސް ކޮށްފަ އެވެ.