ފިންލޭންޑް ސްކޫލެއްގެ ކްލާސްރޫމް ތެރޭގައި ދަރިވަރަކު ބަޑިން ދިން ހަމަލާއެއްގައި ކުއްޖަކު މަރުވެ، އިތުރު ދެ ކުއްޖަކު ޒަހަމްވެއްޖެ އެވެ.
މީޑިއާތަކުން ރިޕޯޓްކޮށްފައިވާ ގޮތުގައި ގްރޭޑް 6 ގެ ކުލާސްރޫމް ތެރޭގައި މި ހާދިސާ ހިންގާފައި ވަނީ ފިންލޭންޑްގެ ވެރިރަށް ހެލްސިންކީގެ އުތުރުން އޮންނަ ވެންޓާގެ ވިއެޓޯ ސްކޫލްގަ އެވެ. ކްލާސްރޫމް ތެރޭގައި ބަޑި ގެންގުޅެ ބަޑި ޖެހީ 12 އަހަރުގެ ދަރިވަރެކެވެ. އަދި އޭނަ ދިން ހަމަލާގައި މަރުވީ ވެސް އަދި ޒަހަމްވީ ވެސް 12 އަހަރުގެ ދަރިވަރުންތަކެކެވެ.
މި ހާދިސާ ހިނގުމާ އެކީ ފުލުހުންނަށް ރިޕޯޓްކުރި އެވެ. އެއާ އެކީ ހަމަލާދިން ކުއްޖާ ވަނީ ފިލައިފަ އެވެ. ނަމަވެސް ފުލުހުން ވަނީ އެ ކުއްޖާ ހޯދައިފަ އެވެ. ތަހުގީގަށް އެ ކުއްޖާ ވަނީ ބަޑިއެއް ގެންގުޅުނު ކަމަށާއި ހަމަލާ ވެސް ދިން ކަމަށް އެއްބަސްވެފަ އެވެ.
މި ހާދިސާ ފުލުހުން މިހާރު އަންނަނީ އިތުރަށް ތަހުގީގު ކުރަމުންނެވެ. ހަމަލާދިން ކުއްޖާ މިހާރު ހުރީ ސޯޝަލް ސާވިސް ސެންޓަރެއްގެ ބެލުމުގެ ދަށުގަ އެވެ. ސަބަބަކީ 15 އަހަރުން ދަށުގެ ކުދިން ރިމާންޑް ސެންޓަރެއްގައި ބަންދުކުރުން ފިންލޭންޑްގެ ގާނޫނުތަކުން ހުއްދަ ނުދޭތީ އެވެ.