މާލޭގައި ގްރޫޕަކުން މީހަކު ކިޑްނެޕްކޮށް، މާރާމާރީ ހިންގައި އޭނާގެ އަތުން ފޭރިގެންފި އެވެ.
މި މައްސަލައިގައި ފުލުހުން ހޯމަ ދުވަހު ވަނީ އުމުރުން 26 އަހަރުގެ ދިވެހި ފިރިހެނަކު ހައްޔަރުކޮށްފަ އެވެ. އަދި އޭނަގެ ބަންދަށް ކްރިމިނަލް ކޯޓުން ވަނީ 15 ދުވަސް ޖަހައި ދީފަ އެވެ. އޭނަ ބަންދުކުރީ "މުޖުތަމައުގެ ސަލާމަތާއި ރައްކާތެރިކަމަށްޓަކައި" އެވެ.
އޭނަގެ ކޯޓް އަމުރުގައިވާ ގޮތުން މާލެއަށް ނިސްބަތްވާ އެ މީހާ އާއި އިތުރު ބަޔަކުވެގެން މީހަކު ގެޔަކަށް ގެންގޮސް ކިޑްނެޕް ކުރުމަށް ފަހު، މާރާމާރީ ހިންގައި ފޭރިފައިވެ އެވެ.
މި މައްސަލައިގައި ހައްޔަރުކުރި މީހާގެ ކުރާ ތުހުމަތުތަކުގެ ތެރޭގައި ފޭރުމާއި ތޫނު ހަތިޔާރު ބޭނުންކޮށްގެން ބިރު ދެއްކުމާއި މާރާމާރީ ހިންގުމާއި ހުއްދަ ނޫން ގޮތުގައި މީހުން ހިފެހެއްޓުން ހިމެނެ އެވެ.