އައްޑޫ ފޭދޫ ސްކޫލްގެ ގާލްގައިޑް ދަރިވަރުން ކުރިއަށް ގެންދާ "ހިތުގެ އެންމެ ފުންމިނުން" ޕްރޮގްރާމްގެ ދަށުން މި ފަހަރު ވެސް އީދު ހަދިޔާ ބަހަން ނިންމައިފި އެވެ.
ދީލަތި ފަރާތްތަކުގެ އެހީގައި ލިބުނު ތަކެތިން އީދު ހަދިޔާ ބަހަން ނިންމާފައި ވަނީ ފޭދޫގެ އެންމެ ބޭނުން ޖެހިފައިވާ ފަރާތްތަކަށެވެ.
މިކަމާ ގުޅޭ ގޮތުން ފޭދޫ ސްކޫލުން ބުނީ "ހިތުގެ އެންމެ ފުންމިނުން" ޕްރޮގްރާމަށް ޖުމްލަ 33،145ރ. ގެ އިތުރުން ގިނަ އަދަދަކަށް ކާބޯތަކެތީގެ ބާވަތްތައް ލިބިފައިވާ ކަމަށެވެ. އެހެންވެ އެ ތަކެތި ފޭދޫގެ އެންމެ ބޭނުން ޖެހިފައިވާ ފަރާތްތަކަށް ބެހުމުގެ މަސައްކަތް، ފޭދޫގެ ޖަމިއްޔާއެއް ކަމަށްވާ މިޝްކާތު ފައުންޑޭޝަނާ މިހާރު ހަވާލުކޮށްފައިވާ ކަމަށް ސްކޫލުން ބުންޏެވެ.
ތަކެތި އެ ޖަމިއްޔާއާ ހަވާލުކުރީ މިއަދު މެންދުރު ފަހު ފޭދޫ ސްކޫލްގައި ބޭއްވި ހަފުލާއެއްގަ އެވެ.
މި ތަކެތި ދޭ އީދު ހަދިޔާގެ އިތުރުން އާންމުންގެ ދީލަތި އެހީގެ ދަށުން، ފޭދޫގެ އެންމެ ބޭނުން ޖެހިފައިވާ 30 ގެޔަކަށް ޢީދު ދުވަހުގެ މެންދުރުގެ ކެއުން ފޯރުކޮށް ދޭން ވެސް ފޭދޫ ސްކޫލުން ވަނީ ނިންމައިފަ އެވެ.