ރައްޔިތުންގެ މަޖިލިސް އިންތިހާބު ގާތްވަމުން އަންނަ އިރު، އެ އިންތިހާބުގައި ވޯޓް ބާތިލުވެދާގެ ހަ ހާލަތެއް އިލެކްޝަން ކޮމިޝަން (އީސީ) އިން އާންމުކޮށްފި އެވެ.
އާންމުންގެ ސަމާލުކަމަށް މި ގެނައުމުގެ ގޮތުން އީސީން ހާމަކޮށްފައިވ ހަ ހާލަތުގެ ތެރޭގައި ހިމެނެނީ
1. އެއްވެސް ކެންޑިޑޭޓެއްގެ ނަމާ ދިމާގައި ރަނގަޅު ފާހަގަ ޖަހާފައި ނުވާ ވޯޓް ކަރުދާސް
2. ވޯޓް ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި އާދައިގެ ކަޅު ނުވަތަ ނޫ ކުލައިގެ ދެލީގެ ގަލަމެއް ފިޔަވައި އެހެން ކުލައެއްގެ ދެލީގެ ގަލަމަކުން ނުުވަތަ އެއްޗަކުން ފާހަގަ ޖަހާފައިވާ ވޯޓް
3. ވޯޓް ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި އެއް ރަނގަޅު ފާހަގަ އަށް ވުރެ ގިނަ ރަނގަޅު ފާހަގަ ޖަހާފައިވާ ވޯޓް
4. ވޯޓް ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި ރަނގަޅު ފާހަގަ ޖެހުމުގެ އިތުރުން، އެހެން އިތުރު ފާހަގައެއް ޖަހާފައިވާ ނުވަތަ ލިޔުމެއް ލިޔެފައިވާ ނުވަތަ ކުރެހުމެއް ކުރަހާފައިވާ ވޯޓް
5. ވޯޓް ދޭ މީހާ، ވޯޓް ދޭ ވަކި ކެންޑިޑޭޓެއް ކަށަވަރު ކުރަން ނޭނގޭ ގޮތަށް ދީފައިވާ ވޯޓް
6. އެއް ކެންޑިޑޭޓަށް ވުރެ ގިނަ ކެންޑިޑޭޓުންގެ ނަމާ ދިމާގައި ރަނގަޅު ފާހަގަ ޖަހާފައިވާ ވޯޓް ކަރުދާސް
ލާ ވޯޓަކީ ޞައްހަ ވޯޓެއް ކަމަށް ބަލާނީ ވޯޓު ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި އާދައިގެ ކަޅު ނުވަތަ ނޫ ކުލައިގެ ދެލީގެ ގަލަމަކުން ރަނގަޅު ފާހަގަ ޖަހާފައިވާ ވޯޓެވެ.
ވިހި ވަނަ މަޖިލިސް އިންތިހާބު އޮންނާނީ މި މަހުގެ 21 ގަ އެވެ. މި އިންތިހާބުގައި 93 ދާއިރާއަކަށް މެމްބަރުން އިންތިހާބު ކުރާނެ އެވެ. އިންތިހާބުގައި 369 ކެންޑިޑޭޓަކު ވާދަކުރެ އެވެ. އިންތިހާބުގައި 284،663 މީހަކަށް ވޯޓްލުމުގެ ހައްގު ލިބެ އެވެ. އެއީ 139،361 އަންހެނުންނާއި 145،302 ފިރިހެނުންނެވެ.