އއ. ރަސްދޫގައި ކުދިންތަކެއް އެހެން ކުއްޖަކަށް އަނިޔާކުރި މައްސަލަ ބަލަން ފުލުހުންނާއި ސޯޝަލް އެންޑް ފެމިލީ މިނިސްޓްރީގެ އިތުރުން ޑިޕާޓްމަންޓް އޮފް ޖުވެނައިލް ޖަސްޓިސްގެ ޓީމެއް މިއަދު އެ ރަށަށް ގޮސް ހަރަކާތްތެރިވާން ފަށައިފި އެވެ.
ކުއްޖާ އަށް އަނިޔާކުރި މަންޒަރު ފެންނަ ވީޑިއޯއެއް ރޭ ސޯޝަލް މީޑިއާގައި ދައުރުވާން ފެށުމާ އެކީ، އެ މައްސަލަ ސީރިއަސް މައްސަލައެއްގެ ގޮތުގައި ބަލާނެ ކަމަށް ފުލުހުން ބުންޏެވެ. ރަސްދޫ މިސްކިތެއްގެ ފާހާނާ ތެރޭގައި ފިރިހެން ކުއްޖަކަށް ބުލީކޮށް، ޖިސްމާނީ އަނިޔާކޮށް ހުތުރު ބަހުން އެއްޗެހި ގޮވާފައި ވަނީ ދެ ކުއްޖެކެވެ.
މި މައްސަލައާއި ގުޅިގެން @PoliceMv ، @MSFDmv އަދި @mv_djj ގެ އޮފިޝަލުން ހިމެނޭޓީމެއް އއ.ރަސްދޫގައި މިހާރުދަނީ ހަރަކާތްތެރިވަމުން. @PoliceMvCP @min_mohst @
— Ahmed Shifan (@Shifan4040) April 6, 2024
ފުލުހުން ބުނެފައި ވަނީ އެއީ 13 އަހަރާއި 14 އަހަރުގެ ދެ ކުދިން ކަމަށެވެ.
އަދި މިކަމާ ގުޅިގެން އަނިޔާގެ ޝިކާރަކަށްވި ކުއްޖާ އަށް ބޭނުންވާ ސައިކޯ ސޯޝަލް ސަޕޯޓް ފޯރުކޮށް ދިނުމުގެ މަސައްކަތް ކަމާ ގުޅުން ހުރި އިދާރާތަކާ ގުޅިގެން ކުރަމުން އަންނަ ކަމަށް ފުލުހުން ބުނެފައިވެ އެވެ.
މި ހާދިސާއާ ގުޅިގެން ސޯޝަލް އެންޑް ފެމިލީ މިނިސްޓްރީން މިއަދު ބުނީ ކުޑަކުއްޖަކަށް ބިރު ދައްކައި އަނިޔާކުރާ މަންޒަރު ފެންނަ ވީޑިއޯއެއް އެ މިނިސްޓްރީގެ ސަމާލުކަމަށް އައުމާ އެކީ ، ފުލުހުންނާ ގުޅިގެން އެ މައްސަލައާ ގުޅޭގޮތުން ކުރަން ޖެހޭ މަސައްކަތްތައް ކުރަމުން އަންނަ ކަމަށެވެ.