އައްޑޫގެ އަވަށްތަކުގައި މަގުބައްތި ހަރުކޮށްފައިވާ ހޮޅިދަނޑިތަކުގައި މަގު ހުރަސްވާ ގޮތަށް ކެމްޕެއިން ބެނާތަކާއި ދިދަފަތިތައް ނުދަމަން ކައުންސިލުން އަނެއްކާ ވެސް އަންގައިފި އެވެ.
ކައުންސިލުން ނެރުނު އިއުލާނެއްގައި ބުނީ އެކަމަކީ ކުރިން ވެސް މަނާކޮށްފައި އޮންނަ ކަމެއް ކަމަށެވެ.
ނަމަވެސް މިހާރު ރައްޔިތުންގެ މަޖިލީސް އިންތިހާބަށް ކެންޑިޑޭޓުން ކެމްޕޭން ކުރަމުން އަންނަ އިރު، އައްޑޫގެ މަގުތަކުގައި އަލަށް ޖަހަމުން އަންނަ ބޮކިހޮޅދަނޑިތަކުގައި ވައު އައްސައި ކެމްޕެއިން ބެނާތައް ހަރުކުރަމުންދާކަމުގެ ޝަކުވާ ވެސް ލިބެމުންދާ ކަމަށް ކައުންސިލުން ބުންޏެވެ.
އެހެންވެ އެއްވެސް ފަރާތަކުން އެކަން ނުކުރުމަށް އަންގާ ކަމަށް ކައުންސިލުން ބުންޏެވެ.
"މިދެންނެވިފަދަ ގޮތަށް މަގުބައްތިތަކުގައި ބެނާތަކާއި ދިދަފަތިތަށް ހަރުކުރުމަށް ވައު އައްސާފައިވާ ފަރާތްތަކުން އެފަދަ ތަކެތި 08 އޭޕްރީލް 2024 ވާ ހޯމަ ދުވަހުގެ މެންދުރު 12:00 ގެ ކުރިން ނެގުމަށް ދެންނެވީމެވެ." ކައުންސިލުން ބުންޏެވެ.
އެ ކައުންސިލުން ބުނީ އެކަމަށް ދިން ވަގުތުގެ ތެރޭގައި ތަކެތި ނުނަގައިފި ނަމަ ކައުންސިލުން އެ ތަކެތި ނަގާނެ ކަމަށެވެ.