ކުރީގެ ސަރުކާރުގެ "ބިންވެރިޔާ" ސްކީމްގެ ދަށުން ގިރާވަރުފަޅުން ދޫކޮށްފައިވާ 1،300 އަށް ވުރެ ގިނަ ގޯތި ގުޅީފަޅަށް ބަދަލުކުރުމަށް ނިންމައިފި އެވެ.
ހައުސިން މިނިސްޓްރީން އިއްޔެ ބުނީ ގިރާވަރުފަޅުން ގޯތި ދޫކޮށްފައި ވަނީ އެސަރަޙައްދަށް ކޮންމެހެން ބޭނުންވާ މުހިއްމު ހިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތި ކަމަށެވެ. އެހެންވެ އެފަދަ ހިދުމަތްތައް ހިމަނައިގެން ގިރާވަރުފަޅުގެ ލޭންޑް ޔޫސް ޕްލޭން އެކުލަވާލުމުން ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ ގިރާވަރުފަޅުން ދޫކޮށްފައިވާ ބައެއް ގޯތިތައް ގުޅިފަޅަށް ބަދަލުކުރަން ނިންމާފައިވާ ކަމަށެވެ.
އެގޮތުން ގިރާވަރުފަޅުން ގުޅިފަޅަށް 1،347 ގޯތި ބަދަލުކުރުމަށް ވަނީ ނިންމައުފަ އެވެ.
ގުޅީފަޅަށް ބަދަލުކުރާ ގޯތީގެ އަދަދާއި ބޮޑުމިން:
* 1،250 އަކަފޫޓުގެ 193 ގޯތި
* 1،650 އަކަފޫޓުގެ 663 ގޯތި
* 2،050 އަކަފޫޓުގެ 487 ގޯތި
* 2،450 އަކަފޫޓުގެ 4 ގޯތި
ހައުސިން މިނިސްޓްރީން ބުނީ ގިރާވަރުފަޅުން ގުޅިފަޅަށް ގޯތި ބަދަލުކުރުމަށް ބޭނުންވާ މީހުންނަށް މިއަދު ހެނދުނު 9:00 އިން ފެށިގެން މި މަހުގެ 14 ވަނަ ދުވަހުގެ ރޭގަނޑު 11:00 އާ ހަމައަށް ހިޔާވަހި ޕޯޓަލް މެދުވެރިކޮށް އެކަމަށް ހުށަހެޅޭނެ ކަމަށެވެ.
މިހާރު ނިންމާފައިވާ އަދަދަށް ވުރެ ގުޅީފަޅަށް ބަދަލުވާން ހުށަހަޅާ މީހުންގެ އަދަދު އިތުރުވާ ނަމަ ގުޅިފަޅުން ގޯތި ލިބޭ މީހުން ކަނޑައަޅަން ނިންމާފައި ވަނީ ގުރުއަތުންނެވެ. އަދި ގުރުއަތު ނެގުން އޮންނާނެ ތާރީހެއް ފަހުން އިއުލާން ކުރާނެ ކަމަށް މިނިސްޓްރީން ބުންޏެވެ.
ރައީސް އިބްރާހީމް މުހައްމަދު ސޯލިހްގެ ސަރުކާރުން "ބިންވެރިޔާ" ސްކީމްގެ ދަށުން ހުޅުމާލެ، ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމި އެވެ.