ސްކޫލުތަކަށް ބޭނުންވާ ވަރަށް "ސްކޫލް ކައުންސެލަރުން" ތަމްރީނު ކުރުމަށް އެޑިއުކޭޝަން މިނިސްޓްރީން ތައްޔާރުވާން ފަށައިފި އެެވެ.
ކުޑަކުދިން ބުލީކުރުމުން ރައްކާތެރިކުރުމަށް މަސައްކަތްކުރާ ޓާސްކްފޯހުން ރޭ ބޭއްވި ނޫސްވެރިންގެ ބައްދަލުވުމުގައި އެޑިއުކޭޝަން މިނިސްޓަރު ޑރ. އިސްމާއީލް ޝަފީގު ވިދާޅުވީ ބްލީ ކުރުމުގެ މައްސަލަތައް ސްކޫލްގައި ބްލީގެ ގިނަވަމުން ދާކަން ފާހަގަކުރެވިފައިވާ ކަމަށެވެ.
އަދި އެކަމަށް އޮތް އެންމެ ބޮޑު ގޮންޖެހުމަކީ އެކަށީވެންވާ ވަރަށް "ސްކޫލް ކައުންސެލަރުން" ނެތުން ކަމަށް ވިދާޅުވި އެވެ. މިނިސްޓަރު ވިދާޅުވީ ސަރުކާރުގެ 225 ސްކޫލު ހުރި އިރު، އޭގެ ތެރެއިން "ސްކޫލް ކައުންސެލަރުން" ތިބީ އެންމެ 51 ސްކޫލެއްގައި ކަމަށެވެ. އޭގެސަބަބުން ތަޢުލީމީ ނިޒާމުގެ ތެރޭގައި ކަމެއް ދިމާވިއަސް ބައެއް ފަހަރު ދޭން ޖެހޭ އަޅާލުމާއި އޯގާތެރިކަން ދިނުމުގައި ގޮންޖެހުންތައް ދިމާވާ ކަމަށް ވިދާޅުވި އެވެ.
އެހެންވެ ރައީސް ޑރ. މުހައްމަދު މުއިއްޒުގެ ލަފަ އާއި އިރުޝާދާ އެއްގޮތަށް ކައުންސިލަރުން ތަމްރީނު ކުރުމުގެ ޚާއްސަ މަސައްކަތްތަކެއް ފަށާފައިވާ ކަމަށް މިނިސްޓަރު ވިދާޅުވި އެވެ.
"މިމައްސަލައަށް ހައްލު ހޯދުމަށް ޓީޗަރުން ތަމްރީނު ކުރުމުގެ ޚާއްސަ ޕްރޮގްރާމުގެ ތެރެއިން ސެން ޓީޗަރުން ކައުންސިލަރުން އަދި ރާއްޖެއަށް ބޭނުން ވެފައިވާ ގިނަ އަދަދެއް ޓީޗަރުން ތަމްރީނު ކުރުމުގެ މަސައްކަތް އަޅުގަނޑުމެން މިހާރު މި ދަނީ ވިލަރެސްކުރަމުން،" މިނިސްޓަރު ވިދާޅުވި އެވެ. "މި ޕްރޮގްރާމުގެ ތެރޭގައި ކައުންސިލަރުން ތަމްރީނު ކުރުމަށް ޚާއްސަ އިސްކަމެއް ދެވިގެން ދާނެ."
ޝަފީގު ވިދާޅުވީ އެކަށީގެންވާ ވަރަށް "ސްކޫލް ކައުންސެލަރުން" ތަމްރީނުކުރެވި ސްކޫލްތަކުގައި ޙަރަކާތްތެރިވާން ފެށުމުން މިހާރު ކުރިމަތިވެފައިވާ ބުލީކުރުން ފަދަ މައްސަލަތަކަށް އެދެވޭ ހައްލެއް ލިބޭނެ ކަމަށެވެ.
މި އަހަރުގެ މިހާތަނަށް އެކި ސްކޫލުތަކުން ބުލީކުރުމުގެ 26 މައްސަލައެއް ހުށަހަޅާފައިވެ އެވެ.