ހުޅުމާލެ ހޮސްޕިޓަލަށް އާ އިމާރާރެއް އަޅައި، ޓާޝަރީ ފެންވަރަށް އެތަން ބަދަލު ކުރަން ހަމަޖެހިފައިވާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސް އިން ބުނެފި އެވެ.
ޕީއެސްއެމްގައި މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުލްރައްޒާޤް ޙަލީމް ވިދާޅުވީ ކުރިއަށް އޮތް ތިން އަހަރުގެ ތެރޭގައި ހުޅުމާލެ ހޮސްޕިޓަލް އިތުރަށް ތަރައްޤީކުރުމަށް ބޮޑު ޕްލޭނެއް ރާވާފައިވާ ކަމަށެވެ. އެގޮތުން މިހާރުގެ ހޮސްޕިޓަލްގެ ގޯތިތެރޭގައި އިތުރު 10 ބުރީގެ އިމާރާތެއް ހެދުމަށްޓަކައި، އެތަނުގެ ރިކުއަމަންޓަސް ހަދާފައިވާކަމަށާއި، ފައިނޭންސް ހަމަޖެހުނުހާ އަވަހަކަށް އެ މަސައްކަތް ފެށޭނެކަމަށް ވެސް ވިދާޅުވި އެވެ.
ރައްޒާގު ވިދާޅުވީ އާ އިމާރާތާ އެކީ ހޮސްޕިޓަލްގެ ޖާގަ 250 އެނދާ އެކީ ޕްރައިވެޓް ރޫމުތަކެއް ވެސް ގާއިމު ކުރުމަށް ޕްލޭންކޮށްފައިވާ ކަމަށެވެ.
"ކުރިއަށް އޮތް ތިން އަހަރު ދުވަހުގެ ތެރޭގައި އިރާދަކުރެއްވިއްޔާ މި އިމާރާތް ގާއިމް ކުރެވިއްޖެ ކަމަށް ވަނީ ނަމަ، ހުޅުމާލެ ހޮސްޕިޓަލަކީ ޓާޝަރީ ފެންވަރުގެ ޚިދުމަތް ދެވޭ ހޮސްޕިޓަލަކަށް ބަދަލު ވެގެންދާނެ." އޭނަ ވިދާޅުވި އެވެ.
އަލަށް ހަދާ އިމާރާތަށް މިހާރު ހުރި އިމާރާތުގެ ބައެއް މަސައްކަތް ބަދަލުކުރުމުން މިހާރުގެ އިމާރާތުގައި އަންހެނުންނަށް ދެވޭ ފަރުވާގެ ޚިދުމަތް ފުޅާކުރާނެ އެވެ.
ރައްޒާގު ވިދާޅުވި ހުޅުމާލެ ހޮސްޕިޓަލަށް މިހާރު ދިމާވާ އެންމެ ބޮޑު ގޮންޖެހުމަކީ، ރާއްޖޭގައި މިހާރު އެންމެ ބޮޑަަށް ކުރިއަރައި އާބާފީ އިތުރަމުން އަންނަ ސިޓީގައި ޚިދުމަތް ދިނުމަށް ހޮސްޕިޓަލުގެ ވަސީލަތްތައް މަދުވުންކަމަށެވެ. އެކަން ހައްލުކުރުމަށް މިއަހަރުތެރޭގައި ހަތަރު އޮޕަރޭޝަން ތިއޭޓަރުގައި މަސައްކަތްކުރަން ފަށާނެ ކަމަށާއި، އަދި އެންއައިސީޔޫ އާއި އައިސީޔޫގެ ޚިދުމަތްވެސް މިއަހަރުތެރޭ ފަށާނެ ކަމަށް ވިދާޅުވި އެވެ.
އަދި އިތުރުކުރެވޭ ހިދުމަތްތަކާ އެކީ ހުޅުމާލެ ހޮސްޕިޓަލުގައި ޑައެލެސިސް ހެދުމަށް އިތުރު 29 އެނދު އިތުރު ކުރުމުގެ މަސައްކަތް ވެސް ވަރަށް އަވަހަށް ފަށަން ވަނީ ނިންމައިފަ އެވެ.