އައްޑޫ ފޭދޫ ސްކޫލްގެ އާ އިމާރާތުގެ ބިންގާ ރޭ އަޅައިފި އެވެ.
ފޭދޫ ހިއްކި ބިމުގައި އަޅާ 40 ކްލާސްރޫމްގެ އާ އިމާރާތުގެ ބިންގާ އަޅުއްވައި ދެއްވީ އެޑިއުކޭޝަން މިނިސްޓަރު ޑރ. އިސްމާއީލް ޝަފީގެވެ. އެ ރަސްމިއްޔާތުގައި އެ މިނިސްޓްރީގެ ބައެއް ވެރިންނާއި ހޯމް މިނިސްޓަރު އަލީ އިހުސާނާއި އައްޑޫ މޭޔަރު އަލީ ނިޒާރުގެ އިތުރުން ފޭދޫ ސްކޫލްގެ ޕްރިންސިޕަލް އަހުމަދު މިހާރު ވެސް ބައިވެރިވެވަޑައިގެންނެވި އެވެ.
އާ އިމާރާތުގެ ބިންގާ އެޅުމުގެ ކުރިން މި މަޝްރޫއު ޑިޒައިން އެންޑް ބިލްޑް އުސޫލުން ކުރިއަށް ގެންދަން އެސްޖޭ ކޮންސްޓްރަކްޝަނާ އެކީ ސޮއިކުރަން ފޭދޫ ސްކޫލްގައި ސޮއިކުރުމުގެ ރަސްމިއްޔާތެއް ވެސް ބޭއްވި އެވެ.
ޑޭކެއާ ސެންޓަރެއް ވެސް ހިމެނޭ ގޮތަށް ފޭދޫ ސްކޫލްގެ އާ އިމާރާތް ހަދާ އިރު، މި މަޝްރޫއަށް ޖުމްލަ 145292400ރ. ހަރުދާނެ އެވެ. އަދި މި މަސައްކަތް 480 ދުވަހުހެ ތެރޭގައި ނިންމާނެ އެވެ.
އެޑިއުކޭޝަން މިނިސްޓްރީން ބުނި ގޮތުގައި ފޭދޫ ސްކޫލްގެ އާ އިމާރާތް ވާނީ ރާއްޖޭގެ ސްކޫލެއްގައި ހެދޭ އެންމެ ފުރަތަމަ ލެންގުއޭޖް ލެބްގެ އިތުރުން ފީފާ އިން ޤަބޫލުކުރާ ފެންވަރުގެ ޓާފްއެޅި ދަނޑެއްވެސް އޮންނާނެ ސްކޫލަކަށެވެ. އެހެންވެ މިނިސްޓަރު ޝަފީގު ވިދާޅުވީ މިއީ ރާއްޖޭގައި އާ ކަންތައްތަކެއް ތައާރަފުވެގެން ދާނެ ވަރަށް ތަފާތު ސްކޫލަކަށް ވާނެ ކަމަށެވެ.
ފޭދޫގައި ހުންނަނީ އެންމެ ސްކޫލެކެވެ. އެއީ ކީ ސްޓޭޖުން ފެށިގެން ގްރޭޑް 10 އަށް ކިޔަވައި ދެމުން އަންނަ ފޭދޫ ސްކޫލެވެ. މި ސްކޫލަށް މިހާރު ވަނީ 52 އަހަރުވެފަ އެވެ.
ފޭދޫ ސްކޫލްގެ އާ އިމާރާތުގެ ބިންގާ ރޭ އެޅި އިރު ސްކޫލަށް ދިމާވެފައިވާ ޖާގައިގެ ދަތިކަން ހައްލުކޮށް ދޭން އާ ސްކޫލެއް ބިނާކޮށް ދޭނެ ކަމަށް ކުރީގެ ސަރުކާރުން ވެސް ވައުދުވެފައިވެ އެވެ.