އައްޑު އަށް ބޭނުުންވާ ތަރައްގީ ގެންނަން އޮތް ހުރަހެއް ކަމަށް ދެކެވަޑައިގަންވަނީ އެ ސިޓީގެ މެޖޯރިޓީ "ވަކި ބަޔަކަށް" އޮތުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
މާލޭގައި އިިއްޔެ ރޭ އޮތް ކެމްޕޭން ޖަލްސާއެއްގައި ރައީސް ވިދާޅުވީ އައްޑޫގެ ތަރައްގީ ވަރަށް މުހިއްމުވިޔަސް ނަތީޖާ ނުނެރެވެނީ "ވަކި ބައެއް" ގެ ކޮންޓްރޯލް ދަށުގައި އައްޑޫ އޮންނާތީ ކަމަށެވެ. ރައީސްގެ އެ އިޝާރާތަކީ އައްޑޫ ސިޓީ ކައުންސިލާއި ރައްޔިތުންގެ މަޖިލީހުގެ އައްޑޫ މެންބަރުންގެ މެޖޯރިޓީ ވެސް އިދިކޮޅު އެމްޑީޕީ އަށް އޮތުމެވެ.
ފާހަގަކޮށްލެވޭ ކަމަކީ ކައުންސިލާއި އައްޑޫ މަޖިލިސް މެމްބަރުންގެ މެޖޯރިޓީ އަބަދު ވެސް އޮންނަނީ އެމްޑީއަށްކަމެވެ.
ރައީސް ފާހަގަކުރެއްވި ގޮތުގައި މި މަހު ބާއްވާ 20 ވަނަ މަޖިލިސް އިންތިހާބަކީ އެކަން ބަދަލުކުރަން އައްޑޫ ރައްޔިތުންނަށް ލިބޭނެ ފުރުސަތެކެވެ. އެހެންވެ އައްޑު އަށް ތަރައްގީ ބޭނުންވާ ނަމަ ރައްޔިތުންގެ އެއްބާރުލުން ސަރުކާރަށް ބޭނުންވާ ކަމަށް ވިދާޅުވި އެވެ.
"އައްޑޫ ރައްޔިތުންނަށް ބޭނުންވާ ކަންކަން ޙާޞިލުވުމުގައި އައްޑޫގެ ރައްޔިތުންގެ އެއްބާރުލުން ބޭނުންފުޅުވޭ." މަޖިލީހުގެ އައްޑޫ މެންބަރުންގެ މެޖޯރިޓީ ސަރުކާރު ހިންގާ ޕީއެންސީ އަށް ދޭން ޖެހޭކަން ފާހަގަކުރައްވައި ރައީސް ވިދާޅުވި އެވެ.
އެ މަނިކުފާނު ވިދާޅުވީ މި ސަރުކާރުން އައްޑޫ ތަރައްގީކޮށް، ހަގީގީ ސިޓީއަކަށް ހަދަން ބޭނުންވާ ކަމަށެވެ. އަދި އެކަން ކޮށްދޭނެ އަދި ކޮށްދެވޭ ސަރުކާރަކީ ވެސް މިއީ ކަމަށެވެ. އެހެންވެ އެކަމާ ރައްޔިތުން ވިސްނަން ޖެހޭ ކަމަށް ވިދާޅުވި އެވެ.
"ޓޫރިޒަމް ދާއިރާއިން އައްޑޫގެ ޓޫރިޒަމް އައްސޭރި ޓޫރިޒަމް. އެއާޕޯޓުގެ މަސައްކަތް އަވަސްކޮށް ފުޅާކޮށް، ބްރިޖުގެ މަސައްކަތް، އެކި ކަހަލަ ޢުމްރާނީ ތަރައްޤީގެ މަސައްކަތް ފެށުމުގެ މަސައްކަތް އަދި ފެށިފައި ހުރި ކަންކަން ބާރަށް ކުރިއަށްގެންދިއުމަށް މި ހުރިހާ ކަމެއް މިދަނީ ކުރަމުން." ރައީސް ވިދާޅުވި އެވެ.
ރައީސް ވިދާޅުވީ މަޖިލީސްތެރެއިން ސަރުކާރަށް އެއްބާލެއްވުން ދޭނެ މެމްބަރުންތަކެއް ތިބެން ޖެހޭ ކަމަށެވެ. އަދި އެހެން ބަކަޔަށް މަޖިލީހުގެ މެޖޯރިޓީ އެހެން ބަޔަކަށް ދީފި ނަމަ އެ މަނިކުފާނު ފައްޓަވާފައިވާ ތަރައްޤީގެ މަސައްކަތްތައް ހުއްޓިގެން ދާނެ ކަމަށެވެ.
މި މަހުގެ 20 ގައި ބާއްވާ މަޖިލިސް އިންތިހާބުގައި އައްޑޫން 29 ކެންޑިޑޭޓަކު ވާދަކުރެ އެވެ. އެގޮތުން އައްޑޫގެ 8 ދާއިރާ އަށް ވެރިކަންކުރާ ޕީއެންސީގެ މެމްބަރުން ވާދަކުރެ އެވެ.