ފިތުރުއީދު ކުލަގަދަކޮށް ފާހަގަކުރުމަށް ރައީސް ޑރ. މުހައްމަދު މުއިއްޒު ނިންމެވި ނިންމެވުމަކީ ދީނީ އިޙްތިފާލުތަައް ކުލަގަދަ ގޮތެއްގައި ފާހަގަކުރެއްވުމަށް އެމަނިކުފާނު ދެއްވާ ސަމާލުކަން ހާމަވާ ކަމެއްކަމަށް އިސްލާމީ ކަންތައްތަކަކާ ބެހޭ ވުޒާރާއިން ބުނެފިއެވެ.
ފިތުރު އީދު ފާހަގަކުރުމަށް ސިޓީތައް އަދި އަތޮޅު ވެރިކަންކުރާ ރަށްތައް ވަނީ ދިއްލާފައެވެ.
އެކަމާ ގުޅިގެން އިސްލާމިކް މިނިސްޓްރީން ނެރުނު ނޫސްބަޔާނެއްގައި ބުނެފައިވަނީ ރައީސް ޑރ. މުހައްމަދު މުއިއްޒު މަގާމާ ހަވާލުވެވަޑައިގެން، ދިވެހިންގެ އިސްލާމީވަންތަކަން އިތުރަށް ހަރުދަނާ ކުރެއްވުމަށް ދީނީ ތަފާތު މުނާސަބަތުތައް ކުލަގަދަ ގޮތެއްގައި ފާހަގަކުރެއްވުމަށް ސަމާލުކަން ދެއްވާ ކަމަށާއި އެކަމަށް ޝުކުރުވެރިވާ ކަމަށެވެ.
އިސްލާމިކް މިނިސްޓްރީން ބުނެފައިވަނީ ކުލަގަދަގޮތެއްގައި އީދު ފާހަގަކުރުމަށް ރައީސް މުއިއްޒު ފެއްޓެވި މަސައްކަތްޕުޅުން ހާމަކޮށްދެނީ ދީނީ އިޙްތިފާލުތަައް ކުލަގަދަ ގޮތެއްގައި ފާހަގަ ކުރެއްވުމަށް އެމަނިކުފާނު ދެއްވާ ސަމާލުކަން ކަމަށެވެ.
"މިކަމަކީ އެންމެހާ ދިވެހި ލޮބުވެތި ރައްޔިތުންނާއި ދިވެހިރާއްޖޭގައި ދިރިއުޅޭ އެންމެހާ މުސްލިމު އަޚުންނާއި އުޚުތުންގެ މޫނުތަކަށް އީދުގެ ހިނިތުންވުން ގެނެސްދީ ހިތްތަކަށް އުފާވެރިކަމާއި ހިތްހަމަޖެހުން ގެނެސްދޭނެކަމެއްކަން ކަށަަވަރެވެ." އިސްލާމިކް މިނިސްޓްރީން ބުނެފައިވެއެވެ.
އެ މިނިސްޓްރީން ވަނީ އީދު ކުލަގަދަކޮށް ފާހަގަކުރެއްވުމަށް ނިންމެވުމުން އެކަމަށް ރައީސް މުއިއްޒުއަށް ޝުކުރު ދަންނަވާފައެވެ.
ރާއްޖޭގެ ސިޓީތަކާއި އަތޮޅު ވެރިކަން ކުރާ ރަށްތަކުގައި ރޭ "އީދު އަލި" ދިއްލާފައިވެއެވެ.