މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި 47 ރަބަރު ޕެކެޓާ އެކު ހުޅުމީދޫން ފުލުހުންގެ ބެލުމުގެ ދަށަށް ގެންގޮސްފި އެވެ.
މި މައްސަލަ އާ ގުޅިގެން ފުލުހުންގެ ބެލުމުގެ ދަށަށް ގެންދިޔައީ 37 އަހަރުގެ ދިވެހި ފިރިހެނެކެވެ.
އޭނާ ފުލުހުންގެ ބެލުމުގެ ދަށަށް ގެންދިޔައީ ފުލުހުންނަށް ލިބުނު މަޢުލޫމާތަކާ ގުޅިގެން ހުޅޫމީދޫ ޕޮލިސް ސްޓޭޝަންގެ ފުލުހުން ކުރި މަސައްކަތުން މި މަހުގެ 3 ވަނަ ދުވަހުގެ 7:53 ހާއިރު އޭނާ ދިރިއުޅެމުންދާ ގެއިންނެވެ.
މަސްތުވާތަކެތި ކަމަށް ޝައްކު ކުރެވޭ އެއްޗެއްހުރި ރަބަރު ޕެކެޓްތައް ފެނިފައި ވަނީ އޭނާ އުޅެމުންދާ ކޮޓަރި ބަލައި ފާސްކުރި އިރު އެކޮޓަރި އެނދު މަތިންނެވެ.
މި މައްސަލަ އާ ގުޅިގެން ފުލުހުންގެ ބެލުމުގެ ދަށަށް ގެންދިޔަ މީހާއަކީ މަސްތުވާތަކެތި ގެންގުޅުމާއި ބޭނުން ކުރުމުގެ މައްސަލަތަކުގެ އިތުރުން ވައްކަމާއި ފޭރުމުގެ މައްސަލަތަކުގެ ރެކޯޑް ވެސް އޮންނަ މީހެކެވެ.