ރާއްޖޭގެ މިހާރުގެ ސަރުކާރު ވަރުގެ އިތުބާރު ކުރެވޭ ސަރުކާރެއް ނުފެންނަ ކަމަށް ކުރިއަށް އޮތް މަޖިލިސް އިންތިހާބުގައި އިންތިހާބުގައި މާފަންނު އުތުރު ދާއިރާ އަށް ވާދަކުރައްވާ ދަނގެތީ ދާއިރާގެ މިހާރުގެ މެންބަރު ކާނަލް މުހައްމަދު ނާޒިމް ވިދާޅުވެއްޖެ އެވެ.
ރޭ ރައީސް ޑރ. މުހައްމަދު މުއިއްޒާ ވެސް އެކީ ބޭއްވި ކެމްޕޭން އިވެންޓެއްގައި ކުރީގެ ޑިފެންސް މިނިސްޓަރު ވިދާޅުވީ އޭނަ މިހާރު ކުރިމަތިލައްވާ ދާއިރާގެ ރައްޔިތުންނަށް ދިމާވެފައިވާ ހުރިހާ މައްސަލަތަކެއް ހައްލު ހުރީ މި ސަރުކާރުގައި ކަމަށެވެ. އެގޮތުން ބޯހިޔާވަހިކަމުގެ މައްސަލަ އާއި ޒުވާނުންނަށް ދިމާވެފައިވާ ވަޒީފާގެ މައްސަލަތައް ފަދަ ކަންކަން ހައްލު ކުރުމަށް ރައީސް މުއިއްޒާ އެކީ ސާބިތުވެ ހުންނަވާނެ ކަމަށް ވިދާޅުވި އެވެ.
"މިއަދު އަޅުގަނޑުމެންނަށް މިނިވަންކަން އިހުސާސް އެބަވޭ އެކަން، ދިދި ވިހުރުވިގެންދާއިރު އެ މިނިވަންކަން އެބަ އިހުސާސްވޭ، ފައިސާ ޗާޕު ކުރުން ފުރަތަމަ ފަހަރަށް ހުއްޓާލީ މި ސަރުކާރުން. އަޅުގަނޑު މިހިރީ ފަޚުރުވެރިކަމާއެކު ރައީސްގެ އަރިހުގައި،" ސަރުކާރު ކޯލިޝަންގައި ހިމެނޭ މޯލްޑިވްސް ނެޝަނަލް ޕާޓީ (އެމްއެންޕީ) ގެ ލީޑަރު ވިދާޅުވި އެވެ. "ރާއްޖޭގެ ތަރައްގީގެ ދުވެލި މިއަދު މިވަނީ ބާރަށް ޖަހާފައި، އެބަ ފެނޭ ރާއްޖޭގެ އިޤްތިސާދީ ސަރަހައްދު ބެލެހެއްޓުމުގައި ރައީސް ނެންގެވި ހިކުމަތްތެރި ފިޔަވަޅު، އަޅުގަނޑު ކުރީގެ ސިފައިންގެ މީހެއްގެ ހައިސިއްޔަތުން ވަރަށް ފަޚުރުވެރިވި ދުވަހެއް އެއީ."
މިދިޔަ އަހަރުގެ ރިޔާސީ އިންތިހާބުގައި ވެސް ވާދަކުރެއްވި ނާޒިމު ވިދާޅުވީ ސަރުކާރު ހިންގުމަށް ބޭނުންވާ މުހިންމު ގާނޫނުތައް ފާސްކުރުމަށް ރައްޔިތުންގެ މަޖިލީހުގެ މެޖޯރިޓީ ސަރުކާރަށް މުހިންމު ކަމަށާއި މަޖިލީހުގެ މެޖޯރިޓީ ލިބުމުން ތަރައްގީ ޔަޤީންވެގެން ދާނެ ކަމަށެވެ.
އެހެންވެ އެންމެން ވެސް ސަރުކާރުގެ ކެންޑިޑޭޓުންނަށް ވޯޓް ދީ، ސަރުކާރުގެ ގޮނޑިތައް ފުރާލުމަށް ނާޒިމް ވަނީ އެދިވަޑައިގަތެވެ. އެވެ.