ރައްޔިތުންގެ މަޖިލީހުގެ އިންތިހާބުގެ ކެމްޕޭންގެ ތެރެއިން އިދިކޮޅު އެމްޑީޕީން އެންޓި ކެމްޕޭން ކުރަމުން ގެންދާ ކަމަށާއި އެކަން އިލެކްޝަންސް ކޮމިޝަނަށް ހުށަހަޅާނެ ކަމަށް ޕީއެންސީން ބުނެފިއެވެ.
ޕީއެންސީން މިއަދު ކުރިއަށްގެންދިޔަ ނޫސްވެރިންގެ ބައްދަލުވުމުގައި މަޖިލީހުގެ އިންތިހާބުގެ ކެމްޕޭން ސްޕޯކްސްޕާސަން ހީނާ ވަލީދް ވިދާޅުވީ ދޮގު ވާހަކަތައް ފަތުރައިގެން އެމްޑީޕީން އެންޓި ކެމްޕޭން ކުރަމުން ގެންދާކަމަށެވެ.
އެގޮތުން ސޯޝަލް މީޑިއާގެ އެކި ޕްލެޓްފޯމް ތަކުގައި ލާރި ދީގެން، ޕީއެންސީއާ ދެކޮޅަށް ދޮގު ވާހަކަތައް ދައްކާ އެންޓި ކެމްޕޭން ކުރަމުން ގެންދާ ކަމަށް ހީނާ ތުހުމަތު ކުރެއްވިއެވެ.
ހީނާ ވިދާޅުވީ އެންޓި ކެމްޕޭން ކުރުމަކީ ޤާނޫނާވެސް ހިލާފު ކަމެއް ކަމަށާއި އެހެންކަމުން މިފަދަ މައްސަލަތައް އިލެކްޝަންސް ކޮމިޝަނަށް ހުށަހެޅުމަށް ނިންމާފައިވާ ކަމަށެވެ.
ރައްޔިތުންގެ މަޖިލީހުގެ އިންތިހާބުގެ ކެމްޕޭން އެމްޑީޕީން އަދި ޕީއެންސީން އަންނަނީ ފޯރީގައި ކުރިއަށް ގެންދަމުންނެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އޭޕްރިލް 21 ވަނަ ދުވަހުއެވެ. 20 ވަނަ މަޖިލިސް އިންތިހާބުގައި ޖުމްލަ 368 ކެންޑިޑޭޓުން ވާދަކުރެއެވެ. މީގެ ތެރޭގައި ހިމެނީ 326 ފިރިހެން އަދި 42 އަންހެން ކެންޑިޑޭޓުންނެވެ. 20 ވަނަ މަޖިލީހަށް 93 މެންބަރަކު އިންތިހާބު ކުރާނެއެވެ.