(އެޕްރީލް 5، 2015 ވަނަ ދުވަހުގެ ބަޔާ ގުޅޭ)
އިސްބަގޫލުންގެ ތެރޭގައި ގަރާރުވުން
މިނިކާރާއްޖޭގެ ފަނޑިޔާރުގޭގެ ބައްޓަމަކީ ތަށިބަރީގެ ބައްޓަމެވެ. މި ތަށިބަރީގެ އެންމެ މަތީގައިވާ އެންމެ އިސް ކޯޓަކީ އިސްބަގޫލު ކޯޓެވެ.
ފަހެ މި ކޯޓަށް ވަދެނިކުމެވާ މީހުންގެ ސިފަވެސް ތަށިބަރިވުން ލާޒިމު ކަމަށް ކިޔަތެވެ. މި ކޯޓުގައި ވަލީ މަހީދު ހަމަ ގަރާރުވުމާއެކު ބުރުހާނު ސަހުމީ މީނާގެ ބޭނުން ހިފާން ދިމާކޮށްފި އެވެ. ބުރުހާނަކީ ނިކަން ހިޔަޅު ވިސްނުމެއްގެ ވެރިއެކެވެ.
މީނާގެ އަމިއްލަ ފޯނުން ވަލީ މަހީދަށް ގުޅައިގެން ޒާތްޒާތުގެ އަމުރު ކުޅައުމުގެ ބަދަލުގައި މެދުވެރިއަކު ބޭނުންކުރުން ޚިޔާރު ކޮށްފި އެވެ. އެއީ ވަލީ މަހީދުގެ ވިސްނުން ބަދަލުވެ ލޮޓިޔެއް ދޭންކަމަށް ފޯންކޯލް ރިކޯޑު ކޮށްފާނެ ކަމުގެ ބިރަށްޓަކަ އެވެ.
ބުރުހާނުގެ އެންގުންތައް ވަލީ މަހީދާ ހަމައަށް ގެންގޮސްދިނުމުގެ ގާސިތަކަށް ބުރުހާނު އިޚުތިޔާރު ކުޅައީ ގޯލްޑަންރޭ ދައީސު އެވެ. މިއީ ފޭދުސްތާނަށް ނިސްބަތްވާ ސާދާގަރެކެވެ. މީނާއަކީ ވަރަށް ކުރީއްސުރެ ވަލީ މަހީދުގެ ރަހުމަތްތެރިއެކެވެ. އަދި ބުރުހާނުގެ ވެސް ވަރަށް ގާތް މީހެއްމެ އެވެ.
އިސްބަގޫލު ކޯޓުގެ ފައިސަލާކުރުމަށް ހުށައެޅޭ ކޮންމެ މައްސަލައަކީ ނިސްބަތުން މިލިއަން ދީނާރުގެ މައްސަލައެކެވެ. ބުރުހާނުގެ ކަމަކީ އިސްބަގޫލަށް ވަންނަ ކޮންމެ މައްސަލައެއްގެ އެކޮޅު މިކޮޅުބަލައި އެކަށީގެންވާ އަދަދެއްގެ ދީނާރުދޭން އެއްބަސްވާ ބަޔަކު ތިބިނަމަ އެބައެއްގެ ކޮޅަށް ފައިސަލާކޮށްދޭން ކަމަށް ވައުދުވެ ފައިސާ އަތުލުމެވެ.
ވަކިގޮތަކަށް ނިންމައިދޭން ބުރުހާނު އެދުނު ފުރަތަމަ މައްސަލައަކީ މިނިކާރާއްޖޭގެ ރަންބިސް އަޅާ ކުކުޅުގެ މައްސަލައެކެވެ. އެކުކުޅުގެ ބިސްހާލި ތަކުގެ ތެރެއިން ހާއްޔެއްގެ މިލްކުވެރިކަން ކަނޑައަޅައިދިނުމުގެ މައްސަލައެއް އިސްބަގޫލު ކޯޓަށް ވަނުމާއެކު ބުރުހާނު ވަނީ ހައެއްކަ މިލިޔަން ދީނާރަށް މައްސަލަ ނިންމައިދޭން ކަމަށް އެއްބަސްވެ އަހުދުނާމާއެއް ހަދައިފަ އެވެ. ވަލީ މަހީދަކީ ތިމަންނާގެ ޚާދިމެކޭ ތިމަން މިއީ އޭނާގެ ސާހިބު މީހާއޭ ބުނެ ސަޅި ބައިސާ ކަނޑާފަ އެވެ.
އިސްބަގޫލު ކޯޓުން މައްސަލަ ފައިސަލާކުރީ ބުރުހާނު އެންގިގޮތާ މުޅިން ޚިލާފަށެވެ. ބުރުހާނު އެއްލި އެންގަނޑު ދިޔައީ މުޅިން ޗޮކުންނެވެ. މިކަމާ ހިތާނުވެގެން ގޯލްޑަންރޭ ދައީސު މެދުވެރިކޮށް ބުރުހާނާ ހަމައަށް ވަލީ މަހީދު ގެނެސް ސުވާލުކުރީމާ ވަލީ މަހީދު ބުންޏެވެ. ސާހިބާ ބުރުހާނު އެވެ.
ނިކަމެތި އަޅާ އެކޯޓަށް ވަދެ އަދި މިއުޅެނީ ރަނގަޅަށް ގަރާރުވެސް ނުވެގެންނެވެ. ތިޔަ ވިދާޅުވާ މައްސަލަ އޮތީ މާކުރީގައިވެސް ފައިސަލާކޮށް ނިމިފަ އެވެ. އޭގެތެރެއަށް އަތްބާނައި ގަނޑުބަޑުކުރާކަށް މި އަޅާއަށް ފުރުސަތެއް ނުލިބުނެވެ. ކިތަންމެ ވަރަކަށް ވެސް އުޅުނީމެވެ. އެކަމަކު ނުވި އެވެ.
މި މޭރުމަކުން ވަލީ މަހީދު ރޮއި ހޭރި އާދޭސްކޮށްގަތީމާ ދެން އެންމެ ރަނގަޅޭ އެންމެ ރަނގަޅޭ ދެންވެސް އަންގާ ގޮތަށް ކަންކަން ކުރަން ވިސްނާށޭ ކިޔައި އިންޒާރު ދީފައި މީނާ ފޮނުވާލައިފި އެވެ. މާގިނަދުވަސްތަކެއް ނުވެ އަނެއްކާވެސް މައްސަލައެއްގެ އެއްކޮޅުގައި ބުރުހާނު ހިފައިފި އެވެ.
މިފަހަރުވެސް ރަންބިސް އަޅާ ކުކުޅެއްގެ މައްސަލައެވެ. މައްސަލައިގެ ޚުލާސާއަކީ ބިސްއަޅަންވާވަރަށް ބިސް ނޭޅުމެވެ. މިފަހަރުވެސް ބުރުހާނުގެ އެންގުން ދިޔައީ ޗޮކުންނެވެ. ކުރިއަށްވުރެވެސް ބޮޑަށް ރުޅިއައިސްފައި ވަލީ މަހީދަށް ބަވައިލީމާ މީނާ ބުންޏެވެ. ސާހިބާ ބުރުހާނު އެވެ. ކޯފާ މައިތިރިކުރައްވާށެވެ.
މިފަހަރު ވީގޮތަކީ ދެން ތިއްބެވި ފަނޑިޔާރުންނަށް މާމަތިން އޯޑަރު އައިސްގެން މަނިކުފާނުގެ އެންގެވުން ތޮޅިއަށް ދިޔައީ އެވެ. ދެން ފަހަރަކުން ހަމަހިލާ އެހެން ވިޔަކަ ނުދޭނަމެވެ.
ދެތިން މަހަށް ފަހު އަނެއްކާވެސް މިލިއަން ދީނާރުގެ މައްސަލައެއްގެ އެއްކޮޅުގައި ބުރުހާނު ހިފައިފި އެވެ. މިފަހަރު އަމުރުކުޅައެވެ. މިއީ ފަހު ފަހަރެވެ. މިފަހަރު ދެން ކަލޭގެ ވަފާތެރިކަން ހުރި މިންވަރު އަހުރެން ބަލާނަމެވެ. މިހެން އަންގައިފައި އެކުވެރީންގާތު ސަޅިބައިސާ ކަނޑާން ހުއްޓައި އިސްބަގޫލު ކޯޓުގެ ހުކުމް އައީ މީނާ އެދިއެދި ހުރިގޮތާ މުޅިން ޚިލާފަށެވެ.
މިކަމާއި މެދު ރުޅިއައިސް ފުފިގެން ގޯލްޑަންރޭ ދައީސު މެދުވެރިކޮށް ބުރުހާނުގެ ދަރުބާރަށް ހާޒިރުވާން ވަލީ މަހީދަށް އަންގައިފި އެވެ. މިހައިރު ވަލީ މަހީދު ހުންނަނީ އިސްބަގޫލުގެ ވައިފެނަށް ހިސާބަކަށް ހޭނި ބިރު ކެނޑިފަ އެވެ. އެހެންވެގެން ތޯއްޗެކެވެ. ބުރުހާނުގެ ދަރުބާރަށް ހާޒިރުވާން ހަމައެކަނި ދެކޮޅު ހެދީކީއެއް ނޫނެވެ.
ބުރުހާނަކީ މި ޒާތުގެ ކަންތައް މޭރުންވާވަރަށް ވުރެ އަދި ތަސައްރަފު ނުފުދޭ ކުޑަކުއްޖެކޭ އިހަށް މައިތިރިވެގެން ހުރެބަލާށޭ ބުނެ ގޯލްޑަންރޭ ދައީސަށް މެސެޖުދީ ބުރުހާނާ ހަމައަށް ފޮނުވައިފި އެވެ.
ބުރުހާނުގެ ހިތުގައި ޖެހުން
ބުރުހާނަކީ އަދި ކުޑަކުއްޖެކޭ ވަލީ މަހީދު ބުނީމާ ބުރުހާނު ހަމައެކަނި ރުޅިއައިއަކީ ނޫނެވެ. ނިކަން ރަނގަޅަށް ހިތުގައިވެސް ޖެހިއްޖެ އެވެ.
އެހެންޏާ ފަހެ މިހެން ނުވާންވީ ސަބަބެއްވެސް ނެތްތާ އެވެ. އެބުނާ ތަނަކަށް ވަލީ މަހީދު ލީ ބުރުހާނު ފިޔަވައި އެހެން މީހެއް ނޫނެވެ.
މިހައިރު ފިޔަފަޅައި އުދުހެވޭން ފެށީމާ ބުރުހާނާ ދިމާލަށް އެބުނަނީ ތިޔައީ ތަސައްރަފު ނުފުދޭ ކުޑަކުއްޖެކޯލަ އެވެ. ހަރާންކޯރުވުމުގައި ވެސް މިއޮތީ އިމުން ބޭރުވެފަ އެވެ.
ރުޅީގެ އަލިފާނުގައި ބުރުހާނު ކިތަންމެ ބޮޑަށް އެނދިނަމަވެސް މިކަމުގެ ހިލަމެއް އެއްވެސް މީހަކަށް ފޯރިޔަނުދީ ބޭރުފުށުން ނިކަން މަތިއޮމާންކޮށްގެން ބުރުހާނު އެބަހުރެ އެވެ.
އަދި އިހުނަށް ވުރެ ވެސް ވަލީ މަހީދަށް ހެޔޮއެދޭކަން ދައްކާން ފަށައިފި އެވެ. މިހެން މަތިއޮމާންކޮށްގެން ދަޅަދައްކައިގެން ހުރި ހުރުމުގައި ކަލަމިންޖާ ގަޝީދުގެ ލަވަ ޕާޓީއާ ގުޅުން ހުރި މައްސަލައެއް ފައިސަލާ ކުރުމަށް އިސްބަގޫލު ކޯޓަށް ހުށައެޅިއްޖެ އެވެ. މި މައްސަލަ ނިމުނީ ލަވަޕާޓީއާ އެއްކޮޅަށެވެ.
މަޖާކޮށްލަން ބެންކޮކަށް ކުރި ދަތުރު
ބުރުހާނު ބޭނުންވާގޮތަށް މައްސަލަ ނިންމައިދިންކަމުގެ އުފަލުގައި މަޖާކޮށްލައި ސަމާސާކޮށްލަން ބެންކޮކޭ ކިޔުނު ޝައިތާނީ ރާއްޖެއަށް ދިޔުމަށް ބުރުހާނު ދަތުރެއް އިންތިޒާމްކޮށްފި އެވެ. މި ދަތުރުގައި ބައިވެރިވަނީ ވަލީ މަހީދާއި ބުރުހާނުގެ އިތުރުން ގޯލަޑަންރޭ ދައީސާއި ބުރުހާނުގެ ކޮއްކޮ އަޒަރުބައިޖާނާއި ބުރުހާނުގެ ތިމާގެ މީހެއްކަމަށްވާ ހުޅުދުސްތާނުގެ ފަރުހަތެވެ. މިފަރުހަތަކީ އަތުރުކުރީ ގަޑިޔާއި މޯބައިލްފޯނު ފަދަ ތަކެތި މަރާމާތުކުރާ ދުއްކާނެއް ކަމަށްވާ ސެލްނެޓް ނާރިނގު ގެ ވެރިމީހާ އެވެ.
މި ދަތުރު އިންތިޒާމް ކުޅައުމުގެ ހަގީގީ ސަބަބަކީ ވަލީ މަހީދު ވަކަރަށް ޖަހައިލުމެވެ. ބުރުހާނަކީ ކުޑަކުއްޖެއްކަމަށް ވަލީ މަހީދު އޮތީ ބުނެފަ އެވެ. އެހެންވީމާ ކުޑަކުއްޖެއް ނޫންކަން ދެއްކުމާއި އެކު ވަލީ މަހީދު މައިތިރިކޮށްގެން ބުރުހާނުގެ މުށުތެރޭގައި ގެންގުޅެވޭނެ އެހެން މަގެއް އޮތީ ހޯދަން ޖެހިފަ އެވެ.
މިދަތުރުގެ ބޭނުމަކީ އެމަގު ހޯދަން މަގު ފަހިކޮށް ބައެއް ކަހަލަ ކަންކަމުގެ އަޖުމަ ބަލައިލުމެވެ. ޚާއްސަކޮށް އައްޔާޝީ ކަންކަމަށް ވަލީ މަހީދު ފޯރި ހުންނަ މިންވަރު ބެލުމާއި ބުރުހާނު ދެން ރާވާ ރޭވުމެއްގައި ވަލީ މަހީދު ކިހާ ފަސޭހައިން ޖެހިދާނެތޯ ބެލުމެވެ.
ބުރުހާނުގެ ޖަމާއަތުގެ މީހުން ބެންކޮކަށް ފައިބައި ތިބީ މިނިކާރާއްޖޭގެ މުސާފިރުން އާއްމުކޮށް ގޮސްނޫޅޭ ހިސާބެއްގަ އެވެ. އެހިސާބުގައި ތިބެގެން ނިކަން ލޮނު ހެޔޮވަރުކޮށް މިބައިމީހުން މަޖާކޮށްފޫ އެވެ. މަޖަލަކަށް ހަދައިގެން ކޮށްފައި ނުކުރާކަށް ވަކި ކަމެއް ނެތެވެ.
މި ހިސާބުން ބުރުހާނަށް އެނގި ކަށަވަރުވީ އައްޔާޝީ ކަންކަމަށް ވަލީ މަހީދަކީ ފިސާރި ރަނގަޅަށް ވަދެ ހުރި މީހެއް ކަމެވެ. އެހެންކަމުން މި މަޅީގައި ބައްދައިގެން ވަލީ މަހީދު ނިކަން ރަނގަޅަށް ތާށިކޮށްލެވިދާނެ ކަމަށް ބުރުހާނު ޔަގީންކޮށްފި އެވެ.
ދަންތުރައިގައި ޖެއްސުމުގެ ފުރަތަމަ ރޭވުން
ބެންކޮކް ދަތުރަށްފަހު މި ޖަމާއަތުގެ މީހުން އެނބުރި މިނިކާރާއްޖެއަށް އައީ ވަރަށް ވެސް އުފަލުންނެވެ. ދެން އެންމެ އަވަހަށް ލިބޭ ފުރުސަތެއްގައި މިފަދަ އެހެން ދަތުރެއް ލިބުމަށް އެދިގެން ތިބެ އެވެ.
ދަނޑިވަޅު ބަލަން ހުރި ބުރުހާނު އަނެއްކާވެސް މިފަދަ އެހެން ދަތުރެއް އިންތިޒާމުކޮށްފި އެވެ. މިނިކާރާއްޖެއަށް އައި ކުޑަވަރެއްގެ އީދަކާ ދިމާކޮށް މި އެންމެން ސިންގަޕޫރަށް ފުރައިފި އެވެ. ސިންގަޕޫރަށް ފައިބައި އެންމެން ތިބީ އެއް ހޮޓަލެއްގެ އެއް ފަންގިފިލާގައި ހުރި ކޮޓަރިތަކެއްގަ އެވެ.
މި ދަތުރުގައި ބުރުހާނާއި ސެލްނެޓް ނާރިނގު ފަރުހަތު ރާވައިގެން ތިބީ ވަލީ މަހީދުގެ ކޮޓަރީގެ މޭޒުމަތީގައި ބަހައްޓާފައި ހުރި މާވަށިގަނޑެއްގެ ތެރޭގައި ކުޑަވަރެއްގެ ޖާސޫސީ ކެމެރާއެއް ހަރުކޮށް ވަލީ މަހީދުގެ ކައިރިއަށް ވަނާތައް ބޮޑު ނާސި އަންހެނަކު ވައްދައި ދެން ތަމްސީލުވާ ހުރިހާކަމެއް އެ ކެމެރާއިން ރިކޯޑު ކުރުމަށެވެ.
މި ދެމީހުން މިކަންތައް ކޮށްފިއެވެ. ދެތިން ދުވަހު މިތާގައި ތިބެފައި ފުރާންވީމާ އެއްކަލަ ކެމެރާ ބަލައިލިއިރު ކަމުދާކަށް ނެތެވެ. ކެމެރާ އޮތީ ބޯކޮޅު ވަތަށް ވެއްޓިފަ އެވެ. އެއިން ނެގިފައިހުރި މަންޒަރަކީ ވަށިގަނޑުގެ މުށިގަނޑެވެ.
މިކަމާއި މެދު ބުރުހާނު ކިތަންމެ ވަރަކަށް ހިތާމަކުޅައެއް ކަމަކު ދެން ހެދޭނެ އެހެން ގޮތެއް ނެތެވެ. ފަރުހަތާއި މަޝްވަރާކުރުމަށްފަހު ބުރުހާނު ނިންމީ ނިކަން ރަނގަޅަށް ތައްޔާރުވެގެން ފެއިލް ނުވާނެ ހުރިހާ ގޮތަކަށް އިސްކަން ދީގެން އަލުން ބަލުން މިފަދަ އެހެން ދަތުރެއް އިންތިޒާމް ކުރުމަށެވެ.
(ނުނިމޭ)