މި ސަރުކާރުން އައްޑޫގައި އަޅަން ނިންމާފައިވާ ބްރިޖްގެ މަޝްރޫއަށް އެމްޑީޕީގެ އެއްބާރުލުން އޮންނާނެ ކަމަށް ކުރީގެ ރައީސް އިބްރާހީމް މުހައްމަދު ސޯލިހު (އިބޫ) ވިދާޅުވެއްޖެ އެވެ.
މި މަހު ބާއްވާ ރައްޔިތުންގެ މަޖިލިސް ކެމްޕޭނަށް އައްޑު އަށް ވަޑައިގެން ރޭ ފޭދޫގައި ބޭއްވި ޖަލްސާއެއްގައި އެ މަނިކުފާނު ވިދާޅުވީ ހުޅުމީދު އާއި ހުތަދޫ ގުޅުވައިކަން ބުރިޖު އެޅުމުގެ ކުރިން އައްޑޫގެ އިގުތިސާދީ މަސައްކަތްތަކެއް ކުރަން ޖެހޭ ކަމަށެވެ. އެކަމަކު ބުރިޖުގެ މަޝްރޫއުއަށް އެމްޑީޕީގެ ފުރިހަމަ ތާއީދާއި އެއްބާރުލުން އޮންނާނެ ކަމަށް ވިދާޅުވި އެވެ.
އިބޫ ވިދާޅުވީ އައްޑޫގައި ބުރިޖު އެޅުމުގެ ކުރިން އެ ބުރިޖުގެ މަތިން ދަތުރު ކުރާނެ ސަބަބެއް ވެސް އުފަން ކުރުވަން ޖެހޭ ކަމަށެވެ.
"މިއަދުގެ ސަރުކާރުން ވައުދުތަކެއް އެބަވޭ، އަޅުގަނޑު ހިތުން ހުޅުމީދު އާއި ހިތަދޫ ގުޅައިލުމުގެ ވާހަކަތަކެއް އެބަ ދެކެވޭ އެކަން. ކުރައްވަންވީ،" އިބޫ ވިދާޅުވި އެވެ. "އެހެން ނަމަވެސް ތަރުތީބެއް އޮންނަންޖެހޭނެ ކަންތައްތަކުގައި، ކުރައްވަންވީ އަޅުގަނޑުމެންގެ ފުރިހަމަ ތާއީދު އެކަމަށް އޮންނާނެ، ރައްޔިތުންގެ މަޖިލީހުގެ ތެރެއިން އަޅުގަނޑުމެންގެ މެންބަރުންގެ ފަރާތުން ލިބެން ޖެހޭ ހުރިހާ ތާއީދެއް އެކަމަށް އޮންނާނެ."
އެ މަނިކިފާނު ވިދާޅުވީ ފުރަތަމަ ކުރަންވީ ކަމަކީ އައްޑޫގައި ވަޒީފާތަކެއް އުފައްދައި އިގުތިސާދީ މަސައްކަތްތަކެއް ކުރުން ކަމަށާއި މިދިޔަ ފަސް އަހަރު ދުވަހު އެމްޑީޕީން ކުރަމުން ދިޔައީ އެ މަސައްކަތް ކަމަށޢެވެ.
"އަޅުގަނޑު ހިތުން އަޅުގަނޑުމެން ފަށާފައި ހުރި މަސައްކަތްތަކަކީ އެއީ. މިތަނުގައި ބަޔަކަށް ދިރިއުޅެވޭނެ ގޮތް ހޯދައި ދިނުން، އޭރަށްތާ އެތަނުގެ [ބުރިޖުގެ] މަތިން ދަތުރު ކުރާނެ ބަޔަކު ވެސް މިތަނުގައި ތިބޭނީ،" އިބޫ ވިދާޅުވި އެވެ. "ބަނދަރުތައް ހެދީ އެ ބޭނުމުގައި. ބިން ހިއްކީ އެ ބޭނުމުގައި، މަގުތައް އެ ހަދަނީ އެ ބޭނުމުގައި، އެއާޕޯޓު އެ ތަރައްގީ ކުރަނީ އެ ބޭނުމުގައި."
އެ މަނިކުފާނު ވިދާޅުވީ އެމްޑީޕީގެ ޕްލޭނުގައި އޮތީ ބުރިޖު އެޅުމުގެ މަސައްކަތާއި އައްޑޫގައި އިގުތިސާދީ މުހިންމު މަސައްކަތްތައް ފެށުން އެކީގައި ކުރިއަށް ގެންދިޔުމުގެ ވިސްނުން ކަމަށެވެ. އަދި އެކަން ހާސިލު ކުރުމަށްޓަކައި އެމްޑީޕީ އަށް ކުރިއަށް އޮތް މަޖިލިސް އިންތިހާބުގެ މެޖޯރިޓީ ދެއްވުމަށް އެދިވަޑައިގަތެވެ.
އިބޫ ވަނީ އެމްޑީޕީން އައްޑޫގެ ތަރައްގީ އަށް ފަށާފައި ހުރި މަޝްރޫއުތައް ކުރިއަށް ގެންދިޔުމަށް ވެސް ސަރުކާރަށް ގޮވާލައްވައިފަ އެވެ.
"އަޅުގަނޑު މި ސަރުކާރަށް މިއަދު ވެސް ގޮވާލަން ބޭނުން ވަނީ މި ޕްރޮޖެކްޓުތައް ލަސްނުކޮށް ކުރިއަށް ގެންދަވާށޭ. ތިޔަ ބޭފުޅުން މިތަނުން ވޯޓު ބޭނުން ކަމަށް ވަންޏާ ވެސް ކުރައްވަންވީ ކަމަކީ އެއީ، ރައްޔިތުން ބަލައިގަންނަ، ރައްޔިތުންނަށް ފައިދާ ހުރި ކަންތައްތަކެއް ކުރަންވީ." އެ މަނިކުފާނު ވިދާޅުވި އެވެ.
ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތުގައި އައްޑޫ ބްރިޖްގެ މަސައްކަތް މި އަހަރުގެ ތެރޭގައި ފަށާނެ އެވެ. އަދި މި ދައުރުގެ ތެރޭގައި އެ މަޝްރޫއު ނިންމާނެ އެވެ. އައްޑޫ ބްރިޖް އަޅަން މިސްރުގެ ދަ އަރަބް ކޮންޓްރެކްޓާޒްއާ އެކީ އެއްބަސްވުމުގައި ސަރުކާރުން ސޮއިކުރީ ފެބްރުއަރީ މަހުގެ 19 ގަ އެވެ.