ރައްޔިތުންގެ މަޖިލީހުގެ އިންތިހާބުގެ ކެމްޕޭނަށް ކުރީގެ ރައީސް އިބްރާހިމް މުހައްމަދު ސޯލިހް ގއ. ވިލިނގިލީގައި ދޮރުން ދޮރަށް ހިންގަވައިފިއެވެ.
ރައްޔިތުންގެ މަޖިލީހުގެ އިންތިހާބަށް ހަފުތާއަކަށް ކައިރިވެފައިވާއިރު އިދިކޮޅު އެމްޑީޕީން އަދި ސަރުކާރު ނިސްބަތްވާ ޕީއެންސީންވެސް އަންނަނީ ފޯރީގައި ކެމްޕޭން ކުރިއަށް ގެންދަމުންނެވެ.
އެގޮތުން ކުރީގެ ރައީސް ސޯލިހް އަންނަނީ ގއ. ވިލިނގިލީގައި ހަރަކާތްތެރިވަމުންނެވެ. އެރަށުގައި ކެމްޕޭން ޓީމާ ބައްދަލުކުރެއްވުމަށް ރައްޔިތުންގެ ގާތަށް ދޮރުން ދޮރަށް ހިންގެވުން ކުރިއަށް ގެންދެވިއެވެ. ގއ. ވިލިނގިލީ ދާއިރާއަށް އެމްޑީޕީގެ ޓިކެޓުގައި ވާދަކުރައްވަނީ މިހާރުވެސް އެދާއިރާގެ މެންބަރު ސައުދު ހުސައިންނެވެ.
އެމްޑީޕީގެ ރައީސް އަބްދުﷲ ޝާހިދު އަދި އެޕާޓީގެ ކުރީގެ ޗެއާޕާސަން މޫސާ މަނިކްވެސް މިއަދު ވަނި ކެމްޕޭނަށް ލ. އަތޮޅަށް ވަޑައިގެންފައެވެ. ޝާހިދުއާއެކު ލ. އަތޮޅުގެ ކެމްޕޭންގައި ސޯލިހްވެސް ބައިވެރިވެވަޑައިގަންނަވާނެއެވެ. ސޯލިހް އިއްޔެ ކެމްޕޭންގައި ހަރަކާތްތެރިވެފައިވަނީ އައްޑޫސިޓީގައެވެ. މީގެއިތުރުން ކުރީގެ ނައިބުރައީސް ފައިސަލް ނަސީމްވެސް އަންނަނީ އެމްޑީޕީގެ ކެމްޕޭންގައި ހއ. އަތޮޅުގައި ހަރަކާތްތެރިވަމުންނެވެ.
ރައްޔިތުންގެ މަޖިލީހުގެ އިންތިހާބު ބޭއްވުމަށް ހަމަޖެހިފައިވަނީ އޭޕްރިލް 21 ވަނަ ދުވަހުއެވެ. 20 ވަނަ މަޖިލިސް އިންތިހާބުގައި ޖުމްލަ 368 ކެންޑިޑޭޓުން ވާދަކުރެއެވެ. މީގެ ތެރޭގައި ހިމެނީ 326 ފިރިހެން އަދި 42 އަންހެން ކެންޑިޑޭޓުންނެވެ. 20 ވަނަ މަޖިލީހަށް 93 މެންބަރަކު އިންތިހާބު ކުރާނެއެވެ. އެމްޑީޕީން އިންތިހާބުގައި ވާދަކުރަނީ 90 ކެންޑިޑޭޓުންނެވެ.