ދެކުނަށް ކުރެއްވި ދަތުރުފުޅަށްފަހު ރައީސް ޑރ. މުހައްމަދު މުއިއްޒު މާލެ ވަޑައިގެންފިއެވެ.
ރައީސް މުއިއްޒު ރަސްމީ ދަތުރުފުޅެއްގައި ލ. އަތޮޅަށް ފުރާވަޑައިގަތީ މިދިޔަ ހަފުތާ ބްރާސްފަތި ދުވަހުއެވެ. ލ. އަދި އައްޑުއަށް ކުރެއްވި ދަތުރުފުޅު ނިންމަވާލެއްވުމަށްފަހު މާލެ ވަޑައިގެންފައިވަނީ މިއަދުއެވެ.
ލ. އަތޮޅަށް ކުރެއްވި ރަސްމީ ދަތުރުފުޅުގައި ރައީސް މުއިއްޒު ވަނީ ލ. އަތޮޅުގެ ބައެއް ރަށްތަކަށް ޒިޔާރާތް ކުރައްވާފައެވެ. އަދި އެރަށްރަށުގެ ރައްޔިތުންނާއި ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާ ބައްދަލުކުރައްވައި، އެރަށްރަށުގެ ތަރައްޤީއަށް ބޭނުންވާ ކަންކަމާއި، ރައްޔިތުން އެންމެ އެދޭކަންކަމާ ގުޅޭގޮތުން މަޝްވަރާ ކުރައްވާފައިވެއެވެ.
އެއަށްފަހު ރައީސް މުއިއްޒު އައްޑޫސިޓީއަށް ވަޑައިގެންފައިވަނީ ހުކުރު ދުވަހުއެވެ. އައްޑުއަށް ވަޑައިގަތުމުން ރައީސް އަށް ހޫނު މަރުހަބާއެއް ކިޔާފައިވެއެވެ.
އައްޑުއަށް ވަޑައިގެން ރައީސް މުއިއްޒު ވަނީ އައްޑު ރައްޔިތުންނާ ބައްދަލުކުރައްވާފައެވެ. އަދި ރައްޔިތުންގެ މަޖިލީހުގެ އިންތިހާބުގައި ޕީއެންސީގެ ޓިކެޓުގައި ވާދަކުރައްވާ ކެންޑިޑޭޓުންގެ ކެމްޕޭން ހަރަކާތެއްގައި ބައިވެރިވެވަޑައިގެންފައިވެއެވެ.