ކުރީގެ ރައީސް އަބްދުﷲ ޔާމީންގެ މައްސަލައިގައި ވަކި ފަނޑިޔާރަކަށް ސަރުކާރުން ނުފޫޒު ފޯރުވާކަމަށް ޔާމީންގެ ވަކީލުންގެ ޓީމުގައި ހިމެނޭ ޑރ. މުހައްމަދު ޖަމީލް އަހުމަދު ތުހުމަތު ކުރައްވައިފިއެވެ.
ރައީސް ޔާމީންގެ މައްޗަށް އިއްވާފައިވާ ޖަލު ހުކުމްގެ އިސްތިއުނާފު މައްސަލަ ހައިކޯޓުގައި އޮތްއިރު އެ މައްސަލައިގައި އަޑުއެހުންތައް ނިންމާލުމަށްފަހު ހުކުމް ނުކޮށް ގިނަ ދުވަސްތަކެއް ވެފައިވުމުން ޔާމީންގެ ވަކީލުން އަދި ތާއީދުކުރާ ފަރާތްތަކުން އަންނަނީ ކަންބޮޑުވުންފާޅު ކުރަމުންނެވެ.
ރައީސް ޔާމީންގެ މައްސަލައިގައި ހުކުމް ކުރުން ލަސްވާތީ އެ މައްސަލަ ޖުޑިޝަލް ސާވިސް ކޮމިޝަނަށް ހުށަހަޅުއްވާނެކަން ރައްޔިތުންގެ މަޖިލީހުގެ ރައީސް މުހައްމަދު އަސްލަމް ރޭ ވަނީ ވިދާޅުވެފައެވެ. އެކަމާ ގުޅިގެން ޔާމީންގެ ވަކީލުންގެ ޓީމުގައި ހިމެނޭ ޑރ. ޖަމީލް އެކްސްގައި ކުރެއްވި ޕޯސްޓެއްގައި ވަނީ އަސްލަމަށް ޝުކުރު އަދާކުރައްވާފައެވެ.
ޖަމީލް ވިދާޅުވީ ރައީސް މުއިއްޒު އެންމެ ފުރަތަމަ ދުވަހުން ފެށިގެންވެސް ޔާމީނު މިނިވަން ކުރަން ހުރަސް އަޅުއްވާފައިވާ ކަމަށެވެ.
"ވަކި ފަނޑިޔާރަކަށް ނުފޫޒްއެބައޮތް. އެފަނޑިޔާރުގެ އާއިލާއަށް ސިޔާސީ ހަދިޔާ ރައިސް މުއިއްޒު ދަނީ ދެއްވަމުން." ޖަމީލް ތުހުމަތުކުރައްވާފައިވެއެވެ.
މީގެއިތުރުން ޕީއެންއެފް ޖަލްސާ އަށް އެސްއޯ ފުލުހުން ފޮނުވީ ސީދާ ރައީސް މުއިއްޒު ކަމަށް ތުހުމަތު ކުރައްވާ ޖަމީލް ވިދާޅުވީ ފުލުހުންނާމެދު ފިޔަވަޅެއްވެސް ނާޅާ ކަމަށެވެ. އަދި ހާމަކުރީ ގާނޫނުގައި އޮތްގޮތް އެކަނި ކަމަށެވެ. އެ މައްސަލައިގައި ފިޔަވަޅަކަށް ވާނީ ހޯމް މިނިސްޓަރު އަލީ އިހްސާން މަގާމުން ވަކިކުރުން ކަމަށް ޖަމީލް ވިދާޅުވިއެވެ.
މަޖްލިސް ރައީސަށް ޝުކުރު އަދާކުރަން. ޕީއެންއެފް ޖަލްސާ އަށް އެސްއޯ ފުލުހުން ފޮނުވީ ސީދާ ރ. މުއިއްޒު. ފުލުހުންނާމެދު ފިޔަވަޅެއްވެސް ނާޅާ. ގާނޫނުގައި އޮތްގޮތް ހަމައެކަނި ހާމަކުރީ. ފިޔަވަޅަކަށް ވާނީ އިހްސާން ވަކިކުރުން.
މަޖްލިސް ރ ވިދާޅުވާހެން ރ. މުއިއްޒު އެންމެ ފުރަތަމަ ދުވަހުން… https://t.co/llFqj55ehC
— Mohamed Jameel Ahmed (@MJameelAhmed) April 13, 2024
ވ. އާރަށް ކުއްޔަށް ދިނުމުގައި ރިޝްވަތު ނެންގެވުމާއި މަނީލޯންޑަރިިން ކުށް ސާބިތުވެ 11 އަހަރަށް ޖަލަށް ލުމާއި 5 މިލިއަން ޑޮލަރުން ޖޫރިމަނާކުރުމަށް ކްރިމިނަލް ކޯޓުން ހުކުމް ކުރީ 2022 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ. މި މައްސަލައިގެ އިސްތިއުނާފު އަޑުއެހުންތައް ހައިކޯޓުން ނިންމާލާފައިވަނީ މިދިޔަ ނޮވެމްބަރު މަހުގެ 21 ވަނަ ދުވަހުއެވެ.