މީގެ ތިން އަހަރު ކުރިން މުމްބާއީގެ ރެސްޓޯރެންޓެއްގެ ތެރޭގައި ހިންގި މާރާމާރިއަކާ ގުޅިގެން ބޮލީވުޑްގެ މަޝްހޫރު އެކްޓަރު ސައިފް އަލީ ހާންގެ މައްޗަށް ކުރާ ދައުވާގެ ފުރަތަމަ އަޑު އެހުން އިއްޔެ އަށް ތާވަލް ކުރި ނަމަވެސް، ސައިފް އިންޑިއާގައި ނޫޅޭތީ ޝަރީއަތް ކެންސަލްކޮށް އަންނަ ޖޫން މަހުގެ 18 ވަނަ ދުވަހު ދައުވާގެ ފުރަތަމަ އަޑު އެހުން ބާއްވަން ނިންމައިފި އެވެ.
މި ހާދިސާ ހިނގާފައި ވަނީ ފެބްރުއަރީ 22، 2012 ވަނަ ދުވަހުގެ ރޭ ސައިފާއި އޭނާގެ އަންހެނުން ކަރީނާ ކަޕޫރާއި އަރްބާޒް ހާންގެ އަންހެނުން މަލައިކާ އަރޯރާ އާއި އޭނާގެ ކޮއްކޮ އަމްރިތާ އަރޯރާގެ ފިރިމީހާ ޝަކީލް ލަޑަކް އަދި "އޮ ތެރީ" ގެ އެކްޓަރު ބިލާލް އަމްރޯހީ އާ އެކު ރޭގަނޑުގެ ކެއުމަކަށް މުމްބާއީގެ ތާޖް ހޮޓެލް ރެސްޓޯރެންޓަަށް ގޮސް އުުޅުމުގެ ތެރޭގަ އެވެ.
އެ ރޭ ސައިފް މާރާމާރީ ހިންގާފައި ވަނީ ސައުތު އެފްރިކާގައި ދިރިއުޅޭ އިންޑިއާގެ ވިޔަފާރިވެރިއެއް ކަމަށްވާ އިގްބާލް ޝަރްމާ (ފޮޓޯގައި) އާ އެވެ.
މި ކުރިމަތިލުމުގައި ސައިފް ވަނި އިގްބާލްގެ މޫނުމަތީގައި ޖަހައި އޭނާގެ ނޭފަތް ވެސް ފަޅާލައިފަ އެވެ.
އިގްބާލަކީ "ބޫލް ބުލައްޔާ"، "ޖަސްޓް މެރީޑް" އަދި "ކަރްޒް" ފަދަ ފިލްމުތަކުގައި ސަޕޯޓިން ރޯލްތަކެއް ކުޅެފައިވާ ތަރީނާ ޕަޓޭލްގެ ފިރިމީހާ އެވެ.
މި ހާދިސާ ހިނގީ ސައިފްމެން ކާން ތިބި މޭޒާ ކައިރީގައި އިން މޭޒެއްގައި އިގްބާލް އިން އިރު، އޭނާ އަށް އުނދަގޫވާ ވަރަށް އަޑު ގަދަކޮށް އެ މީހުން ވާހަކަ ދައްކައި، ހީ ސަމާސާކޮށް ހެދުމުން، އިގްބާލް އެ މީހުން ކައިރި އަށް ގޮސް ޝަކުވާ ކުރުމުންނެވެ.
އަދި ރެސްޓޯރެންޓް ތެެރޭގައި އަޑު ގަދަ ކުރާތީ އުނދަގޫވާ ކަމަށް އިގްބާލް ބުުނުމުން، ރައްދުގައި ސައިފް ވަނީ "އަޑު މަޑު ތަނަކަށް ކަލޭ ދާން ބޭނުންވާ ނަމަ ލައިބްރަރީއަކަށް ދާށޭ" ބުނެފަ އެވެ.
މި ރައްދާ ގުޅިގެން އެ ދެ މީހުންގެ މެދުގައި ހޫނު ޒުވާބުގަނޑެއް ހިނގުމަށް ފަހު، ސައިފް އެންމެ ފަހުން އިގްބާލްގެ މޫނުމަތީގައި ޖެހީ އެވެ. އަދި މި މައްސަލަ، އިގްބާލް ފުލުހުންނަށް ރިޕޯޓް ކުރުމުން ފުލުހުން ސައިފް ހައްޔަރު ވެސް ކުރި އެވެ.
ނަމަވެސް ކަފާލާތުގެ ދަށުން އޭނާ ވަނީ ފަހުން ދޫކޮށްލައިފަ އެވެ.
މި މައްސަލައިގެ ތަހުގީގު ނިންމައި ސައިފްގެ މައްޗަށް މިހާރު ދައުވާ ކުރަނީ އިންޑިއާގެ ގާނޫނުލް އުގޫބާތުގެ 325 ވަނަ ބާބުގެ 34 ވަނަ މާއްދާގެ ދަށުންނެވެ.
މި މައްސަލަ އާ ގުޅިގެން ބައެއް ފަރާތްތަކުން ބުނެފައި ވަނީ ސައިފްގެ ފަރާތުން ފެނިފައި ވަނީ އަހުލާގީ ގޮތުން ވަރަަށް ދަށް ފެންވަރުގެ އަމަލެެއް ކަމަށެވެ.
އެހެންވެ އިންޑިއާ ސަރުކާރުން އޭނާ އަށް އެޕްރީލް 7، 2010 ގައި އަރުވާފައިވާ ޕަދްމާ ޝްރީ އެވޯޑް ވެސް އަތުލުމަށް ބައެއް ފަރާތްތަކުން ވަނީ ގޮވާލައިފަ އެވެ.