މިއަދު ފާހަގަ ކުރާ ދުނިޔޭގެ ސިއްހަތު ދުވަހާ ގުޅުވައިގެން މަރަދޫ ސިއްހީ މަރުކަޒުން ސްކޫލްތަކަށް އަމާޒުކޮށްގެން ބާއްވާ "އިންޓް ސްކޫލް ކްއިޒް ކޮމްޕެޓިޝަން" މިއަދު ބާއްވާ ގޮތަށް ހަމަޖައްސައިފި އެވެ.
އެ ސެންޓަރު ހިންގެވުމާ ހަވާލުވެ ހުންނެވި އިހުތިޝާމް ނަޖީބް (އިންތާ) މިއަދު ވިދާޅުވީ މަރަދޫފޭދޫ ސްކޫލްގައި ކުރިއަށް ގެންދާ ކުއިޒް މުބާރާތުގައި އައްޑޫގެ ހަތް ސްކޫލަކުން ބައިވެރިވާ ކަމަށެވެ.
އެ ސްކޫލްތަަކަކީ ފޭދޫ ސްކޫލް، މަރަދޫފޭދޫ ސްކޫލް، މަރަދޫ ސްކޫލް، ޝަމްސުއްދީން ސްކޫލް، ނޫރާނީ ސްކޫލް، ޝަރަފުއްދީން ސްކޫލް އަދި ހިތަދޫ ސްކޫލެވެ.
ކްއިޒް މުބާރާތް ފަށާނީ މިއަދު ހަވީރު 4:00 ގަ އެވެ.
އިންތާ ވިދާޅުވީ މުބާރާތް ނިންމާލުމަށް ފަހު، މާދަމާ ވަނަ ވަނަ އަށް ދިޔަ ސްކޫލްތަކަށް އިނާމު ވެސް ދޭނެ ކަމަށެވެ.
އޭނާ އިތުރަށް ވިދާޅުވީ ކްއިޒް ނިންމާލުމަށް ފަހު މާދަމާ ފާހަގަ ކުރާ މަރަދޫ ސިއްހީ މަރުކަޒުގެ 13 ވަނަ އަހަރީ ދުވަހުގެ ކޭކް ފެޅުން ވެސް އޮންނާނެ ކަމަށެވެ.
އަދި ކްއިޒްގައި ބައިވެރިވާ ސްކޫލްތަކަށް ހާއްސަކޮށްގެން ކާބޯތަކެތީގެ ރައްކާތެރިކަމާއި އަތްދޮވުން ސިއްހީ ރަނގަޅު އާދަތަކާ ގުޅޭ ހަރަކާތްތަކެއް ވެސް ކުރިއަށް ގެންދަން ވަނީ ނިންމައިފަ އެވެ.
މިކަމަށް ޝަންގްރިއްލާ ވިލިގިލި ރިސޯޓް އެންޑް ސްޕާގެ އެހީތެރިކަން ވަރަށް ބޮޑަށް ލިބޭކަން މަރަދޫ ސިއްހީ މަރުކަޒުން ބުންޏެވެ.