ވިޔަފާރިކުރާ ތަންތަނުގެ ކަރަންޓް ބިލަށް ދެމުން ގެންދިޔަ ސަބްސިޑީ ކަނޑާލުމަކީ ރަނގަޅު ނިންމުމެއްކަމަށް ފެނަކަ ކޯޕަރޭޝަންގެ މެނޭޖިންގ ޑިރެކްޓަރު، މުޙައްމަދު ނިމާލު، ރޭ ދިޓީވީގައި ވާހަކަފުޅުދައްކަވަމުން ވިދާޅުވެފައިވީ ނަމަވެސް އައްޑޫ އަދި ރާއްޖޭގެ އެހެން އަތޮޅުތަކުގެ ވިޔަފާރިވެރިން ތިބީ އެކަން ބަލައިންގަންނަން ތައްޔާރުވެގެނެއް ނޫނެވެ.
އެކަމާއި ދެކޮޅަށް އިޙްތިޖާޖް ކުރާނެކަމަށާއި، ކުރެވެން އޮތް ހުރިހާ މަސައްކަތެއް ކުރާނެކަމަށް އެމީހުން ބުނެއެވެ. އައްޑު އޮތޮޅު ކައުސިލުން ވެސް އޮތީ މިކަމުގައި ވިޔަފާރިތަކާއި އަތުގުޅާލައި އެކަތި ގަނޑަކަށް ވެފައެވެ.
ވިޔަފާރިތަކުން ބުނާގޮތުން ނަމަ، މިހާރުވެސް ކުއްޔަށް ވުރެ އެތައްގުނަ ބޮޑު ޢަދަދުތަކެއް ކަރަންޓަށް ދަނީ ހޭދަ ކުރަމުންނެވެ. އަދި އެމީހުން އެއަރކޯނާއި ފުރިޖުތައް ޖައްސަނީ، ރައްޔިތުންނަށް ބޭނުންވާ ތަކެއްޗާއި ޚިދުމަތްތައް ފޯރުކޮށްދިނުމުގެ ގޮތުން ކަމަށާއި، ކަރަންޓް ފަދަ ޒަރޫރީ ޚިދުމަތްތަކުގެ އަގު "އިންތިހާއަށް ބޮޑުކުރާނަމަ" މުދަލާއި ފޯރުކޮށްދެވޭ ޚިދުމަތްތަކުގެ އަގުވެސް މައްޗަށް ނުޖައްސާ ދެކޮޅު ޖެހޭނެގޮތެއް އެމީހުންނަކަށް ނުވިސްނެއެވެ.
މިހާރު ވެސް ފިނިކުރި ކުކުޅާއި، މަސް، ސޮސެޖް، ތަރުކާރީގެ ބާވަތްތަކާއި، އައިސްކްރީމް، އަދި އެހެނިހެން މިފަދަތަކެތި އައްޑުއާއި ހަމަޔަށް ކަނޑުންނާއި މަތިން ގެނައުމުގައި ބޮޑު ޚަރަދުތަކެއް ވިޔަފާރިވެރިންގެ ޖީބުން ހިނގައެވެ. މިގޮތުން ކިލޯއަކަށް 6 ރުފިޔާ ވަރު ހޭދަކުރަންޖެހެއެވެ.
އަދި މުދާ އުފުލުމުގައި ދިމާވާ ތަކުލީފްތަކުގެ ސަބަބުން ވެސް ވަރަށް ގިނަ ތަކެތި ބޭނުން ނުކުރެވި އުކާލަން ޖެހެއެވެ. ފުލައިޓްތައް ޑީލޭއި ވުމުންނާއި، ފުލައިޓްތަކުން ޖާގަ ނުލިބުމުގެ ސަބަބުން ތަރުކާރީ ޝިޕްމެންޓްތައް އެކީއެއްކޮށް އުކާލަން ޖެހިފައި އެބަހުއްޓެވެ.
މިޚަރަދުތައް ވިޔަފާރިންގެ ޖީބުން ހަމަ ޖައްސައިދޭނެ ކަމަށް ބެލުމީ ގަބޫލުކުރެވޭނެ ވާހަކައެއް ނޫނެވެ. އެއީ މުސްތަޙީލުކަމެކެވެ. ވިޔަފާރިވެރިންނަށް އެމީހުންގެ ވިޔަފާރީގައި ދެމިތިބެން ބޭނުންނަމަ، މިޚަރަދުތައް މުދަލުގެ އަގާއި އެއްކުރަން މަޖުބޫރުވެއެވެ. އަދި ނަތީޖާ ވެގެންދަނީ، ތަކުލީފު އުފުލަން ޖެހޭ ބަޔަކީ ނިކަމެތި ދިވެހި ރައްޔިތުން ކަމުގައި ވެގެން ދިއުމެވެ.
އެއީ އަމުދަކުން އެނޫންގޮތަކަށް، ދުނިޔޭގެ އެއްވެސް ތަނެއްގައި ވިޔަފާރި ކުރެވޭ އުސޫލެއް ނޫނެވެ. އެނޫންގޮތަކަށް އެކަން ހިނގާނަމަ، އެއަށް ކިޔަނީ ހިލޭ ސާބަހަށް މަސައްކަތްކުރާ ޖަމުޢިއްޔާތަކެވެ. ނުވަތަ "ޗެރިޓީ" ތަކެވެ.
ކަރަންޓް ސަބްސިޑީ ކަނޑާލުމަކީ ވިއްޔަފާރިވެރިން ކުއްވެރިވެ ފާފަވެރިވާ ނޫނެވެ. ވިޔަފާރިވެރިން ވެސް ކަންބޮޑުވަނީ ރައްޔިތުން އަތުން އިތުރަށް ފައިސާތަކެއް ނަގަން ޖެހޭތީއެވެ. އަދި އެފައިސާ ނެގުމަށްފަހު ސަރުކާރަށް ދޭންޖެހޭތީއެވެ.
އިންޖީނުގެތަކަށް މިހާރުވެސް ކުރިން ވެސް ވަނީ ފައިދާއެވެ. ނަމަވެސް އެފައިދާ ފެންނާކަށް ނޯވެއެވެ. އިންޖީނުގަނޑެއް ގަންނާނެ ލާރިއެއް ނުހުރެއެވެ. މިހާރުވެސް ކަރަންޓް ލޯޑް ބޮޑުވެގެން، ދޭތެރެ ދޭތެރެއިން ކަރަންޓް ކެނޑުމުގެ ސަބަބުން ކިތައް ގެއްލުމާއި ރައްޔިތުން ކުރިމަތިލާން ޖެހޭ ހެއްޔެވެ. ބަދަލުގައި ސަރުކާރުން ބުނަނީ އެންމެ 2 މެގަވޮޓްގެ ކުޑަ ޖަނެރޭޓަރު ގަނޑެއް ގެނެސްދޭނެކަމަށެވެ. އެހެންކިޔާތާ ވެސް މިހާރު ކިހާދުވަހެއް ވެއްޖެ ހެއްޔެވެ. ސަރުކާރަށް އިތުބާރު ކުރެވޭކަށް ނެތެވެ. އެހެން ދިމަދިމާލުން ވެސް ކަންތައް ކުރަމުންދާގޮތުންނެވެ.
ފެނަކަ ބޭނުންކޮށްގެން ސަރުކާރުން ކުޅެން އުޅޭ ކުޅިގަނޑު ދިވެހިރައްޔިތުންނަށް މިހާރު ވަރަށް ރަނގަޅަށް އެނގެއެވެ. އެމީހުން އެކަން ބަލައެއް ނުގަންނާނެއެވެ. ވިޔަފާރިވެރިންނޭ ކިޔާފަ އޮޅުވާލައިގެން އެމީހުންގެ އަމިއްލަ ޖީބުން ފޭރިޔަކަ އެމީހުންނެއް ނުދޭނެއެވެ. ނިކުންނަން ޖެހުނީމާ މަގުމައްޗަށް ވެސް ނިކުންނާނެއެވެ.
ސަރުކާރުގެ ޕްލޭނަކީ، އަންނަމަހުން ފެށިގެން އާއްމު ގޭބީސީތަކަށް ވެސް ކަރަންޓް ބިލުގެ ސަބްސިޑީ ނުދިނުމެވެ. އޭރުން ހުރިހާ ރައްޔިތުން ނިކަން ކެކިއަރާތަން ބަލަން ހުންނާނަމެވެ.
މީގައި، ޕާޓީއެއް، ކައުންސިލެއް، ވިޔަފާރިވެރިއެއް، އަދި އެހެން މީހެއް އިސްތިސްނާ ނުވެއެވެ. އެންމެން ވެސް ގުޅިގެން ކުރިއަށް ފިޔަވަޅު އަޅަންވީއެވެ. އަދި ހަމަ މިދަނޑިވަޅުގައި، ރާއްޖޭގެ އެކި ކަންކޮޅުތަކުން މީހުން މަގުމައްޗަށް ނިކުމެ މުޒާހަރާކުރަން ފެށީމާ މަންޒަރު ރީއްޗެއް ނުވާނެކަން ސަރުކާރަށް ވެސް ހަނދުމަފުޅު އަރުވަމެވެ.